Mosaiek likt in de jesjefter

Bloomlaezing tiedsjrif

Mit vunnef man hant ze 75 joarjeng van de tsietsjrif Veldeke durchjeleëze en droes jehold wat noa hönne jesjmak jód en wiechtieg woar. Frans Walraven, Pierre Bakkes, Eric Maria Poulsen, Michel Locht en vuurzitsender en sjloesredakteur Hub Nijssen. Mit deë letste hant vier effe jekald uvver 't nui bóch.

Biste vroeë dat 't aaf is?

"Natuurlig biste vroeë es se get aaf höbs. Dit is 'n karwei datste nit al te dèk duis in dien laeve."


Wat vingste noen d'rvan?

Ich höb dus neet jeker teks gelaeze, dat gaon ich nog inhaole. Mer driekwaart höb ich gelaeze. Dao waore tekste bie waovan ich noeëts gewete höb en dao zeen toch heel verrassende dinger bie. Dus es se vraogs: is 't kwaliteit genóg dan dink ich zeker dat veer aan ós eige criteria voldoon. Veur de res is 't afwachte wat de luuj d'rvan vinge."



Sjtunt noen dinger d'rin woatste nit ater sjtees?

"Gooj vraog. Dao zeen 'n paar dinger bie get zjwaker zeen es angere, dao is niks aan te doon. Veer höbbe 'ne dwaersdoorsjnij van al die jaore gepak. En jeker redaksielid haet 'ne andere sjmaak. Dat accepteer ich automatisch es se mit dees formule wirks. Veer zeen 'n democratische commissie. Es ich 't in mien eentje gemaak zouw höbbe, zouw d'r andersj oetgezeen höbbe.

Wat vingste zelf de betste sjtukker?

"Wat mich goof beveel oet de tied dae ich zelf gelaeze höb zien de vief gedichte van Hub Eussen. Grappig ving ich ouch waal Pierre Visschers en Paul van der Goor ving ich de topper. De huidige generatie zal 'm koum nog kènne, dus wurt 't tied um dao get aan te doon. Ouch Toos Schoenmakers-Visschers ving ich keigood."

Wat woar vuur Veldeke de richste tsiet?

"Nogmaals, ich höb neet alles gelaeze. Mar van wat ich onder ouge höb gehad, ving ich de jaore 30-35 heel biezunjer, de late jaore sestig en de lètste jaore zeen ouch neet sjlech. Frits Criens is koum vertegenwoordig en haet prachtige dinger jesjreve en ouch van Wim Kuipers höbbe v'r mer veer vief reigels."

Wie sjwoar hat de verdeling uvver de provins mitjesjpild?

"Veur 'n deil. Dae teks oes Gennep zouw d'r andersj neet ingesjtange höbbe, mer 't is toch de lètste factor dae mitsjpeelde. En 't sjtuk van 't besjtuur van Veldeke uvver d'r kreeg sjteit d'r in umdat veer die vraog wouwe beantwoorde. 't Is gènne literaire teks en 't is in 't Hollesj, mer 't heurt d'rbie. Ich haop dat väöl luuj noe de sjmaak te pakke höbbe en serieus doorgaon mit 't make van gooj literair tekste in 't Limburgs."

Paul Weële
13-12-2001