Winner Veldeke Literatuurprijs 2004

Op zondig 14 november 2004 zote in zaal Oad Toear in 't euverbekinde witte sjtedje Toear de veer genomineerde sjrievers vuur de literatuurpries 2004, hunne aanhang en veul geïnteresserde luuj biejein om van de drieköppige jury te huëre waem dit joar es beste dialectsjriever durch de jury oetverkore zou waere. De genomineerde sjrievers woare: Jan Bremmers oet Vlorp , Jo Caris oet Mestreech, Guus Peters oet Gelaen en Har Sniekers oet Toear. En die veer houwe zoeëveul familie, vrung en aanhengers mitgebrach dat de ganse zaal euvervol woar. Mè dat woar vuur de organisasie gein inkel probleem. Peter Bokken mit zien luuj van Veldeke Literair houwe aan alles gedacht of ze wiste subiet ter plekke 'n oplossing te vinge. Chappeau luuj. Doer diverse veuraafgoande toesjproake o.a. vuurzitter Lè Giesen van Veldeke Limburg, Math Snijders van de provincie en de vuurzitter van de jurie Jo Wijnen woert de sjpanning hoeëg opgeveurd.

Oeteindelik kooste de noa veure gerope kandidaten 't verlossende woeërd oet de mond van Math Snijders vernumme. "t Is oeteindelik Har Sniekers gewoare dae durch de jury es winner woar oetverkoare, mè neet vuuraleer gezag woert dat de inzendingen hieël kort bie ein loge. Neet op de leste plaats woert vuur Har Sniekers gekoaze, zoeë zag de juryvuurzitter, omdat hae volges de beoordelaars in zien poëzie zich sober en boetegewoeën doelmatig oetdrukt. Har Sniekers luët vöäl te roaje euver. De mos mit höm mit aafgoan tot de deepte van de dinger, woeveur hea zelf auch neet ummer wuurd vuur haet. De blieje Har Sniekers zaet d'r zelf van: 't is van 'nne mins dae de waeg kwiet is gewaes en noe oeteindelik weer 'n paad truuk haet gevonge, al wit hae zelf nog neet good welk paad precies dat hae mot goan. "t Zeen gein al te vrolikke gedichte mer waal tekste die oet 't laeve gegrepe zeen. Tekste die, zeker es de emotie van de sjriever durchklinkt es hae ze vuur luust, jiekerinne rake en dich 't geveul gaeve dat ze dich in diene zieël aan 't kieke zeen. Hieël bezonger vong ich zelf 't gedicht euver wie hae zien dochter mist die, al is 't mer vuur 'n paar joar, in 't boetelanjd is.Wat mich nog mieë aansjprook woar 't gedicht (det waal neet how mitgedoan vuur de pries) euver zien moder die noe langzaam verangerde in zien kindj. Har Sniekers is neet zoeëmer oet de loch komme valle. Hae haet al 's eerder tekste ingesjikt vuur de Literatuurpries, mè toen veel hae boete de pries. Doa neve sjrieft hae in zien woeënplaatsj Toear leedjes en sjtukskes vuur de gazette. Hae woar dus al geine vraeme in sjrievrsland zeker neet umdat hae actief lid woar en is van de sjrieverskrink Midden Limburg.

De Veldeke Literatuurpries besteit oet 'n bedraag van 500 euro en 'n bronze plaquette van kunstenares Desirée Tonnaer Har is biezonger gruëtsj op ziene pries dae höm durch Lè Giesen en Math Snijders oetgeriek woert, zoeë wie g'r kint zeen op de foto's. De gedichte van Hai Sniekers woemit hae de Veldeke Literatuurpries 2004 haet gewonne kint gaer hiej es PDF-document "downloade"

Jan Leblanc Austroa,
18-11-2004