Limburgse finale declamatiewedsjtried 2005
Vuur de twieëde kier is de finale van de Limburgse declamatiewedsjtried georganiseerd en neet zonger succes.
In 'nne good gevulde zaal van 't gemeinsjapshoes van Roostere höbbe 38 kinger gesjtreje óm de plaatsje 1, 2 en 3 in de versjillende groepe. De klein kinjer van groep 3 / 4 houwe al direct de harte van de luuj gesjtaole zeker wie Ylaise Huberts oet dae groep 't sjpits moos aafbiete. Wie klein of 't ouch waor, gaar gein zenuwe, althans dat waor gaar neet aan häör te merke. Doe waor 't ies mitein gebraoke. De luuj in de zaal - meistens vaders, moders en opa's en oma's - waore mitein in de sjtumming en sjtonge vanaaf dat moment de kinger bie mit geweldig aplaus. Riet Bougie, dat de kinger op 'n bezongere meneer opving en op hun gemaak sjtelde veurde ós op 'n haos professionele meneer durch 't programma. 'n Bezonger woard van waardering vuur de meneer wie 't de kinger opving, die hunne tekst effe kwiet raakde. Geweldig!
In dizze groep moos Sandra Wolfs oet Ech zienne titel van 't vörig jaor verdedige, en dat deej 't mit euvertuging. Zie won dan ouch vuur Emiele Steegh oet Velde en vuur Ylaise Huberts oet Tegele.
In groep 5 / 6 waor 't 'n gans sjpannend gebeure. Mit puntjes vesjil, leet de jury weite, zoeë doon laoge ze biejein. Mit 'n zelfgesjreve verhaol dat gans oet 't laeve waor gegrepe wis Kai Tuip oet Sjinne bie versjillende luuj 'n träönke in de ouge te touvere. Hae bracht 't verhaol op zoeë 'n euvertugende meneer dat hae de jury bekans regelrecht vuur 't blok zat. Ieërvol twieëde waor Jim Steijvers oet Stramproy mit zien declamatie "de Kok". Jim verslaog mèr net Sonny Stappen oet Tegele dae 't gedich "Kiek 't dao" bracht.
In groep 7 / 8 woe-in de kinger toch al 'n grotter taalgeveul mótte höbbe en in elk geval mótte laote zeen dat ze begriepend kinne laeze waor de competitie zoeë meugelik noch sjpannender.
Oeteindelik waor 't Miguelle Wetzels oet Kirkraoj de groeëte triomfator, wat häörzelf -achteraaf gezeen - nog waal 't meiste verbaasde, want zoeë waor häör redenering : "mich versjtaon ze toch neet euveral dus höb ich so wie so minder kans". Mè 't kós mit zien gedichter neet allein de jury mèr ouch de luuj hielemaol euvertuge. Es twieëd kaom oet de bus Nick Reijnen oet Stramproy mit 't gedicht Prónkeppelke. Plaats drie waor hiej vuur Niels Broekmans oet Pöt - Sjinne mit 't verhaol "de kaers die ste neet kós oetmake".
Wat ós bie dit alles bezonger - hieël bezonger - vuurkwaom waor waal dat twieë kinger oet Kirkraoj mitdoge die oorsjpronkelik oet Kosovo gebeurtig waore. Hiejoet bliekt dus waal dat inburgere zelfs in 't Kirkraojs meugelik is. De priesoetreiking waor 'n gans fieës. De vuurzitter van de organiserende vereiniging Ech, Mia Maesen, de kersverse wethaojer Wouters en de vuurzitter van Veldeke Limburg, dhr. Lé Giesen reikte de pries oet. Hiejnao waor d´r gelegenheid tot ´t make van foto`s, die g´r hiejbie kint bekieke. `t Waor ein groeët fieës, vuur de kinger vuur de groeëte óm de sjpanning ónger de kinger te belaeve, vuur de coördinator dhr. Piet Aben, vuur de organiserende krink Ech mè bove alles vuur ós Limburgse dialek, dat ouch nog in de 21e ieëw gesjpraoke mót waere zoeè zag de vuurzitter van jury dhr. Pierre Bakkes aan ´t eind.
14 juni 2005