Begin

Wouter Wetzels, Maaseik

Begin

De ieërste aardbeie
aan 't begin van 't sezòwn
zoe zeut en roeëd
zjus es diech
kènt neet sjoeëner.

De ieërste stepkes
in 't begin van e lieëve
twi-jfelechtig en verzichtig
zjus es iech
get te sjów.

De ieërste noeëte
in 't begin van ós leedje
lieëventig en wild
zjus es wieë
get te min.

Di-jn lèste wäörd
in 't begin van ós verhaol
ongesproeëke en ongesjrieëve
zjus es diech
vuur alti-jd bijgeblieëve.


**

Wènne

Zjus es aan de zoeëmer
mót iech ouch aan diech wènne.

De plotse bujje
de brannende zón
op di-jn gezich
op mi-jn gezich
en op oos sjauwers
een hieël ieër vuur miech
mer toch
iech mót der effe aan wènne.

Des diech
alti-jd bi-j miech wils zeen
mer tog väöl te dek weg bès
dao mót iech aan wènne.

Det iech
alles aan diech moog vraoge
mer waat iech ech wil weit
noeëts zal dörve vraoge
dao mót iech aan wènne.

Det wieë twieë nów.

Zjus es aan de zoeëmer
mót iech dao aan wènne
mer van ein dènk
bèn iech
al de hieële ti-jd
zieëker
iech kèn der allein mer bi-j wènne.


**

Bespäöld

Midde in di-jn spel
woeëvan iech dach
det iech
der allein mer
kós bi-j wènne
besef iech
des diech
miech bespäöls
es een marionnet
de töjkes
in den han.

Midde in det spel
woeëvan iech
eigelik niks wis
of mesjeins
tog mer dieëch es of
besef iech
det iech
de sjieër
in mi-jn han höb
met alle pi-jn
di-j doa ouch bi-j huurt.

Midde in det spel
woevan iech
achteraaf
waal väöl kèn zegke
mer es iech ieërlik bèn
eigelik
nóg alti-jd niks weit.

Midde in det spel zit iech
en midde in det spel
bli-jf iech
bespäöld.


**

Gebroeëke

E gebroeëke lieëve
des alles
waat der uver bli-jft
noa de doeërtoch
van de orkaan
mèt di-jne naam.