Declamatiewedstried in Zöstere! (26-03-2010)
väör kènjer vanne basissjoale
De Zösterse finale weurtj gehaoje op vriedig 26 mieërt in de Hermeniezaal in de Feurthstraot. Ze is bedoeltj väör deilnummers vanne sjoale in de kerne Zöstere, Nuujstadt, Deetere en Roostere. De kènjer zólle ’n gedich väördrage in Zösters dialect. Die kènjer zeen natuurlik al volop bezig. Ieës ’t oetzeuke van ’n gedich en den det “kreng” van boete lieëre. De väördrach is belangriek. Dao kik de jury ouch nao.
Die jury bestuitj in Zöstere oet Miranda Fiddelers, Peter Feijen en Cor Mosterd. De prissentatie vanne aovendj is in henj van Jos Douven, dae dao óngerhandj al ervaring in krig, want dit is in Zöstere noe de derde kieër.
De Echter finale vuntj plaats op vriedig 16 april in Zaal-Brasserie 'Pejjerhaof' aan de Houtstaot in Pej. Vanzelfspraekendj is Joop Kormelink weer van de partie mit zien urgelke. En….. op allebei de aovendje kónne w’r geniete van ’n optraeje van…..Lotte! Waalbekèndj bie ederein en al twieë kieër wènnares van ’t Kènjer Vastelaovesleedjes Konkoers.
De wènnieërs van Zöstere zulle zich ouch op de Echter finale laote huuere. De nummers 1 en 2 gaon door nao de Limburgse finale in Wieërt.
Weer beginne óm 19.00 oer. Ederein is welkom óm aan te moedige en/of te loestere.