Jubileum Declamatiewedstried in Ech (15 oktober 2011)
Dit jaor woor ‘t de tieënde kieër det in Ech de declamatiewedstried gehaoje waerdje väör kènjer van de basissjoale. Det woor in april jl. Bie die gelaegenheid is de initiatiefnummer en stimulator van dees activiteit van Veldeke Krink Ech door väörzitter Ton Janssen kort toegespraoke en ’n bleumke aangebaoje. Bönnekort gaon w’r oetgebrèdj aandach sjènke aan dit feit.
Op zaoterdignaomiddig, 15 oktoaber weurtj vanaaf 5 oer trökgekeke op die tieën jaor declamere. Det doon w’r mit zoaväöl mäögelik minse die direct betrokke wore bie de wedstried. Daobie zeen op de ieëste plaats oetgenuuedj alle prieswinnieërs van die 10 jaor mit hun aojers. Verder de jury-leje van de versjillende jaore, de basissjoale, comiteeleje en alle leje van Veldeke Krink Ech. ’t Belaoftj ‘ne gezèllige nammedig te waere, gans inne sfeer van de declamatie-aovendje vanne aafgeloupe tieën jaor, want versjillende kènjer (kènjer?, de awste zal intösse äöver de 20 zeen!) höbbe toegezag hun wènnendje gedich nog èns väör te drage. En Joop Kormelink zal d’r zeen mit zien örgelke, want det woor in die periode ouch haos ’n vas puntj.
Gedichtebunjel
Det väördrage weurtj mekkelik gemaaktj door de prissentatie – dae naomiddig – van eine bunjel wo-in alle gedichte zeen opgenómme womit in die tieën jaor de 1e, 2e of 3e plaats is bereiktj. Weer dènke det dae bunjel henjig kan zeen bie ’t väördrage, mer ouch erg gesjiktj óm d’r gewuuen ‘ns in te laeze. Behalve de gedichte staon d’r van jaor tót jaor de gegaeves in betreffendje de declamatiewedstried in Ech.
De aanwezige prieswènnieërs, jury-leje en sjoale kriege dem gratis oetgereiktj. Waem ‘m verder nog wiltj höbbe kan de bunjel koupe väör 5 euro.
Initiatiefnemer en stimulator Piet Aben ontving bloemen
b.g.v. de tiende finale in april jl.