KÈRMES

kerresel
ringe-ring
tinge-linge-ling
zaet de bel
vanne kerresel,
alles is bóntj,
alles drejt róndj,
ich gaon lekker hel
oppe kèrmes-kerresel,
ringe-ring!
tinge-linge-ling!

**

kitting-kerresel

zjweve - drejje
haore wejje
windj in 't gezich
zo heerlijk lich,
zo heerlijk lich!
zjwiere- zjwejje
sjaterend drejje,
lónke - prónke
gans bedreve
hemels zjweve
helder! hel!
same inne kittingkerresel!

**

ZOMER

HÓMMEL

hómmel,
dieke, dieke sjómmel,
doe zings vanne zomer,
zings vanne zón
en drinks de werme, lome,
zomermiddig oet de blome.

**

zónjigmiddig

de zónjigmiddig
haet zich
sónger klach
efkes op ein oor gelag,
alles liek zo zomerdreug,
zo sónjes-zónnemeug,
ein inkel pluuske
oppe werme zomerwindj
inne hègk ein plaetske vindj,
alles is mit rös doorwaeve,
efkes moog ich langsaam laeve.

HAIKU

levenheersbeesjke
op ein kingervingerke
sjpeelse vleegbasis

**

toos schoenmakers-visschers