Körner mit toterfoetbal
Zaes doe ouch foetballe?, waerde mich gevraog.
Jaowaal menier, mie gans laeve lank al. Ummer gezag: foetballe. Ich höb det waord gelierd van luuj die ’t foetballe nag höbbe zeen kómme in Limburg. Wo höbbe ze die F dan van? Oet Ingelandj euvergewejd?
Det zal noets mie dudelik waere. Bómp onneet. Me mót zich waal bedinke det de luuj vreuger häör wäörd neet van de radio kóste heure. Dök móste ze zelf wäörd make, zoewie veur d’n draod wo get sjtroum op sjting. Sjrikdraod ape veer de Hollenjers noe nao. In Helje (Helden) en wiejerop höbbe ze zelf ei waord bedach, en det is ei baeter waord: sjtoekdraod. Me krieg eine sjtoek (stómp, opdónder): det is ’t waeze van daen draod. En of de kuuj of de luuj dao zich get van aan laote gaon, mótte ze zelf weite. Wen me zoenen draod zeve maol beetpak krieg me zeve kier eine sjtoek, mae of me nao d’n ierste maol nag sjrik? Allei, veer hauwe vreuger ouch eine sjtoekrenner: eine wielrenner. Dae sjtampde zich wiejer. Waem wit haet stoempen hiej waal mit vandoon. Ich gaon det neet oetzeuke, den me vroog mit get euver foetballe.
Guf ’t nag anger eige foetbalwäörd?
Väöl dink ich, enne: sjik in. Ich höb gelierd: drei körners penantie. Die wäörd mótte veer blieve gebroeke. Woveur?
Ze zien zoe Limburgs wie de Maas. Körner is mesjiens gemaak aan de móndj van körvele, de koster is köster. Remunj (en ich bön van die kenj) hauw d’n dichter Keub Körner – ich mein mer. En laote veer röstig van penantie sjpraeke, dan heurt me de N van pinnetensie (penitentie), boetedoening ofwaal sjtraof , penalty; det Ingels waord is femilie van ’t Letiense poena, boete en sjtraof. Noe zaet me det penitentie neet van poena kump (get anger DNA haet), mae det de luuj (en de pesjteurs?) dao dinkelik waal aan gedach zólle höbbe, aan die euvereinkóms.
Prima, mae wo höbbe de luuj langs de lien aan gedach wie de oetdrokking keem: Kogelenberg, bujel in det net! Neet algemein bekind, waal Cultureel Erfgoed. Kogelenberg woor eine foetballer oet Thoear (Thorn), en in de ganse sjtreek bekind. Mesjiens ouch door ziene naam, dae neet väöl veurkump. Woveur dae kreet? Keugele, kaegele, bujele: waat tuntj uch?
En dan nag get nutte foetbalkal. Hiej en dao sjprik me van pratsj veur de gool, ofwaal: óngesjtèld zien. Veur waem neet zoe van vreuger is: pratsj is nate módder ofwaal toter. En dan vinj ich noe (010710, 13.26.48), inkel uurkes veur de grote matsj, ei nuuj waord oet, veur foetballe wo nag neet nao te kieke is: toterfoetbal.
Wim Kuipers, 2 juli 2010