30 jaorig jubileum krink Ech en aaftreje van Mia Maessen es vuurzitster.

10 mieërt waor 't fieës van 't dertig jaor bestaon van Veldeke krink Ech en 't aafsjied van Mia Maessen es vuurzitster.

D'n aovend begos mit 'n hieël sjoen mis die durch de fanfaar en 't zangkoer woert opgeloesterd. Die mis doerde waal lank mè allez om dich good vuur te bereije op 'n fieës móst te get euver höbbe.

Daonao gonge v'r achter de fanfaar nao 't broen cafe aan de euverziejvan d'r plei en zoeë wie os woert oetgelag hawwe v'r 'n groeët gelök dat v'r dao terech kooste. Durch mitwirking van de gemeinte en den oje eigeneer kos de zaal dae'n aovend toch oape ( vanwege eigenaerswisseling moos d'r eigelik toe blieve). Dus dank aan alle partieje die 't toch meugelik höbbe gemaak.

De vuurzitter van de Krink Ech äöpende de aovend en booj os allemaol 'n tas koffie en 'n werm saucijsebruëdje aan. Hae goof vervolges 'n euverzicht van 't 30 jaorig besjtaon van de krink Ech en dat waor natuurlik vuur de in groeëte getale opgekomme leje van de krink kaore op de muële. Mit z'n alle kooste ze ooj herinneringe ophaole. Hae kaom vanzelf aan 't eind van zien verhaol oet biej Mia Maessen die 't vuurzittersjap opgoof en hae somde de verdeenste van Mia oetveurig op. Vuur al 't goje wirk en vuur alle verdeenste ierde hae häör names de krink mit 't ierelidmaatsjap van de krink Ech. Dit woert manifest gemak mit de oetreiking van 't beeldje van Veldeke, dat alle iereleje van de krink in 't verleje ouch al hawwe gekrege( zuug foto).

Daonao goof Tom Janssen 't woeërd aan de burgemeister van Ech. Dae prees de krink en in 't biezunjer Mia Maesse die aaftrooj. D'r passeerde nogal get de revue van alles woe Mia zich vuur ingezatte hej. Hae besjloot zien vehaol mit 't oetsjpaeke van de dank names 't ganse gemeintebesjtuur en hae ongesteepte zien verhaol mit 't oetreike van 't ieësjte bord mit 't nuuj waope van de gemeinte Ech.

Daonao woor 't woerd aan de vuurzitter van Veldeke Limburg.
Ouch hae feliciteerde de krink mit 't jubileum en prees de krink vuur häör actieve rol in de Veldeke belaeving in Limburg.'n Vuurbild vuur menig angere krink. Vanzelf kaom hae op de truuktraejende vuurzitster, Mia Maessen. Hae goof aan dat Veldeke Limburg Mia es 'n werm pleitbezörgster haet kinne en moge ervare. Häör enthousiasme en häör positieve laevesinsjtelling höbbe in belangrieke mate biegedrage in 't funktionere van de krink Ech.

't Hoofbesjtuur haet hiej hieël veul bewonjering vuur en wil dat waardere mit 't toekinne van 't ieërelidmaatsjap van Veldeke Limburg. De biejbehurende sjpeld woert häör durch dhr. Lei Pennings opgesjpangd (zuug foto).

Hiejvan waor Mia hieël erg onger de indruk en in häör dankwoord leet ze dat good mirke.

't Fieës ging durch onger 't genot van 'n lekker drenkske en..- en dat waor 'n gans bezonger idee van de krink Ech - 't optraeje van de vuurzitters van alle kringe oet Limburg, elk in hun eige dialect. 't Woert 'n cabaret, besjtaonde oet gedichte, vuurdrachte, leedjes of tekste zoeë vuur de vuis weg.

'n Wirkelik schitterende ervaring. wirkelik 'n gouwe greep van de krink Ech, die daomit weer 'ns leet blieke wie creatief dae krink is.

Kortom 'ne echte Limburgse aovend woebie op 'n hieël sjoene meneer aafsjied woert genomme van Mia Maessen.

't Hoofbesjtuur wunst de krink Echt nog 'n hiël gooj toekomst onger d'r nuje vuurzitter Ton Janssen.

Austrao, 22 mieërt 2007

J.Leblanc