Lé Giesen beneump tot ieërelid

In de Algemein Vergadering van Veldeke Limburg is awt veurzitter Lé Giesen, in aanwezigheid van de kringbesjture en zien vrouw Mariet, beneump tot ieërelid van Veldeke Limburg.

Veurzitter Lei Pennings heel de volgende toesjpraok:

Bèste Lé en Mariet,

Names alle aanwezige hie heisj ich uch allebei welkóm.

Mit oos vraog nao dees vergadering te kómme Lé, wille v'r van dich geine Heintje Davids make, want al höbs te mich e bietje veurgelaoge euver 't feit, dat 't veurzittersjap van Veldeke mer e paar uurkes per waek zou koste, bès gerös, doe hoofs neet weer obbenuuts te beginne es veurzitter. Nae, v'r wolle dich nog ins laote kómme óm dien vertrèk es Veldeke-praeses nog ins effe euver te doon.

In de vurge algemein vergadering haet Jos Stassen dich al oetveurig oetgezjwejd. Zónger dat te herhaole wil ich toch nog ins get verdeenste van dich veur de vereiniging de revue laote passere.

Laot ich beginne mit te sjtèlle, dat de geweldig constructieve vergadering van zoasjuus in groate maote door dich is veurbereid, want es v'r zègke dat 't good geit mit Veldeke, dan verwies dat zeker ouch nao dich.

Van mieërt 1998 tot mieërt 2006 höbs te 't veurzittersjap van Veldeke bekleid. Veuraaf waors te al es besjtuurslid in Venlo en bie de hoofdvereiniging aktief. Es veurzitter höbs te dich, mit enorm deskundigheid, bevlaogenheid, gedrevenheid, verantwoordelikheid, vashawwendheid en mit resjpek veur de collega-besjtuurslede en gesjprekspartners ingezat veur 't bereike van de doelsjtèllinge van Veldeke. Doe höbs Veldeke gepresenteerd es sjtimulator en bewaarder van 't dialek en de volkscultuur. Doe höbs d'r mit veur gezörg dat Veldeke es vereiniging veur e breijer publiek is aopegesjtèld. Dialek en volkscultuur zin neet allein zake veur weitensjappers en awwere. 't Taegedeil is waor. 't Zin gesjènke oet 't verleje mit ein hoag waerde die veur jónk en awt van eminent belang zin en door e zoa groat meugelik pebliek mótte waere gekoesterd.

Dat 't gebroek van dialekt, in woord en gesjrif door jónk en awt, op radio en TV, in alle laoge van de bevolking, in de popmeziek en neum mer op, op d'n daag van vandaag ein ummer greujende belangsjtèlling krieg, is mit te danke aan de aktiviteite van Lé Giesen. Ein anger verdeenste van dich is, dat-s te permanent op zeuk bès gewaes nao de dialoog mit anger organisaties mit dezelfde ougmèrke es Veldeke.

Neet de minst belangrieke kóntakte óngerheels te mit de besjture van de provincies Nederlands en Belsj Limburg, en de greujende samewèrking op 't vlaak van dialekte tösje de organisaties aan deze en gene kant van de grens vènge hunne basis in die kóntakte.

Zeker neet maog ich euversjlaon dien insjpanninge óm de besjtuurssjtruktuur van Veldeke aan te passe aan de eise van de moderne tied. Ein geveulige operatie, die-s te mit tact en euvertuging en mit insjtömming van alle kringe höbs weite aaf te runje. In 't vandaag vasgesjtèlde beleidsplan van Veldeke veur de kómmende jaore, is neergelag wat-s te in de aafgeloupe jaore höbs veurbereid: ein groater professionalisering van 't besjtuur, mieë samewèrking mit anger organisaties, verbaetering van de interne en externe communicatie, 't aktivere en betrèkke van jóngere bie Veldeke en 't bevordere van weitensjappelik óngerzeuk op 't vlaak van dialekte en volkscultuur.

Lé, ich höb nog ein ganse bössel vaere, meh ich sjei noe oet op ein dènk nao: naeve dien ervaring en naeve al dien verdeenste bès te eine ieërlike en fejne vent mit humor. Veer zin dich biezunjer dankbaar en erkèntelik veur 't werk wat-s te veur Veldeke höbs gedaon, en v'r wille in dae dank ouch dien vrouw Mariet betrèkke, want es die dich neet gesjteund haw, haws die 't werk veur Veldeke neet kènne oetveure wie-s te gedaon höbs. Es dank wille v'r Mariet gaer in de blome zètte en dat óngersjtraepe mit applaus.

Lé, "Der Mohr hat seine Schuldigkeit getan, der Mohr kann gehen". Mit resjpek en dank numme v'r aafsjeid van dich, en ouch weer neet, want doe blifs ós helpe op 't terrein van educatie. Nog deze mörge kooste v'r in de gezèt laeze euver 't póppetheater dat ónger dien leijing is opgezat. Bie ein aafsjeid huërt 'ne kado. Dae van ós is twieëledig. Allerieësj kèn ich dich gruëtsj en blie mitdeile, dat de algemein vergadering dich haet beneump tot ieërelid van oos vereiniging Veldeke Limburg. Daonaeve haet 't besjtuur besjlaote dao e sjóffelik ieëreteike veur in te sjtèlle, namelik 'n gouwe draagsjpang in de vorm van de V van Veldeke.
t Is ein creatie van de edelsjmeed Ben Kreijen oet Kirchroa. Ich veul mich verieërd dich dit es ieësjte in oos vereiniging te maoge opsjpange. Ich wönsj dich toe dat-s te dit nog lang en in ein goow gezóndheid zuls kènne drage.

Maog 't dich en Mariet same good blieve gaon.

L.P.

28-11-2006