Nag get sjiet... of sjies
Neet te gluive, wiewaal ’t euver gelouf geit. Vurge waek woor ’t wie veer vreuger zagte Dreivöldigheidszónjig, de zónjig van Remunsje kirmes. Noe hit dae zónjig de naamsdaag van God, zag de pastor. Dae God haet väöl name. Biej de Islam bao hóngerd, name wie de Goje, Goedertierene (höbbe veer dao get veur?), of Hae dae ’t saap in de boum zaet ouch nao de bäövelste tekskes te gaon. En in Kirchroa hit Hae d’r Herjod, mit es kleinwaord: ’t Herjödsje. En doe vertèlde hae (pesjtoor) ein anekdote. Gank mit. Sjoemelmert in Kirchroa. Kraom mit kruutser, kruutsbeeldje. Eine man vreug: waat kos det dao? “Vunnef euro”, heurt d’r, en hae sjleit d’roet: “Vunnef euro veur det sjies Herjödsje?”
Ich gaon mae geweun wiejer. Nag get oet Kirchroa. Dao sjrief me broeT (bruid), wiewaal me meis broed zuut in Limburg. Woveur?, waerde mich gevraog.
Jaomer genóg sjteit ’t miervoud neet d’rbiej. Waal in ’t waordebook van Tegele: broeTe; krek wie ich van mam heurde. Daoveur sjrief ich broet. Noe kump det miervoud neet väöl veur. Me haet ’t ummer euver bruutjes, mae det zien ouch deugnieten, waat net get angers is es dougeniekse. Oos Taal is riek.
Riek. Seppig leus me dök. Zoe hit ’t waordebook van Ech(t), van René Geurts: Seppig wie ein sjmoutpaer. Gemeind zól zien: Oos Taal is seppig, sappig wie paere. Of det gunstig is? Me leus ouch dökker van sappig Vlaams. Waat meint me? Get waat angers is es dreug Hollesj? Prima, mae woveur zólle wäörd in ei waordebook seppig zien? Mail mich det. Zól pratsj (erge toter = modder) ei seppig waord zien? En kwatsj dan, en watsj (oorveeg)? Mit zoeget kan me neet väöl. Wäörd mót me gebroeke, ouch det de taal zich óntwikkele kan. Veurbeeldj van nag gei keteer geleje. Mien vrouw zuut ein sjroef op de vloer ligke. Oet eine sjtool gevalle? Jao, dae van mich, en ze zaet: Haol mich eine kruuts. EinE kruuts: kruisschroevendraaier. Waord mit ei kreunke. Gaon veer daoveur ouch weer kruutser sjrieve? Angers blief det waord allein bewaard in name, wie Kruytzer(s). Insgelieks bön ich sjoew (kan ich hiej neet baeter bang gebroeke? – mail) det meTs noer euverblief in Metsemakers.
Wim Kupers, 8 juni 2010
Mail nao kuipers.wcl@home.nl of nao redactie@veldeke.net