Sinterklaosgedichte
Van handj-toet-handj
drage kaal buim
de maon door de wintjerbósj,
de sinterklaostied is begósj.
**
Kingerversjke
Sinterklaos en zjwartepiete-arie
krege al in jannewarie
de eerste brifkes binne
óm kedootjes te verzinne.
Inne sinterklaoze-bekkerie
begoosjte ze weer blie
te bakke aanne sjpikkelaas,
zjwarte-piete-joris waar de baas.
Mer piete-joris sjlókde toch zo gaer
veural bie raengewaer
en bie ein grote dieke bui
knapde piete-joris zo mer oette trui.
Zo, zag Sinterklaos ein bietsje kwaod,
noe isse vól, mien Sinterklaoze-maot.
Piete-joris, sapper-de-kriek,
van al det gesjlók waers doe te diek.
En noe beginne Sinterklaos en piete-arie
neet meer zo vreug in jannewarie,
nae Sinterklaos haet oetgekiend
pas te beginne inne zomer wen 't zunke sjient.
En Piete-joris zaet: Sinterklaos bedank!
noe blief ich zeker lekker sjlank!
**
Sinterklaos dae nao postert zoow kómme
zoot in zichzelf te zuchte en te brómme:
verleze ze in Limburg häör versjtandj?
wat is dao eigelijk aan de handj?
Zjwarte-piete-joepi zag t'r, jóng wat is det dan
zelfs dóe kries hie nag ins gries haore van,
laes ins wat hie sjteit…Nikes?
en wat is det…mountainbikes?
Höbbe ze in limburg wäörd tekort?
Höbbe ze allein mer van det Ingelsj sort?
Mien leef kinger, geer wit toch waal
det ich zo hawt van mien Limburgse taal.
Zeker ich kóm oet Sjpanje,
hawt van sjiek en ouch van franje,
hawt van alle kinger aeveväöl, de's waor,
mer dit sort taal, vèlt mich toch zjwaor.
Nae, ich ving 't nieks sjoons
det boetelandjs en turbo-gedoons,
wäörd wie "shit", ich haat ze piete-joepi,
dan heur ich nag lever geweun "poepi"
En es ich weg gaon zègke ze "doei",
ich kan allein mer zègke foei, foei, foei!
Nao Limburg kóm ich gaer
waer of gein waer.
Mer zègk dan toch geweun:
Sinterklaos, ich höb sjoon sjoon,
zoowt geer dao estebleef
get in wille doon?
Toos Schoenmakers-Visschers
Commissie Volkscultuur
19-11-2006