Veldeke Limburg 85 jaor
Weer profitere op 24 november 2011 mit in de fieësvreugdje.
Op de Algemein Vergadering van Veldeke Limburg op 24 november weurtj stil gestange bie ’t feit det dees vereniging 85 jao geleje is opgerich. In det kader is aan Max de Bruin gevraogdj nao dees vergadering nog ‘ns zien mitsleipendje, Limburgse vertolking van de theatermonoloog “Pommeren” op de bühne te brènge.
Ómdet dees vergadering plaats vuntj in Ech, weurtj ouch aan oos leje de meugelikheid gegaeve dees oetveuring bie te wone. Es bestuur vanne krink Ech zeen w’r enorm ingenómme mit dit “verjaordaagscadeautje”, óndanks det w’r 4 jaor geleje ouch al ‘ns van dees geweldige oetveuring höbbe kènne genete. De minse die toen dao wore zulle ’t mit ós èns zeen det ze de kans óm dees ontroerendje väörstèlling nog ‘ns ‘ne twieëdje kieër te kènne belaeve neet kènne laote loupe. En de luuj die d’r toen neet bie wore, moge dit zeker neet misse.
In dees monoloog vertèltj ‘ne aoje man äöver zien vreugdeloze laeve in ’t bejaardehoes, mer ouch äöver zien plezerige herinneringe die d’r haet äöver “vreuger” en äöver wie alles ’m daonao is aafgepaktj. Hae veultj zich nog energiek, mer tegeliek neet bie machte óm zich te waere taege die regelieërs, die ’m belètte óm zien laeve zelf in te völle…..
De Veldeke-aovendj begintj wie gebroekelik óm 20.00 oer. Op dónderdig (!) 24 november. Weer kómme same in ’t café-gedeilte. Bie ’n tas kóffie of get anges loestere w’r den ieës nao ’n väörlaezing door oos bestuurslid Ton van Wegberg oet ’t book “Moders kneen” van Jacq Vriens. Ouch dit verhaol raakt aan ‘tzelfdje thema. Es de zaal gereid is väör ’t toneel zal taege 21.00 oer mit de väörstèlling waere begós. Dees doertj 50 minute.