Zomerblome
gedichte van Toos Schoenmakers-Visschers
kroedwösj
't zeen iezer- en koperknuup,
aels, kaore, haver, weit,
oette haof nag noteblaar,
hoe oze kroedwösj oet besjteit.
ein awd limburgs gebroek
neet te koup vuur geldj,
vier makde vól vertroewe
eine sjpeurtoch doer 't veldj
eine echte zomerreuk
hóng euver weije en landj
en goof ós mit ós eige dörp
dae ónversjlietbare bandj.
bie 't zaengene inne kèrk
sjtoke vier es kindj
dae kroedwösj hoog ómhoog
gesierd doer kaord of lintj.
bie ónwaer doon biejein,
brook mam ein tekske draaf,
deej det heel behoedzaam inne sjtoof,
oos angs nóm zeenderouge aaf.
rieke herinnering
vól geur en kluur,
vól sfeer, angs, besjerming,
vertroewe heel puur.
postert, toos schoenmakers-visschers
ZOMERBLOME
dahlia
dieke, dieke dahlia,
kop sónger boek
baove sjtruise sjtroek,
zomer-idool
es boerehaof-symbool.
**
roos (rosa)
de lèste roos
es prima ballerina
gans inne waan,
dans de dans
vanne sjtervende zjwaan.
**
zónnebloom (helianthus)
sjtil
en bewaoge
sjteit de zomer
euvere lèste
zónnebloom
gebaoge.
**
dille (anethum graveolens)
geur van vervlaoge zomertied,
van keuke-iever,
inmaaksjpas,
blomesjerme
die mien hert verwerme,
blomeprach
op riej wie soldäötsjes,
prónkend mit doezjende
geurende zomerzäödsjes.
**
klumhortensia (hydrangea petiolaris)
klumhortensia
klawt zich vas aanne aw moer
greun euverrómpelt.
**
kroednagel (syringa)
wie 'ne feesdaag
blie en mónjig,
aomt ilke zuchske windj
't pure van processe-zónjig.
**
sjtokroos (althea rosea)
siert zach de gevelsjtein,
äöpent zien blomevuuskes
ein-vuur-ein,
van leeg nao hoog,
jao oppe teen
sjteit ze gans greutsj
gezellig awwerwets te zeen.