Column Luc de Rooy: De Bundie Breurs

‘Wie kump het toch dats dich zwa mekkelik in het plat sjrifs?’ wurdt mich waal ’s gevraog. ‘En woorom? Dat leus toch nemes?’ Het zeen gooi vraoge. Want het plat is richtig ’n mònjelinge euverlevering. Wauwele, zaneke, kalle. Dat geit bie ederein good in het plat. Mèr sjrieve, ho maar. (Die lètste twae weurd zouwe de hollènjers zègke en sjrieve; wie zou dat in het Aelses oetgedrök motte waere? Hou mèr, zou neet zwa’n good idee zeen.)

 Plat is d’r veur de wàrre. En dan kump dae zaodreup van enne Luc, nog redelik jònk (in vergelieking mit die angere van Veldeke, in jeder geval – sorrie jònges!), dae woont al jaore neet mjèr in het heuvellènjd en dae sjrif mich hie baeter wie enne aelsenaer es de sajelaire zèllef.

Noe kump het. Ich gaon die ouw luuj die gaer het plat in laeve houte ’s een geheimpke vertèlle. D’r besjteit get nuuts. Gèt wat g’r missjien nwats mjè zult sjnappe. Het hèt tjètte en het geit es volg: emes zit achter enne peecee mit een sjnoor. En dat sjnoor is, de kèns het dich bienao neet veursjtèlle, op een gans anger plek in het lèndj (of: in de waereld, of, en dat kènt ouch: in Maesj) verbònje mit nog zwa eine peecee mit sjnoor. En es dan ein van die twae knuppele achter de kompjoeter gèt tik, dan zuut de angere dat op zien sjerm. (Het is een bietje es in de sjnè d’nne naam pisse, en dat dan aeve later Patrick langslöp en dat dae zaet: ‘hei, Luc, höbs doe dit gesjreve?’ en dat v’r dan allebei sjaopechtig lache.)

Nou ja. Internet en tjètte. Genog gelache.

D’r wurd altied geklaag dat de jeug het Limburgs vergut. En het nwats ljèrt sjrieve. Ich gaon dit taegekalle. Volges mich haet d’r nog nwats zwa väöl jònkvolk in het plat gesjreve. Allein dat zeet geer neet, mopperaere. Géér zeet sjus de cultuurbarbare in dit.

Een anekdote. Missjien gaon v’r weer effe door mit lache. Een jaor of tjèn geleje begoos het internet grwat te waere. Het tjètte kaom op. In die jaore sjprook ich miene naef dèk via Messenger (MSN). En dan sjreve v’r plat. V’r hejje zelfs een sjiek plan opgevat, omdat v’r dat plat sjrieve zwa geweldig vònge: v’r wouwe een fictieve bend oprichte: De Bundie Brothers, of de Bundie Breurs. Geine meziek, mèr waal tekste. V’r hejje ganse albums vol. Titels waore – ich gaef toe – soms surrealisties, soms grof, soms carnavaltesk: ‘Dien hèndjtesj, miene beste vrunjd’, ‘Enne zjiraf es hoesdeer’, ‘Manjana, manjana’ en ‘Gekrölde haore in het doesjpötje’. Aeve fictieve bendlede waore Eddie mit de zjwaer op de rök, Heavy-Mustached Henry en Maria Dolores. En veer twae waore Freddy Benaducci en Johnny Botafogo.

Dit leeg ich neet, es g’r dat soms dènk. Nog altied kieke v’r soms nao de notities oet die jaore en dan ligke v’r döbbel.

Zwa hej de bend d’r oet höbbe kènne zeen. Dat hej gekènd, mèr weite v’r zelf gaar’ts neet. Heavy-Mustached Henry twaede van rechs. Foto geklouwd van de websait van de Sajelaire Aelse. Vènge ze vas neet erg.

Mèr worom höb ich het hie euver. Kiek, ich begoos wats mit het sjrieve van get onzin. Dwadserieuze onzin, waor het veur os. En de jèste tekste die v’r verzònne, woorte via het internet aan mekaar laote laeze. Gelache dat v’r höbbe! En nao jaore internet, get mjè oefening in sjrieve, get inlaeze in de sjriefwies van het Aelses, höb ich zònger dat het opgedrònge woord, volges mich, good plat ljèrre sjrieve.

Kom ich nog effe trök op miene jèste column, wo ich het hej euver de Veldeke-pries. Worom maak g’r het neet ludieker veur de jeug? Missjien mot g’r dat ganse idee van Literatuurpries veur de jeug sjrappe. (Ich bèn d’r zelf nog neet euver oet hwèr, mèr ich breinsjtörm mèr effe get.) Sjrief enne pries oet veur bèste leedteks in het plat. Veur het bèste nonsens-gedich. Veur het bèste geauwhoor. Dao zeen Limburgers good in. De jeug ouch. Ich en miene naef zeker. Veer zouwe gewònne höbbe bie de deilnummers ònger einentwintig, dat weit ich zeker!

Dènk d’r ’s euver nao, leef luuj.

Luc de Rooy (1979) schrif in het Aelses plat. Hae waor twae kjèr genomineerd veur de Veldeke Literatuurpries, en wòn al get verhaolewedstrijde in het holles. Veur Veldeke sjrif ’r op onregelmatige tieje enne column euver in het plat sjrieve.