Krink Ech Startpagina

De website vaan Veldeke Krink Echt is nog “under construction”. Zoe lang dat doort maak Krink Ech gebruuk vaan ‘ne subsite op de website vaan Veldeke Limburg. Dee subsite is inkel in ‘t Echter dialek besjikbaar.

De vereniging “Veldeke Limburg” waerdje in 1920 opgerich óm de volkscultuur in Limburg – en mieë in ’t bezunjer – de Limburgse dialekte laeventjig te haoje. Ónger de perpluuj van “Veldeke Limburg” zeen 13 kringe actief, die – es op zich staondje vereniginge – gaon väör dezelfdje opdrach.

De krink Ech is dao eine van. Ze waerdje opgerich in 1977 en haef óngevieër ‘n 200 leje oet de gemèndje Ech-Zöstere en ómgaeving. Eder jaor waere d’r väör de leje ’n tieëntal aovendje geörganiseerdj róndj – meistes- Limburgse óngerwerpe, wobie de Limburgse taal natuurlik centraal stuitj.Daonaeve weurtj ouch geperbeerdj de luuj boete de vereniging te bereike mit de oetgave van ’n waordebook en ’n taalmethode väör de sjoaljeug, ’t verzörge van ’n waekeliks programma op de locale radio, en ’t jaorliks aanbeje van ‘ne laes- en sjriefcursus.

Verder kènne de toneelvereniginge, de Echter Revue, en de vastelaovesvereniginge raekene oppe belangstèlling en steun van “Veldeke Krink Ech”, ómdet zie ouch op hun meneer ’n belangrieke biedrage levere aan ’t laeventjig haoje van ’t dialek.

Óm ’t gebroek van ’t dialek ónger de jeug te stimulere waere väör de sjoaljeug eder jaor zoawaal in Ech es in Zöstere declamatiewedstrieje geörganiseerdj en is d’r aan de sjoale es hulpmiddel de Echter versie van “Dien Eige Taal” aangebaoje.

Tenslotte kèntj g’r de leje van de Krink aansjete es g’r óm hulp verlaege zitj es g’r bie belangrieke gebäörtenisse in eur laeve get in eur eige taal op pepier wiltj zitte. Op dees meneer wiltj “Veldeke krink Ech” ’n biedrage levere in de algemein geveuldje behoefte óm zich in de stieëds groter waerendje waereldj gebórge te weite in ’n culturele gemènsjap mit ’n eige identiteit wo men zich mit kan vereinzelvige. ’t Dialek is dao de uting van bie oetstek!