Iech bau dir ein Schloss: toneelstök euver de oosteleke mijnstreek

De twie rezjisseurs vaan Toneelgróp Mestreech, Servé Hermans en Michel Sluysmans,  wèlle hun gezèlsjap doelbewus veraankere in ’t Limburgse land en vaan doa-oet de wereld bekieke. Dat höbbe ze al ieder laote zien in ’t succesvol toneelstök “Waar het vlakke land gaat plooien”. Noe riechte ze ziech obbenuits op de oosteleke mijnstreek mèt ’t stök “Ich bau dir ein Schloss” euver ’n architecte die trök kump nao häöre geboortegroond um dao e groet projek oet te veure. Dat projek moot de streek veerdeg make veur d’n touwkoms. Meh op häör “masterplan” zit neet ederein te wachte. Daoneve moot zie ouch aofrekene mèt de demone oet häör verleie, oet ‘nen tied wie ’t de mijnstreek economisch nog veur de wind góng.

Actrice Mieneke Bakker en journalis Wiel Beijer zien allebei aofkomsteg oet de vreuger oosteleke mijnstreek en höbbe hunne geboortegroond zien verandere vaan economisch hart nao krumpregio. Same sjreve zie “Ich bau dir ein Scloss” boe-in ze hun eige observaties en die vaan andere, vaan vreuger en noe, samevoge. ’t Is ’n ode aon e neet vergete verleie en ‘ne gooj nao ‘ne gedruimden touwkoms. Mieneke Bakker späölt de rol vaan de architecte zelf in ‘ne monoloog.  ‘t Stök is vaanaof 19 augustus te bekieke in Heerle in ’t kader vaan Cultura Nova en vaanaof29 november in de Bordehal op ’t Ceramiqueterrein in Mestreech. Kiek veur de speuldata en veur keertsjes op de website vaan Toneelgróp Mestreech