Veldeke Cabberèt veur de 17e kier succesvol

’t Veldeke Vastelaovends Cabberèt vaan Veldeke Krink Mestreech heet de aofgeloupe weke veur de zevetiende kiere opgetrooje in De Bonbonnière. En wie eder jao waor ’t ouch dees kier weer e groet succes. De zaol kós oondermie genete vaan Mister Goodbye, dee de lui die ’t neet mie zien zitte wel evekes nao d’n andere wereld wèlt helpe: boe de reguleer hölpverliening ophèlt dao kump Mister Goodbye in actie, desnoeds mèt ‘nen hamer. Ouch de pastiesj op Fabrizio (Twajn Weijenberg in de hoofrol) mèt ’t nómmer “Knipperleech” kós op väöl applaus rekene. En daan waor dao netuurlek Wil Wintjes mèt prachtege luusterleedsjes meh veural mèt e verhaol euver ‘ne vlöchteling dee mèt zien tentsje op de Vriethof midde in ’t Vastelaovendsgeweld terech kump.

Wijer waor dao nog ‘n Mestreechse versie vaan “De slumstem mins”en ’n hilarische scène vaan twie die al jaore getrouwd waore en ziech klaorbliekelek niks mie te zègke hadde; tot ze daan toch zeker 5 menute völde mèt sjele wawwel, waor dudelek hiel herkinbaar veur de zaol. Bij de traditioneel aofsleting mèt de Haangplek woort vaste speuler Phil Dumoulin, dee vaanwege krenkde neet mèt kós doen, wel gemis meh ’t bestuur vaan Veldeke zörgde gelökkeg veur de nudege fleskes beer op de buun um dat weer good te make. De gezèt De Limburger gebruukde es kop vaan de recensie ‘Vermakelijk vakmanschap’; daan huurt geer ’t ouch ins vaan ‘nen andere. Al mèt al gief ’t Veldeke Cabberèt nog altied gein teikes vaan vermeujdheid of gebrek aon inspiratie en dat maag nao zoeväöl jaore gerös ’n prestatie geneump weure. Op nao de 18e veurstèlling! Want ze höbbe neet veur niks belouf: veer goon door tot v’r debij neervalle.