Lidioom: Aaneinkooksel
Alik, daverwaat, wientemper. Limburgse wäörd. Sjtrónswáörd? Of zien det get van die bezunjer wäörd die veur dreikwaart ’t idioom van ’t Limburgs oetmake (Lidioom). Ich dink det die dao waal biej heure. Waat aevel zien bezunjer wäörd. Wäörd die opvalle, wäörd die uniek zien (waem zaet det?), sjieke nuuj wäörd, belachelikke nuuj wäörd – zoe kan ich wiejer gaon.
Det doon ich neet. Lidioom wilt neet weitesjappelik zien, wiewaal: weitesjap begint mit vraoge sjtelle. Volgende vraog dus: waat zien Limburgse wäörd? Zien det allein wäörd die danig van ’t AN aafwieke? ’t Waord kiksjozerieje beveurbeeldj (miervoud): kleinigheden, snuisterijen. Prachtig waord, mae Limburgs? ’t Zól verhaspeld Frans zien: ein aaneinkooksel van quelque chose (get det, dink), en dan nag get det mit rire (lache) vandoon zól höbbe, wiewaal det neet zeker is. ’t Waord zól Mesjtreechs zien, mae ’t priek aevegood in de waordebeuk van Valkeberg, Groesjelt, Zitterd en ouch op ’t Belsj kump ‘t veur.
Eine Fransoos herkint det waord neet maekelik. ’t Is daoveur gein (ech) Frans, gein AN, euver de päöl höb ich ’t nag neet gevónje, dus höbbe v’r hiej vandoon mit ein ech Limburgs waord. Ao jao? In Remunj en Venlo höbbe ze dao nag noets van geheurd. Laot ligke Mook. Ich maak mich in de wór. Mót mich de vraog sjtelle: mótte wäörd in hiel Limburg gebroek waere veur Limburgse wäörd te moge heite? Wiejer: zien wäörd wie as, de, den, eik, in, op ouch Limburgse wäörd? Wovéur neet? ’t Waord ‘water’: is det vanoet Ingelandj euvergezjwómme? Wie väöl doezjende wäörd haet ’t Limburgs neudig veur ein echte taal te zien? Broeke veer eige wäörd veur euvergezjwómme wäörd?
Veurbeeldj daovan. De gezet hauw weer get te kletstantere euver Limburgers die in ‘t biejzien van Hollenjers of anger angere Limburgs kalle. Neet netjes volges de sjriever, zoe maak me outcasts, en hae vreug dan inins: ‘hoe heet dat in het Limburgs. ‘Eine oët de kas?´Sjtóm vraog. Ich wil aevel mit de Vastelaovendj nao ein eige sjiek waord veur outcast gaon zeuke – veur de sjpas.
Dit is ‘n aoflievering vaan de wekelekse rubriek Lidioom, euver ‘t eigene vaan de Limburgse taol. Al de veurege aoflieveringe kint geer trökleze in eus arsjief.