Os Moddersproak 2009: line up is ronk!

Hans Wertz is 'kieësch op d'r kook'

Heë is de kieësch op ozze toch al zoe lekkere kook van dit joar, mint organisator Jean Frins van 't Dialekfestival Moddersproak 2009. D'r oudste nog actieve troubadour oet de euregio, d'r hoeëgbejaarde Hans Wertz, kiert noa e viedeljoahrhoonget truuk op de Limburgse plenk. Op 3 oktober versjient Wertz op 't Euregio Dialekfestival Os Moddersproak i Viele (Vijlen). Vuur e viedeljoahrhoonget sjtong d'r Wertz vuur 't letst op de plenk i Limburg, merkwaardig genog in d'rzelfde zaal i Viele, Bergzicht, woa heë doe optroan vuur pelgrims op weëg noa Kevelaer. De sjtum va Eupe presenteert nog  ummer e good beloestert twieweëkeliks dialekprogram op d'r radiozender BRF. Hans Wertz (foto BRF) Zieng groetste successen dateren evver alwer oet de joare vieftig. D'r 'kook' deë sjtichting Os Moddersproak heur bezeuker dit joar presenteert, drieëg 't opsjrif  'nostalgie' en dat ziet me truuk i veul traditioneel troubadours mit akoestische gitare. Opmerkelikke name zint doaneever de dialek-vrouw- luus-koere va Kelmis en va Alsdörp, d'r 79-jarige buutereedner va Kirchroa d'r Frans Haselier, deë officieel in 2006 aafsjeed noam mit inne groete revue in 't Parkstad Limburg Theater, mar vuur 't Euregio Dialekfestival éémoalig truukkiert, en d'r Jan Hendriks, zenger en tekssjriever van d'r legendarische groep CARBOON (Witste nog, koempel?), deë éémoalig live optreënt. D'r vuurverkoop sjtart op 1 september en bovendien noe al via 06-40702515. Vuursjtellinge zint op 26 september i Landgraaf (zaal 't Ströatje an d'r Eijgelshovenerweg in Woabich - of Ubach over Worms wie de hollender zaage) en op 3 oktober in 't genumde Bergzicht i Viele. De ovvende sjtarte um 20 oer. Kiekt vuur nog veul mie info och 'ns op www.osmoddersproak.com.  (Nuijenhager plat)