Oetreiking Platbook 3 en Rouksinjale
Jos Stassen, ein half jaor vuërzitter, veuldje zich "zoeë gruëts wie 'ne aap mèt zeve sterte" op de presentatie van de lustrumoetgaaf Rouksinjale van ziene sjrieverskrènk Zitterd-Gelaen. En dao haaj d'r alle raeje toe.
Vuërzitter Lei Pennings van Veldeke feliciteerdje de 5-jaorige sjrieverskrènk en winsdje de sjrievers det "zie zich nog väöl ketele en stimulere" zoje bie 't sjrieve, waat Veldeke den ouch gaer financieel óngersteuntj.
Redacteur Colla Bemelmans van Platbook 3 ging in ziene toespraak effe in op zien selectie: greun en riep steit naeve-ein in dit deil uëver de sjerneermomente Gebaorte en Doeëd van 't laeve. In zien ouge wore d'r sjrievers bie die "nog de ieëste neutjes oefendje, mer ouch die al ein bietje Bach spuëldje". Edere sjriever haaj hae twieë kieër opgenómme in zien book. Saillant detail waas wie hae vertèldje det vanoet de sjrievers-kringe aafgeloupe jaore 10 luuj genomineerdj woeëre vuër en 5 de Veldeke Literatuurpries gewónne haje; en det daovan weer 11 sjrievers ein of mieër beuk in het plat höbbe oetgegaeve. In zien ouge toch ein verdeens van de sjrieverskringe.
Colla Bemelmans
Peter Bokken, de vuërzitter van Veldeke Literair, memoreerdje Jac Nijstens oetspraak "gein topsport zónger breidjesport" woeëmèt hae de oprichting van de sjrieverskringe bie Veldeke bedoeldje en dit nog ins chronologisch oet de deuk deej.
Wim Kuipers, de fervente initiator van de serie Platbook, nuëdje alvas de sjrievers vuër Platbook 4. 't Thema zal zeen Fietserenne (Wielrenne) es aanluip nao de Amstel Gold Race kómmendj vuërjaor in Valkeberg. Hae zag d'r waal bie: "Ich zal streng zeen".
Óngertösse al - mer mieë daonao waas 't woeërd aan de sjrievers zelf: Guus Peters, Colla Bemelmans, Truus de Bruijn-Diris, Jan Feijen, Laurens Savelkoul, Marleen Schmitz, Lilian Steps en Richard Leinders. In eine aafwisselendje mix droge zie vuër oet Platbook 3 en/of Rouksinjale. Woeëbie gezag moog waere det Guus mèt zien lank gedich Laevesmèdde - waat d'r gans oet de kop deej - de loesterieërs raakdje. Colla zooj Colla neet zeen es hae 't zelfdje neet haaj gedaon mèt zien gedich Kiendje. En van Richard Leinders zien Tösje hemel en aerd woor ouch ederein stil.
Thoesspuëler Jan Ridderbeekx zörgdje óngertösse mèt zien leedjes vuër ein gezellige muzikale aafwisseling op deze geslaagdje aovendj.
Rouksinjale € 5,95; bie de leje van de Sjrieverskrènk Zitterd-Gelaen en
Dit en Dat Zuidhof Gelaen.
Platbook 3 "Gebaorte en Doeëd" € 9.90;
uitgeverij TIC Maastricht, ISBN/EAN: 978-90-78407-59-1