Projek "Lichtelijk Gedichtelijk" van 't B.C. Schöndeln in Remunj, aafgeslaote met 'n feestelijk tintje.

Op 18 april woort in de verlengde morgepauze 't projek "Lichtelijk Gedichtelijk" aafgeslaote. Alle lièrlinge die met hadde gedaon ware in de aula aanwezig. De in eur eige dialek geschreve gedichte ware van te veure door de lièrare bekeke en de beste gedichte woorte door 'n jurie beoordeilt. Me kós zeen det d'r hard gewerk waas door de lièrlinge. 't Is prachtig um te zeen waat ós jeug allemaol op pepeer kin zitte. Sómmige gedichte ginge hièl deep. Andere weer lekker luchtig en weer andere raakde de fien snaore van 't taegeswäördige jeuglaeve.

Alles beejein waas 't 'n geweldige 'happening' De veurzitter van de schrièverskrink Midde-Limburg had names dae krink 'ne wisseltrofee beschikbaar gesteld veur 't beste werk in 't dialek. d'r Ware zes genomineerde beej de dialekschrièvers en zeve beej de A.B.N. gedichte.

Ederein, de dialekschrièvers en de A.B.N schrièvers, krege van de veurzitter 'n oorkonde en 'n bukske van Asterix, geschreve in waal zeker tien Limurgse dialekte.

Hae sprook de wins oèt det oèt deze groep lièrlinge 'ne: "IÈRSTE MIDDE-LIMBURGSE JEUG DIALEKSCHRIÈVERSKRINK" zoel
kinne waere opgerich. Hae leet 't aevel aan de lièrlinge zelf euver um zich beej um, of beej eure decaan, te melde.

Van de schrièverskrink Midde-Limburg zoel dae groep alle metwerking beej 't opstarte kriège. Vanoèt 't hoofbestuur van Veldeke Limburg woort door de aanwezige hièr J.Leblanc, sikkeretaris van det hoofbestuur, 't zelfde metgedeild. Ouk vanoèt dae hook woort alle hölp aangeboje. Dit, veur 't B.C. Schöndeln unieke gebeure, zal haopelik door andere schoèle waere euvergnaome. As minse van die andere schoèle waat mièr wille weite wie det allemaol oèt d'n aek gedreid mót waere kinne zeej zich efkes melde beej de schoèldecaan, Dhr. J.A.J. Maas. of beej de veurzitter van de schrièverskrink Midde-Limburg dhr J.Th.H. Maas oèt Melick. 0475-532258. Zeej zien altièd van herte welkom op de schoèl.

De zes dialek genomineerde ware:

Linda Quicken 2V1 Remunj.

Audrey Theunissen 5V2 St.Odiliënberg.

Bart Dohmen 3H3 St. Odiliënberg.

Inge Mestrom 4V1 Mofert.

Joep Suskens 1B7 Mofert.

Laura Leenders 5H3 Remunj.

de zeve A.B.N. genomineerde ware:

Rebecca Schoolmeesters 4V2 Roermond.

Max Meijers 1B11 Herten.

Nardi Beursgens 5H3 Melick.

Jop Theunissen 3H2 Linne.

Lex Stollman 2H2 Roermond.

Benedict Sars 6V1 St.Odiliënberg.

Lynyrd van Riet 5H Monfort.

Oètentelik kreeg Inge Mestom oèt Mofert de wisseltrofee met oorkonde oètgereik.

Vaerder op deze site kint geej de zes dialekgedichte en de zeve A.B.N. gedichte laeze.

Beej de A.B.N. gedichte ging Max Meijers oèt Herte met de ièrste priès d'rvandoor.

Jan Maas. Veurzitter van de Midde-Limburgse dialekschrièverskrink Echt.