Lidioom: Ziewaeg ingesjlage

Twie waeke gein Lidioom. Waat is gaonde? Neet väöl. Ich kan det zoe verduutsje: ich zag det Lidioom waal klaor woor, aaf, ’t belangriekste gezag. De waek daonao begós ich in de Middeliewe, mit ’t Egidiusleed en Suster Bertken. Dao woor nieks Limburgs aan. Begienke Bertken laefde in Utrecht. Ich vónj häöre regel Ic was in mijn hoofkijn om cruyt gegaen prachtig klinke en vroog mich aaf: klink det zoe sjiek, krek wie ’t Egidiuslied: Egidius waer bestu bleven / Mi lanct na di gheselle mijn / etc. waege die net neet vraem taal?

Det woor eine ziewaeg dae nieks mit Lidioom vandoon haet: wie wäörd klinke, det is sjtiel, sjmaak, aansjtandj desnoods, get wie de reklaam. Ich mós dinke aan de kreet Alles klinkt mooier in het Concertgebouw. Ouch sjete, roop ich dan. Daonao sjoesterde ich wiejer aan ’t plezeer in en mit Oos Taal, ónger de vlag van Lidioom. Ich sjting in ’t veldgewas te natejale (Kirchroas), en geer leept wiejer euver d’n oetgezadde waeg. Mót ich uch trökrope?

Nae, ich loup ei sjtökske mit wies de kruutsing wo pit in zit: Plezeer In Taal. Iers ein vraog aevel: höb ich uch achter gelaote mit de vrees (möt ich hiej get wie bengde verzinne?) det Lidioom gans aafgeloupe zól zien? Antjwaord: jao en nae.

Biej jao: ich vónj det ’t algemein deil van Lidioom vaerdig woor. Ich kan det bewaere wiel ’t gein veurbeeldje en veursjrifte guf. In eine grammatica van ’t Limburgs zien lestig de wirkwäörd weg te laote.

Höb ich dan nieks weggelaote? Zeker. Alleriers oetdrökkinge en sjpraekwäörd. Geweun umdet ze dök neet zoe Limburgs zien. Ich bedoel get wie: d’n appel velt neet wied van de boum. Limburgs? Ich höb waal hampele sjpraekwäörd gevónje die neet in d’n DVD sjtaon (Dikke Van Dale). Daoveur Limburgs? Ich neum: alles haet zien inj, noer de wórs twie (aan alles komt een einde). Allein: die wórs höbbe ze euver de päöl ouch. Wiejer: sjpraekwäörd waere kaum nag gebroek, en Lidioom is veural bedoeld es insjpiratie veur get creatiever, lekker laezende tekste. Zólle oos aafwiekende name dao neet baeter veur zien? Antjwaord kump volgende waek.

Reagere? redactie@veldeke.net of veldgewas@home.nl

 

Lidioom is eus rubriek euver ‘t eigene vaan de Limburgse taol. Alle veurege aoflieveringe zien trök te vinde in eus arsjief.