Veldgewas Moenik: Wim Kallen
Voor meer informatie over Wim Kallen klikt u hier.
De wäörd
es de saxofonis z’n lèste toene
oetblaos euver de straot
haange vlege en mögke
ritmisch sjoonkelend in de loch
de kèrkklok vaan ’t stedsje La Charité
broons zien sleeg
’t weurt ‘ne loemetegen aovend
aon de overs vaan de Loire
de zon zak achter de daker
vaan Salon de coiffure d’Angèle
en vaan Auberge la Poule Noire
de kèrkklok herhaolt eine kier
z’ne zuvere slaag
nao ‘ne ‘plat du jour’
en ‘nen heerleke ‘flan aux myrtilles’
is ’t dessert veur diech
e gediech gesjreve op de moer
vaan modezaak Mercier:
“C’est parfois dans un regard,
dans un sourire,
que se sont cachés
les mots qu’on n’a jamais su dire.”
“Dèks zitte in ‘ne blik,
in ‘ne griemslach,
de wäörd verborge
die me noets heet wete te zègke.”
bij de bar-tabac stoppe oto’s
lui hole sigrètte
speule mèt veer rijkes in de lotto
wèdde op ’t bèste peerd
de saxofonis drink op ’t terras
e glaas rosé
’t bermherteg leve
weurt zoonder haos geleef
in La Charité-sur-Loire
Mei 2023
Zoe vrij wie ‘nen adeleer
bovenop de Roche de Solutré
stoon morbele in de sjrawwe wind
graashalme winke stekkereg
roontelum in ’t landsjap ligke dekes
vaan greun en koperblauw wiegerde
oonder in de weie
hui wie ‘ne gareklos
’t kèrkhof vaan ’t dörp
mèt z’n steine kruzer en tombeaus
oetgehak in prehistorische rotse
maak tot iech bergaof
’t eerds bestoon euverdink
wie de modernen tied te euverleve?
door gewoen aosem te hole
iech dui m’nen tèllefoon oet
bin eve neet geprèsseerd
höb gei program vemiddag
en loup trök nao de rand vaan de rots
wat ’n oetziech
zoe vrij wie ‘nen adeleer te vlege
Mei 2023
De vrijheid is 78 jaor joonk
Teks gesjreve veur Herdinking, 4 mei 2023 Keuningsplein Mestreech
september ’44 woort Wiek bevrijd
door de courageuze seldaote
vaan de Old Hickory devisie
mèt groet gevaar veur ’t eige leve
tot mei ’45 laog Mestreech nog in d’n duuster
de vinsters touwgeplak mèt gezètte
Duitse v1 en v2 bomme zejde doed en verderf
de lui stikde vaan d’n angs
en… kóste d’n naobers wel vertrouwe?
boe haoldeste ’t aovendete vendan?
väöl Joede en aander vijande vaan ’t Derde Riek
waore oondertösse radicaol aofgeveurd
en zoonder compassie umgebrach
op 5 mei ’45 begós ’t veurjaor pas veur de ech
de oonderdukers kaome
oet hun gater en holer gekrope
wittebroed kaom oet de loch gevloge
de lui kóste weer op beter tije hope
de zon straolde zoonder beperkinge
oondertösse genete veer vaan 78 jaor vrijheid
good um dao ederen daag bij stèl te stoon
laot us dees vrijheid voloet apprèciëre
meh laot us deen oorlog noets vergete
en… laote veer altied opkoume
veur euzen evenaoste
Mei 2023
Pottemaan
höb ‘ne lavvabo en wc-pot vaan de Sphinx
de garrantie is oondertösse verloupe
meh dee pot geit al lang mèt
zit wie ‘ne pottentaot op z’ne zedeleer
es iech miech veurzien vaan de gezèt
op dat stökske erfgood installeer
de Sphinx maakde mie
op de vinsterbaank proonke delfsblauw vaze
in mien porseleinkas Mestreechs eerdewerk
de kump, tasse en sjeutelkes
zien allewijl gewèlde brocante
pottemennekes maorde in de atteliers
aon ’t ind vaan de sjiech
bij ’t oetkoume vaan de poort
zaog ’t zwart vaan de wèrklui op straot
bij de Sphinx laog ’t begin
vaan de industrieel rivvelutie in Nederland
de meidskes zónge leveslösteg oonder ’t werk
“Noets geine blozer,
eine oet d’n ove weurt miene maan.”
de pottemaan en z’n vrouw woende
roontelum de Boschstraot in klein kemerkes
de pottemennekeskrenkde regeerde
nao ’n loupbaon mèt zwoer werk
en stöblonge aon ’t ind
had de stad ’n wedevrouw debij
oondaanks de groeten elend
heel de pottemaan op ’t groet febrik pin
heer had gein aander käös en prèsteerde
veur d’n hoegen hood vaan de Regouts,
veur kèrk en vaajerland
de Sphinx heet door al die jaore heer
‘ne zeker welvaart gebrach
de medaaje heet allezeleve twie kante
zoon Eugène Regout zag
“Es neet door de energie vaan m’ne pa Petrus
febrikke in Mestreech waore opgeriech,
daan zouw me ins zien wat ’n ermzaoleg
pläötske Mestreech zouw zien.”
Mei 2023
Rommedoe
veur de cabberètiers vaan noe
besteit gein inkel taboe
’t is e perfietelek beroop
höbs ’n gooj belagde boterham
en weurs geadoreerd
cabberètiers, maan of vrouw
’t zien de clojns vaan de modernen tied
in Mestreech gaof ’t vreuger sjaolcabberèt
toen ’t Stella Maris college verhuisde
góng ’t cabberèt dat jaor neet door
’n aontal lierare pakde de hejs op
en Rommedoe beleefde z’n première in ’78
in de Redót vaan de Bonbonnière
veer neume hun naome
Theo van Aalst (tekssjrijver, rezjiseur),
diva Thei Dols, Irma van Hoof,
Guus Jacobs, Wim Giessen
en vaan Til Maessen woort gezag
“Die höbbe veer vaan de kaffeekrök geplök.”
De dialeklès en ’t Ginneratiekonflik|
zien aonstekeleke sketches, e veurbeeld
Zjezus kump trök bij zien awwers Zjozef en Maria
nao in magisch centrum Jerusalem te zien gewees
en betrejt, es bij merakel, de tummermaanswèrkplaots
z’ne pa is kolereg tot heer alles allein moot doen
Pa: “Dao höbste d’n arties!”
Ma: “En jong, wie waor de reis?
Höbste de aw Maosbrögk gepak,
of mer weer euver ’t water geloupe?”
Rommedoe heet in Mestreech
de deure opegezat veur ‘ne frisse wind
mèt hun lösteg én geëngageerd cabberèt,
dat is oondertösse wel al lang geleie.
Mei 2023
Nachtegaol oet Mestreech
Beppie spoojt z’ch mèt ‘re chauffeur
vaan Eijsde tot de Mokerhei
euveral ligk de roeje luiper oet
zie maak alle fiesneuze blij
vaan lótsjer tot grampeer, vaan grummel
tot bomma, vaan mótstrien tot koejong
joonk en aajd haok in, dans, springk
geit oet z’n daak bij häör konzèrs
zie wèt leefde in eus hart te bringe
door wie ‘ne nachtegaol te zinge
zie heet e wäördsje veur ederein
’t is ’n klein prij (eine meter achenveerteg)
meh ’n groet mónnumint vaan ’t Mestreechs leed
de lekker keers op de Vastelaovendstoert
dee muzikaole klaank, dee sjoene zaank
mèt ‘ne cd vaan Beppie in d’n otoradio
op weeg nao Cannes, Saint Tropez, of Monaco
d’n taar sjuif oonder de raajer door
op dee gansen Autoroute du Soleil
doezend kilometer laank
straolt ’n werm zon oet Mestreech
“Iech bin zoe verleef, hartstikke verleef,
es iech diech zeen, bin iech blij tot iech leef!”
Edith Piaf waor 1.47m
Beppie is groeter
Mei 2023
Oet ’t zuie kump de Maos
de Maos stroump langs Eijsde
en daagstrand Fun Valley
geit in Mestreech
wie ‘ne keelsjeet oonder de brögke door
‘ne roondvaarboot is zoezjus vertrokke
de passageers zwejje nao de lui op de wal
plastic tute drieve in ’t water
de Maos kolk vaan veroontweerdeging
deen aofval heet ze mer te slikke
achter de sluis vaan Hare
ligk moojer Maos in e gerefelek bèd
oontgróndinge en grindwinning
geve häör e breid speulterrein
‘ne jong tóffelt euver de oongelieke kejje
z’nen hoond sjöddelt ‘t water oet z’n vach
graof behaorde rinder zeuke graas
en ‘ne zwaon spiegelt z’ch in e peulke water
aon de Belzje kant trappe fietsers
vaan de veerpoonte euver de Maos
weurt daankbaar gebruuk gemaak
op de oetgestrèkde Maosplasse
vare plezeerbeutsjes en jachte
door de zon verbrande kapteins
stoon hielemaol ‘happy’ aon ’t roor
tege etestied aofmere en barbecue op ’t water
‘ne lap vleis, hamburger, ’n hinnebetske
chille mèt e roséke of ‘nen trappis
ze mage us mörge direk pensionere
’s aovends, nog wijer stroumop
drijf de Maos
nao ’t uterste puntsje vaan de provincie
langs stumme en glinsterleechskes op ’t bat
en meandert door ’t land nao de Noordzie
veer hawwe vaan de Maos
zeile, sörfe, puutsjebaoje, wat nog mie?
lègk d’ch aon de Maos
mèt e book of d’n(e) leefste
Mei 2023
De berekojl
höb ‘ne zwart-witfoto oet de aw does
Max, diech zits póntificaol op d’n vot
Polla, diech steis op d’n echterste pu
geer hojs in ’n depe kojl
de berekojl vaan ’t stadspark
geer loert umhoeg nao de fotograaf
“Kiek ins nao ’t veugelke!
Neet zoe chagrijneg, estebleef!”
klikklak, de zoeväölste foto gemaak
Bèste beer Jo,
‘ne breef veur diech in d’n hiemel
höbs jaorelaank in de kojl gewoend
waors es lèste euver
d’nen dobbelgenger in broons gegote
zit op e benkske oet te puffe
vlakbij ’t aajd hool vaan beton
want de kojl gief ’t nog altied
achter de traanjele ligk e kunswerk euver bieste
die op deze wereld neet mie zien
eweg, verdwene
Jo, d’n evebeeld kiek gegeneerd nao de groond
euver zoeväöl oonrech
soms trappere veer häöm
kiek heer nao de häöfkes vaan Tapijn
zit ‘r te genete vaan ’t oetziech
op ’t greun en op ’t echte leve
dat is beter es ’t tristeg naobedach
aon rundsjes drejje in de kojl
oonder de ouge vaan klein en groete levemekers
die op uuch bere höbbe neergekeke
Compleminte, Jo!
Mei 2023
Oonbewoenbaar verklaorde woening
’n bij zoemp
e blaad ritselt aon ‘ne boum
e peerd hummert bij de smeed
’n hin flaneert op de mèshoup
boerehäöf mèt stalstievele neve de deur
en de kèrk laog in ’t midde
de lieger sjaole op aofstand vaanein
want jonges en meidskes
hure in ’n apaart gebouw
boete ’t dörp deurnehègke en getskes
e peedsje achteraof, nörges naotouw
keuj in ’n wei vol boterblomme
in ’t veld Christus aon ’t kruus
‘Gegroet, Oh Heer, onze enige hoop.’
veer kókkerelde, lete ‘ne wejjer op
späölde naoluiperke roond èllentrikpäöl
mèt wiebelenden dräöj
en porseleine knóppe daobove hoeg
’t spitsoor waor nog neet oetgevoonde
’n bös, op weeg nao Mestreech
dieselde stäöteg door de Dörpsstraot
wat iech m’ch rappeleer:
neve us, ’n oonbewoenbaar verklaorde woening
touwgetummerde deure en raomeop ’t erf woort in november
de slachlödder rechop gezat
|veerse balkebrij dampde|
zomege kortelètte braojde in de pan
naotot de thoesslachter ze werk had gedoon
de stèlte boete es de lui binne zaote te ete
eerappele mèt sajs en altied weer buunsjes
nao ’t ete, plenke op keukesteul veur ’t hoes
’t peerd vaan de mèlkboer
wat oet z’n eige bij de klante stopde
bij kemuniefieste de knijnsbatse
daog vaanteveure in ’t zoer
e kanönneke in de keerseboongerd
tege wouverege spriewe
appellevlaoje veers oet de gleujetegheiten ove
zwalbers acrobatisch vlegend tege zonsoondergaank
’t lievend aon de wasdraod
en bomma maondelaank rouwend in ’t zwart
wie gries is, neve de kleur vaan m’n jäög
’t katheliek verleie
Pukkie is vaanoet z’n hóndskouw
nao de iewege jachvelder getrippeld
kaffee De Keizer is geslote
dao höbbe v’r mèt e flink aongelengk pèlske
vaan hartejaoge en dörpsverhaole genote
Mei 2023
’t Veurjaor
’s mörges bei ’n teske koffie
preuf iech ’t veurjaor
door ’t oetbundeg zinge
vaan de pietekes
de mösje make werkelek
de kachel aon
es iech de tuindeur hielemaol opemaak
en nao boete loup
verwermp de zon de tölpe
en m’n gedachte
d’r kump lankzaam
leve in de brouwerij
iech zeen bleuj aon de buim bei de bure
veur mien neus staon krokusse,
trotse narcisse
’n gans karpèt vergeet-me-nietjes
iech snouf de zeute geur vaan de hyacint
’s middags bei ’t graove in d’n hoof
spei iech in mien han
en steek per oongelök
‘ne vètte piering door
leef dee es twie wörm wijer
of vélt heer ten proei aon
‘ne merel met z’ne gele bek
d’r is volop leve in de brouwerij
’s aovends es ’t wèrk gedoon is
geneet iech vaan ‘ne lentebock
de veuj behaaglek op de poef
radio twie steit aon
kiek,
de zon geit oonder tot mörge
Maart 2021
De slaanke taalje vaan Limburg
mèt ‘nen e-bike in drei len op bezeuk
de start ligk in Selfkant bij ’t dörp Schalbruch
de Westlichste Punkt Deutschlands
ligk um d’n hook
de nums Limburg bij de taalje
en rijs dweers door Zöstere
nao de brögk vaan Mezeik
de maaks ‘ne stop
bij ‘t standbeeld vaan de breurs Van Eijck
geis nao twie Affligem tripel op ‘n terras
goodgemöts deezelfde weeg trök
Zöstere heet bij de Amalberga kèrk
kösteleke relieke en doedskiste
opgeborge in een sjatkamer
’t kèrkplein is zoneuvergote
en d’n accu nog dreikwaart vol
de nums de peedsjes in ’t Iezere Bos
via Isenbruch kumste weer in Schalbruch terech
dao heers aosemstókkende stèlte sjien bedruig,
‘t gief ‘ne beergroethandel dee floreert
wat dat betröf: Im Westen nichts Neues
tien kilometer in vogelvlöch
drei len,
‘n aander meneer vaan hoezer bouwe
drei leveswijs,
drei kier ‘nen aanderen aard,
meh dezelfde groond en tongval.
Februari 2021
In de körf vaan ‘ne lochbal
de greune luiper is oetgerold
de stadstraveerse is oondergrónds verdwene
me löp op die plaots verwoonderd roond
Mestreech twie punt nul beteikent: rös
mamma’s achter kinderkojtse
kinnekes op e fietske mèt ’n oranje väönsje
in plaots vaan oto’s, trucks en bösse
in tiedrouvende files veur ’t stopleech
de stadsingel krijg geine zwarte root
op de vere vaan z’n vleugele
wie sjoen is ’t te zweve in ‘ne lochbal
mèt ‘ne verekieker haolste ’t beeld korterbij
‘Hei woene Mestreechtenere’
zeet e naomsjèldsje neve de deur
höb ’ne wins
lankzaam te zweve
bove de straote, brögke, pleine, de Maos
oondertösse klink pinkspummele
vaan kèrkklokke bove de stad
Juni 2020
Zaolege Keersemes veur ederein
veurgerech:
minestronesop mèt e wölkske roum,
’t is vaan ‘ne witte Keersemes tot iech druim
en vaan d’n os en d’n ezel,
de fezant, de sjroet, de knien
hoofgerech:
bij de wèldragout is cranberrycompot,
wat dink d’n Almachtege vaan eus eet- en drinkgenot?
d’n os en d’n ezel,
de gejzelever, de sjroet, de knien,
’n duuske mèt e seeraod, versjijnt nao ‘t rindsgebraod
d’n os en d’n ezel,
’t kwertelke, de sjroet, de knien,
v’r opene nog ‘n fles wien,
d’n armagnac steit klaor es digestif,
sjoenma is vendaog bezunder aordeg en leef
naogerech:
sjókkelaatmousse, of liever crème brûlée?
bij us in de straot is alles peis en vrei,
d’n os en d’n ezel,
de eendeboors, de sjroet, de knien
de èllentrikke keerskes in de keersboum branne,
veer zinge: ‘Il est né le divin enfant’,
de pelletkachel gleujt content,
veer pakke ‘nen espresso en ‘n pralien mèt keerselikeur,
de keerskrans beweug boete aon de deur
de staar bove Bethlehem straolt veur us allemaol,
veur Joseph en Maria, ’t kinneke Zjezus,
veur de sjieper, ’t sjaop, d’n os en d’n ezel,
veur de fezant, gaasj, kooj, ’t kwertelke,
de eend, ’t wèld verke,
veur de sjroet, de knien en de erm pinhin
24 december 2019
Ode aon ’t Mooswief
iech kiek oet op de merretkraome
mèt Minckeleers es gooje euverbuur
’t stadhoes hèlt m’ch e bitteke oet de wind
‘ch höb m’ne körf mèt moos oonder d’n erm
wie iech nog neet op dee sokkel stoont,
brach iech ederskier ‘n vrach greunte
op de houte krouwkaar
vaan mie dörp nao de stad Mestreech,
alles biologies en oongespote
trouwes, wèt geer:
de jäög vaan noe it bekans gein greunte mie:
achter miene rögk zeen iech
bij frituur Reitz de lui in de rij wachte
op e frietsje speciaol in ’n peppère tuut,
mer zoonder ‘t kleinste bleedsje slaoj debij
jonges, foj…
friet-eerappele zien ech gein greunte!
in Amie heet mooswief Tien vaan Budy
d’r jaorelaank ’n studie vaan gemaak,
zie promoveerde zjus wie iech
cum laude op de ‘slaoj en poor’ academie
veer trokke twie kier per week
vol vertrouwe in euze sjolk te voot
nao de merret in Mestreech
Mooswief waor ’n veurnaom métier
veer waore net zoe bekind
es d’n dokter en d’n oonderwijzer
noe bin iech al jaore mèt pensioen,
meh m’n joonk, gek zusterke hingk
oetgelaote en bretseg
mèt de Vastelaovend aon ‘ne paol op de Vriethof
en drejt mèt häöre derrière in de wind
plezeer make, helop zinge, pèlskes drinke
vaan zondagmörge tot dinsdagaovend laat
houwt zie op de zjiem en steit de stad
mèt häöre zege ram oppe kop
op goonsdag is zie evels neuchter
euver de merret huurt me häör heise stum:
‘Gezón meuzerij!
Boerekuul, roedmoos, sèlderij en
alles veur ‘ne lekkere wortelerats!’
Maart 2019
Dinkend aon de Maos
in Mestreech
zeen iech de Maos
es ‘ne floere,
mazjèstueuze keelsjeet
door zien bèdding goon
‘ne roondvaarboot
veurt nao Ternejje en Luik
de toeriste op ’t dèk zwejje
nao de lui aon de overwal
plestik tute vaan kuipkesjegers
drieve bij de aw brök
de Maos kólk
vaan veroontweerdiging
deen aofval heet ze mèr te slikke
achter de sluis van Borghare
weurt moojer Maos rösteg
en ligk zie in ‘n gereeflek bèd
gebagger en oontgrindinge
gaove häör e breit speulterrein
wèl peerd stoon in ’n gruupke
ruig behaorde oerosse
höbbe veers graas gezoch
de miewe sjriewe in de loch
zwaone spiegele ziech in ‘ne pool water
riviersjölpe kneerse oonder mien sjeun
euver de kejje löp iemand mèt ‘ne hoond,
dee Labrador kets door ‘t water
achter ziene stek aon
daan sjöddelt heer ziech oet
aon de Belsje kant
geit ‘ne fietser hel veuroet
dee stik bij Gäöl mèt ’t puntsje euver
via e peedsje kump heer
op ziene nummerkesweeg
op de Maosplasse
drieve plezeerbeutsjes
e lepke vleis, e kippepuutsje
barbecue op ’t water,
chille mèt e wijnsje
of ‘ne trappis
veer hawwe vaan de Maos
um d’r te vèsse, te picknicke, te leze,
te slaope in de lomer vaan ‘ne boum
veer hawwe vaan de grandeur
en es ’t moot vaan häör gebreke
’t hoegwatergevaor
is door de wèrke einegszins geweke
’s aovends
drijf de Maos staoteg
langs stumme
en leechskes op ‘t bat
Mestreech op koupzoondag
’n iewe aw kèrk
örgelmeziek wejt nao boete
e deenblaad beer, cola
en bitterballe op ‘ne teleur
weurt aon ‘n täöfelke gebrach
bei Derlon klink ‘ne houp gelach
op ’n hoeg otoped passere Chineze
’n vrouw geit wijer häör kemissies doen,
naodat ze ‘ne boetelender
dee z’n kaart stoont te beloere
de weeg nao de VVV heet geweze
iech betaol m’n drènkske en
staon op um eweg te goon
langs ‘t terras vaan kaffee de Comedie
sjroevele toeriste
ze gaon de straote op en aof
’t is hartstikke drök,
euver de köp door de Wolfstraot,
nao de Groete Staat
kom via de Mäönt oet op de Merret
höb zin in ’n frietsje mèt mayonais
en staon eeve later in gedachte
in ’n lang rij op m’n beurt te wachte
op ‘t stupke veur ’t stadhoes
et iech oet de pepèrre tuut
Minckeleers steit op z’ne sókkel te loere
nao al die Hollènders en aander boere
de gaasvlam is oet, neet door de rege
meh vaan gemeintewege
’t versjètsje en de lege puntzak
goei iech in ‘ne drèkbak
en wandel daan nao de Dominicanekèrk
hei ruuks diech geine wierouk mie
tot in d’n hiemel
reike de rèkke vol beuk
op ‘t altaor drink iech ‘ne Spa blaw
en lees in de gezèt die op taofel ligk
weer op straot
tik de greun klok op de Vriethof
de menute ein veur ein eweg
de göthiere vege aofval bijein
stadsdoeve koume
nao e stökske pizza umlieg gedoke
iech prommeneer via de Pletielstraot,
de Moosmerret,
langs de Bijekörf etalaasj
en slaon obbenui de Wolfstraot in
iech kom op ‘t plein
boe iech vendaog al ieder bin gewees
iech gaon de Slevrouwekèrk binne
Slevrouw heet ‘ne glimlach op ‘t geziech
zie bekiek ’t kinneke Jezus
op häören erm,
‘ne gouwe mantel
heet ze um ziech heen gedrapeerd
‘t altaor is mèt trompötblomme verseerd
de bougies walme en verwerme de ruimte
de vlemkes danse in hunne eige kadans
gepak kieke de lui nao Slevrouw
’t geveul dat me hei maag ontvaange
kint me in de binnestad nörges vinde
iech num plaots op de einsegste baank
d’r weure keerskes bijgezat
dit is ’t besjeie stök
vaan de bereumpde Mestreechter geis
wie vins diech miech dat?
Keersmenu
d’n os en d’n ezel
de knien, de sjroet,
de pinhin
veurgerech:
temattesop mèt e wölkske roum
’t is vaan ‘ne witte Keersemes
dat iech druim
d’n os en d’n ezel
e hepke gaajselever,
de knien, de sjroet, de pinhin
hoofgerech:
bij de wèldragout
is dao cranberrycompot
wat dink d’n Almachtege
vaan us goddeloes eet- en drinkgenot
d’n os en d’n ezel
de fezant,
de knien, de sjroet, de pinhin
’t duuske mèt ’t blinketeg seeraod
weurt gegeve nao de rindsbraoj
d’n os en d’n ezel
|‘t kwertelke,
de knien, de sjroet, de pinhin
veer make nog e fles umfietswien ope
de fles armagnac es digestif
steit klaor
d’n os en d’n ezel
‘t wèld verke,
de knien, de sjroet, de pinhin
naogerech:
sjókkelaatmousse, of crème brûlée
bij us in de straot is alles pais en vree
d’n os en d’n ezel
de eendeboors,
de knien, de sjroet, de pinhin
de keerskes in de keersboum branne
veer zinge hel-op:
‘So this is Christmas’,
de pelletkachel gleujt content
d’n os en d’n ezel
de geruikde zalm,
de knien, de sjroet, de pinhin
veer numme e teske koffie
‘ne bonbon mèt keerselikeur
boete beweeg de keerskrans
aon de deur
d’n os en d’n ezel
de knien, de sjroet, de pinhin
de staar bove Bethlehem straolt
veur us allemaol
veur de sjieper, ’t sjaop
d’n os en d’n ezel
veur de de gaasj
de fezant, de kooj
’t kwertelke
’t wèld verke,
de eend, de zalm
de knien, de sjroet,
en de erm pinhin
Café de la gare
diech zits op ’n barkrök
in café de la gare
boe de sanseveria
wach op ‘ne reiziger
‘ne awwe maan
leus de gezèt
z’n vrouw
versjuif de gele ricard-asbak
euver ’t taofelkleid
nao achtere
diech zits op ’n barkrök
in café de la gare
te speule
d’n tied steit hei
werkeloes
al jaore stèl
de patron bringk
‘ne witte en ‘ne roeje wien
aon ’t täöfelke bij de bure
heer löp rakelings
langs hun geslete hunneke
dat wakker sjrik
diech zits op ’n barkrök
in café de la gare
dien vingers
glitse euver de knup
vaan d’n trèkzak
diech zits
op ’n barkrök
diech bis
l’accordéoniste
du café de la gare
diech bespäöls
d’n trèkzak,
achteloos, virtuoos
nostalzjie
en melancholische muziek
smake nao mie
Aon de kös vaan Biarritz
’t is hoegtij
iech staon berrevoots
op ’t strand bei Biarritz
in ’t sjerpe sjölpezand,
tösse stinketeg wrakhout
en plakketege kwalleplaog
un köpsige golf
goejt ziech krechteg veuroet
en störf veur mien veuj
ein aander golf
paajt de granete störmbreker
en dribbelt nao zien ind
‘ne surfer raos op zien breet
door ’t sjoem vaan ‘n volgende golverij,
heer verlegk ziene koers
vaan bakboord nao stuurboord
en huit höl euver tröl aaf nao de horizon
dee röstig ligk te mijmere
in de Golf vaan Biskaje
de rollende golve bringe ’n gedachte:
ouch door land, stad, of wand gesjeie
is de veerte door vrundsjap naobij
op ’t paad in de duine
dat leit nao de witte vuurtore
haol iech zoonder väöl poespas
verweerde stapstein oet hun voge
einmaol ’t paad vaan oonkroed ontdoon
strui iech veur diech
goudsblomme achter miech aon
Maan en vrouw
heer löp es e puiwke
door de binnestad
vaan Mestreech
en kint euver ziechzelf
neet stoppe es heer
‘ne bekinde zuut
z’n mamzèl steit aon zien zij
zie koume regelmaoteg
in de Stokstraot bij Antoine,
de coiffeur createur
en in de winkels vol haute couture
ziene brojne kop
zien opziechtege cravatte
zuus diech vaan wied
zjus wie de bloonte haore
vaan zien fien pupke
häör Kiki Niesten kleiaasj
de bezunder maquillage
es de winkels op zaoterdag slete
daan drinke ze
bij sjinkerij de Bóbbel
‘ne pinot noir,
of ‘ne druge witte wien
es ziene maog
begint te knaoge
it heer unnesop mèt stekbroed
pupke pak e bruudsje gezoond
’n oor later
steit d’r tapas op de tap
heer is neet nej,
en gief nog ‘n rundsje
nao ‘ne pizza quattro stagioni
en vegetariese lasagna
op ‘t Slevrowweplein
stik heer eve later
zien neus umhoeg
in de kroeg
pupke steit mèt dee maan
in ’t midde vaan
die 37 veerkante meter
bij kaffee de Karkol
‘t gleeske Brand beer
galant in zien hand
zie drink gezèlleg
e pèlske mèt häöm mèt
zie nip content aon ‘t gleeske
boe is d’r nog e feeske?
wie ederein wèt
bij d’n Awwe Vogelstruys
de hoeskamer vaan Mestreech
brant laat nog leech
dao weurt ’t leve
tot ’n oor of twie gevierd
wach ‘ns eve…
boe zien de tije vaan
dee coupe champagne in nachkaffee
de Boonte Kooj gebleve?
’t Servieske vaan perlemoer
’t Limoges theeservieske
straolt op de awwemerret
in al z’n sjoenegheid
en fluustert
koup miech
veur e paar euro
iech höb noets ’n dröppel
thee mage oontvaange
iech waor te klein,
te fragiel
veur graof han
s’aovends
aon ’n rauwhoute taofel
in ’t hart vaan de Bourgogne
weure de perlemoere teskes
bij ’n theeceremonie
door begerege lippe
ein veur ein
heppeteg oontmaag
De veer sezoene vaan de leefde
(nominatie Veldeke dialectprijs ‘13)
Veurjaor
iech kin aander dinger, zeet ze
en raap ‘ne steineke op vaan de groond
iech kin aander dinger, zoe es
water nao ‘t meuleraad drage,
sókker geraffineerd
tösse mien vinger laote loupe
iech kin danse, sjanse
en penseekes teikene
mèt ‘n krietsje op ‘ne kloestermoer
in ‘t kampveurke dat smeult en steenk
vèlt ‘n beinao verteerd houtblok um
in ‘ne hevige voonkerege
iech kin water nao de rivier drage,
miene vès sprink oet ziene koomp
zien vreiheid tegemoot
vaanoonder de stein
vèlt ‘n wörmke op de eerd
häöre sjeunsje kump bovenop häöm neer
ze drejt mèt häöre hak en
lègk mèt ‘ne straolende lach
‘n rits witte tan bloet
iech kin aander dinger, zeet ze
en kiek miech astrant aon
mien blood raos door mien aojers
‘t hart boonk tege de ribbekas
‘n riezeling krup
langs miene rögkestraank umhoeg
Zomer
es diech
póddelnaaks op ‘t blommelake ligks
aoseme dien porieje bröl
de kruiege reuk vaan patchouli parfum
diene moond smaak heerlek nao
de perelwitte frisheid vaan Colgate
iech kiek in de pupkes vaan dien ouge
alveures diech die sluts
iech käör diech euver d’ne boek
bewoonder aondechteg
e pluiske in diene navel
en blaos ’t mèt bolle wange weg,
zak wijer umlieg
en blief verpópzak haange
woonderlek,
dee oersprunk vaan de wereld
iech knèj d’n kneeje
puun diech oonder d’n veuj
diech zöchs deep
es diech op ‘t blommelake ligks
in de smaorende zon
es ’n tóng dien zoengrot verkint
danse gazellebein oetein
iech veul de krach vaan de liewin
es iech ‘t gotisch portaol
vaan d’n oonderlief betrej
es ’t gek bies in de leefdessjoet stoet
ontwaak ’n kroonkelende slang
die oongevaarlek is
in de kosmos siddert ‘ne dikke tien
de kater zèt zien tan in ‘ne slanke hals,
heer bit
mèt ‘ne knal,
vèlt de Pietersberg
in ’t Jekerdal
Naojaor
’t regent al twie daog aon ein stök
de blaajer zien oet de buim gewejd
en plakke op de verlaote straot
in vrijheid gevaange geveules
doen miech vaanachter de roet
trökkiere nao d’ne bezwètte oksel
dien euverwónne sjouwers
op ’t Perzies karpèt
mien verlange sjriewt um diene lach
tijdelek veur iewig gebore
wie lang höb iech diech neet gezeen?
veer höbbe us ‘n beriechske gesjreve
diech zouws nog ins langs kome praote
wienie kump ‘t devaan?
zoonder meujte zeen iech diech slaope
neeve diene gerafelde berevrund
‘n aondinke vaan jaore geleie
mèt häöm druimend vaan leefdeszotternij
dien häögenis is es ‘ne spiegel
veur mie geziech
iech höb diech zoe leef gehad
diech waors mien muze
vaan rijm en roemele
iech vraog miech aof:
boe bis diech?
Winter
daon miene jaskraag umhoeg
’t is hartstikke kaajd
sleet mien ouge
en zeen de begreujde oever
vaan us lefelek flejje
wie veer in ‘t graas verbleve
aon de bedding vaan de kalme struim
veer duide us olieneutsjes in de moond
droonke prosecco,
aote greun olieve,
veer dansde roond,
de praddel kaom tösse us tiene oet
veer höbbe toen zoe hevig gepuund
‘ne mins in ‘ne kano vergaot te peddele
toen heer us zaog
zaajt dröppelt noe stèllekes langs mien wang
de liege horizon maak de volle maon
bitterzach es peur sjókkelaat
in dees eigeste menuut zeen iech
‘t vuurroed vaan de zon oplosse
in de koumende kaw winternach
keuj bölke örges,
opgeborge in ‘ne werme stal
ieskaajd water
kabbelt struimaofwaarts
‘ne braosem zwiep mèt ziene start
iech krijg diech obbenuits op mien nètvlies,
dien erm um miech heen geslage
diene heite aosem hiegend
in miene nek
zaod es kaviaar
deeg de roum vaan ledigheid teneet
’t is stèl
d’r hingk ‘ne iele nievel bove ‘t water
wijerop knaog ‘ne haos aon ‘ne tak
d’r löp ‘n sjevraoj euver miene pókkel
bin mien wölle sjerp straffer vas
en loup door mien eige sniespoor trök
vannach,
ben iech bang,
vruis ‘t dat ’t kraak
Rosa waak
Sint Rosa baet in häör kapel
zie sjteit in de ruumte
zie sjteit in häören tied
en wach op waat kómme geit
häör vleugele euver Zitterd gesjlage
zie waak beminnelik
d’n daag nao de percessie
rös de Kolleberg oet
hónderde vuit leipe nao baove
en weier nao ónger
vurige gebede klónke róndjóm de kapel
Rosa haet ze geheurd
de meziek van hermenieje is opgelos
Rosa haet de melodieje geheurd
de wierouk is verwèndj
tösje buim en sjtruukgewas
Rosa haet de gewiede reuk herkènd
vandaag zomert ’t nao
de veugel fluite hun leidje
in de herfsbuim
Rosa heurt hunne zank
zie vuilt de aanwezigheid
van de leger gelaege Kogelvanger
en ‘t Levetenhäöfke
mer kènt ze
vanoet häör blikveldj neit zeen
eine fitser trap veurbie
eine wanjelaer ruip
ziene neit aangeliende hóndj
Rosa kik d’rnao vanoet häör kapel
zie waak ummer
jederen daag, van vruig pès laat
zie waak
jaor in, jaor oet
sjtóf en geis
Wim Kallen / Vertaoling in’t Zittesj: Phil Schaeken
Oktober 2018