Veldgewas Moenik: Jan Maas

Voor meer biografische informatie over Jan Maas klik hier.

Corona leet ós wakker waere
’n neet te zeen klein laevend waeze
greep minse vas en brook eur aaf
smeet alles doorein in eur laeve
juus wie in d’n twieëde wereldoorlog
saoves vanaaf nege oor binne blieve
neet ein jaor maar vief achterein.

Mei 2021

Hald hoeëg waat Limburg is
óg hiele laeve andes geit ’t mis
en ram d’rnaeve
laot óg neet leie door ’n vraemde wies
dan blief ós Limburg ós schoeëne Limburg
veur altied ós paradies.

Februari 2021

‘ne Gruuëtsen Haan

D’n Haan verluus smeis zien vere
löp aevel gruuëts in ’t rónd
de kiepe die um zeen loupe
staeke um vere in zien kónt.

Haenke gruuëts wilt dao niks van weite
rent achter al die vrouwluuj haer
waat meint geej waal dóm Kiepe
d’r is gen plaats mier veur ’n veer.

As ik mich vere op wil staeke
doon ik det waal zelf
waat dach geej…eierliggers
ik lös og alle twelf..!

Februari 2021

Dwarsliggers

As jongere dwars ligge
en allein weej ’t zeen
as die ech dwars ligge
luuster dan.

As ouk de aldere dwars ligge
laot ’t mich weite
as ouk die dwars ligge
gaon ik ’t um pleite.

As d’r maar eine dwars leet
deurt det dök maar aeve
ik bin dan d’n ierste
dae ’t um zal vergaeve

As weej allemaol dwarsligge
is d’r niks te vergaeve
det ieuwige dwarsligge
huurt bij ’t minselaeve

Januari 2021

Taal

’n Taal kint me smeis liere
me kint ’n taal gaon begriepe
um ’n taal te liere spraeke
deurt mier as ‘ne gas waeke.

Spraek de taal van dien moder
hald eur dien laeve lang in iere
um mit eur taal te meuge laeve
is veur idderein ’n kwant gegaeve.

Dinke in dien modertaal
dao-in te kinne vertelle
wao ’t ouk maar efkes kin
’t laeve krieg zoeë ziene zin.

September 2020

mien horloge

goje morge
ouk goje morge
is mien horloge klaor?
morge
oh morge
jao morge
goje morge
ouk goje morge
en wies morge.

Juni 2020

d’n ongenuuejde

Stil kroop hae ós laeve binne
nemes wis waat met um te beginne
’t onbekinde vónd hae kwant
kroop wiejer ging veur genne aan de kant.

Vuuel alde minse meuste ’t bekoupe
alsof zeej minder ware en niet mier mit telde
zónder te bewaege bekeek hae wie zeej ein veur ein
en vuuel te vruug ós ginge verlaote.

De wereld keek schouw um zich haer
genne wis te vertelle, waat noow te beginne
weej woorte wakker en ginge veur efkes begriepe
ós gezondheid is wiechtig
en de res is allemaol beejzaak.

Mei 2020

VASTELAOVEND

Louis Armstrong zag ’t kwant:
“As se mós vraoge waat Jazz is
zals se d’r noeëts achter kómme.”

“Poëzie is det waat dichters schrieve,”
zag Robert Frost wie ze um vroge:
“Waat is poëzie?”

Van ós dialekte maag gezag waere:
“Krieg geej d’r thoes gen gevaord
is ’t neet mekkelik um ze te begriepe.”

Vruueg emes óg: “Waat is vastelaovend?”
Wit geej zeker det dae van ze laeve
gen Limburgse modermelk haet gekrege.

Februari 2020

TOESE

Weej toesde weer ens van ciefers
twieëdoezend en negetien woort
twieëdoezend en twintig
van tendjes deje weej al ierder toese.

Gooj veurnemes dreve weer baove
stoppe met rouke opnie belaove
mouze waal dae veurgebakke verse kraom
kóntent det waal aevel haos gennen aom.

Dae amoniakale stikstóf zit ós aan ’t dinke
juus wie dae co2 det al langer duit
groeëtere boere mage de boere neet waere
kriege hölp um d’n elend weg te kaere.

De alde ónder ós biete op ’n höltje
vuuel werkde d’r mier as viertig jaor
veur ós euverheid ein te zwaor las
beej aldere steit genne veuroetgank vas.

december 2019

Bevrijd

Gebuk gaon ónder ’n vraemp juk
lieje ónder ‘ne vraemde pottentaot
zeen det zelfs eige minse euver loupe
dan jao dan is bevrijd zien ’n zaligheid.

Gebuk gaon ónder ’n vraemp juk
lieje aan hónger en vreejheid in eige land
zeen det veur en nao alles wuurt verneeld
jao dan wuurt bevrijd zien ’n zaligheid.

Gebuk gaon ónder ’n vraemp juk
lieje umdet  vrinde en femielie umkómme
zeen det taegestrieje  neet vuuel help
dan geit bevrijd zien ’n zaligheid waere.

Gebuk gaon ónder ’n vraemp  juk
lieje det ech veur genne good is
wennier d’r van boetenaaf hölp kump
jao dan geis se dich pas ech bevrijd veule.

Juli 2019

18 mei 2019

Waat ware weej weer hartstikke blie
wónne ’t sóngfestival boete Europa opnie
door al ’t teater  d’r veur en d’rum haer
vergoot ik de tekste van al det geblaer

waat gezónge woort had niks um ’t lief
vuuel schrieëfde sprónge en zónge
neet eine in ós moeëje Limburgse taal
zónder haor is ouk ‘ne bums ram kaal

noow maag ós land det gedeuns binnehaole
de vraog  wae geit det oetintelik  besolme
’t schok al rap  ’n kleine  dertig miljoen
veur de meuge kieker verrekkes vuuel poen.

gelierd heb ik van det bielig volkstheater
zörg veur vuuel aafleiing róndum ’t zinge
luuster neet nao al det schrieëve en springe.
waal as se mitduis aevel neet as se wils winne.

Mei 2019

Mien vraog

Véér maart, ’t is alweer ‘ne maond geleje
véér maart, kwame de Cannadeze  mien stad ingereje
véér maart negetieënhónderd vief en viertig
He he intelik ware zeej d’r dan.

Waat meuste weej lang op eur wachte
waat ware weej allemaol blie
wao ware allemaol die pruse zoe rap gebleve
waat mak ’t oet die ware weg.

Waat waas d’r vuuel verrinneweerd
waat schoeën bleujde mien stad weer op
waat ik mich waal al jaore lang aafvraog:
Wao leet in Venlo de VÉÉR MAART-straot en

wae haet heej zitte pitte.

April 2019

Mit doezend wäörd

Mit doezend wäörd is mekkelik te vertelle
wie weej Limburgers ós ónderein verstaon
aevel mit doezend kier doezend wäörd
mótte die van baove de Maas liere um te gaon.
Mit ‘ne gas eigeste modertaalse wäörd
kinne weej Limburgers good veuroet
al trekke andere daobeej dök ’n fies snoet.

Maart 2019

Twieë kier waor

Juus wie Louis Armstrong ens de wieze wäörd sprook:
“As se mós vraoge waat jazz is zals se ’t noeëts liere,” zoe zal ouk de vraog:
“Waat is vastelaovend?”
as antwaord mótte kriege: “As se det mós vraoge zals se d’r noeëts achterkómme.”

Maart 2019

Opnie

De letste snieë is verdamp
de zón haet zien werk gedaon
de temperateur van moder aerd
mak alles wakker waat sluuep.

Buim wies noow kaal en grouw
kriege kleur en kleine knuupkes
waat later waere det blajer en
d’r kómme blome in de struuk.

De dere stoppe eure winterslaop
rekke zich lankoet oet en kieke
mit eur ouge knipperend rónd
’t boetelaeve geit weer beginne.

Idder jaor is det speul te zeen
de neteur duit zien plich opnie
weej kinne d’rvan opaan en
wachte waat de zomer ós bringk.

Februari 2019

Klimaattop

Mit benzien zoepende vlegers
of super de luxe deure auto’s
te voot of mit de fiets neet eine
kómme zeej in eur Par(ad)ies beejein.

Aan mouze mankeert ’t neet
groeëte deur verwermde halle
zaachte passende verkeslaere steul
eine gewoeëne mins zaet eur niks.

Waat eur waal waat zaet zaet ós niks
zeej waere ’t klasjenerend neet ins
wae det oetintelik allemaol geit besolme
weite zeej juus wie de gewoeëne mins.

Februari 2019

Kersvers

Juus gevalle verse snieë
duit alle kleur verbleike
alles wit wie ’n taofellake
witter as snieëwit gif ’t neet.

Schoeën wuurt alles en witter
witter as de was oet de kuup
euver kleure wuurt neet gepraot
neet vraemp  mit kersverse snieë.

Januari 2019

Ós taal

’t Begós mit ‘ne gas dónker klanke
’n wäördbook goof  ’t nog neet
minse kóste allein maar klanke, gen name
idderen daag mier en anders oetgespraoke
eur erm weze döks nao waat gemeind waas
eur stumbend woorte losser
minse kóste mit ander minse klasjenere
‘praote’ hit det sjiek gezag
waat veur geluje weej noow ouk make
in waat veur taal weej spraeke
hure en verstaon kinne weej idderein waal
aevel alles begriepe is ’n gans ander taal.

Januari 2019

D’n euvergank

Ik waas juus aan ‘t letste jaor gaon winne
kin ik weer weer gans euvernie  beginne
die ach hoof ik efkes neet mier te schrieve
wuurt ‘n nege die ouk neet lang zal blieve.

Wie d’n daag zich duit toese mit de nach
de luuj smeis anders zien as me verwach
d’n blauwen hemel gans zwart duit kleure
leef luuj waat geit ós dit jaor weer gebeure.

D’n euvergank, die ós maedjes waal kinne
wao ós mansluuj noeëts aan zalle winne
zoelang Pinkstere nao de Paose blief kómme
vraog ik mich aaf: waat kin ‘t al verbómme?

Allemaol ‘n gezónd 2019 gewins.

31 December 2018

Dialoog

’t Goje sprook taege ’t kwaoje
dink as se waat verkierds wils doon
in ’t vervolg veuraaf ens nao

waoeuver mót ik naodinke
vroog ’t kwaoje vertel ’t rap
ik heb gennen tied

Juus dao mós se ens euver naodinke
zag ’t goje taegen ’t kwaoje
anders kriegs se jaore tied

van wae krieg ik daen tied
vroog ’t kwaoje
wae haet dao zat van

‘ne rechter gif zich en dich
allen tied van de aerd
aevel neet aevevuuel

zoe geit ’t al jaore zag ’t kwaoje
dae rechter krieg ’t meiste
en ’t minste krieg ik

nae zag ’t goje
dich kriegs ’t meiste
dae rechter haet gaar genen tied.

December 2018

Oorlog

Ik slaop en schrik wakker
sirenes make vuuel kabaal
“rap oet bed d’r is bómalarm”
rup miene pap

mien  broor, mien zuskes
allemaol de kelder in
weej verdouwe ós veur de deur

de ierste bóm velt in de Majjem
efkes later ’n fluitend geluud
det sterker wuurt
mam pak de roeëzekrans
sleit ’n kruuts en baejt
Jezus Maria spaar ós.”
de grónd schöd

’t hoes taegeneuver ós
ram in de puin
wae zal ’t euverlaeve
weej baeje ’n roeëzehudje

de Pruse verjage de Ingelse
de sirenes gaon noow efkes kort
weej kroepe oet de kelder
en gaon nao ós bed

pap geit helpe wies middernach
sanderendaags dreej speulkammeräöj
veur altied weg.

December 2018

Gluif mich

As ik alles mót gluive waat ik laes
as ik det alles mót gluive
gluif ik mich zelf neet mier.

As ik ’t wil gluive of neet
allein as ik ’t mót
waer ik verdretig.

As ’t waor is of neet
weej gaon vlege op stroum
vraog ik wae zuut ze heej vlege.

Aevel weej gluifde dökker
det ’t neet kós wao andere aan gluifde
gluif mich maar ’t kump d’r.

November 2018

Niks

As d’r örges waat waar
waar d’r neet niks
anders waar d’r niks.

En as d’r örges waat is
is d’r neet niks
want d’r waar waat.

Niks kin d’r neet zien
as d’r waat is
d’r is dan altied waal waat.

Wao ’n bietje van niks is
is döks waal waat
aevel ’n Bietje van niks
mak van vuuel niks
haos gaarniks.

November 2018

Zónneschien

As ’n sträölke zónneschien
mich verwermp veur aeve
zeen ik al ’t moeëjs op aerd
en kin weer vaerder laeve.

Greujt det sträölke tot ‘n straol
die mich hielemaol duit verwerme
dan broes ik van leefde en gelök
zoel alle minse wille werme.

Laot ik mich door de zón beschiene
wandel ik langs bos of wei
dink ik minse leef doot laeve
maak gennen heibel stop daomei.

Weg met al det gevraegel
det is toch naadje pet
weej wille gennen heibel
dao kint geej gaarniks met.

Augustus 2018

’n Wónder

Mit mien vingers touver ik letters
maak mit eur bestaonde wäörd
al jaore hoesde die deep in mich
passe haopelik in mien nie gedich.

Dök mót ik d’reuver prakkedinke
staon zeej op de riechtige plek
schrief eur nao achter en smeis nao veur
en zuus mien gedich krieg langsaam kleur.

Smeis bin ik mit ’t geschuuf tevreje
aevel smeis ouk hielemaol neet
blief mit die wäörd nog ore schuve
as ’t wäörd weit begint ’t te stuve.

Wuurt nao al det schuve alles röstig
slaon ik mien werk veurluipig op
zien d’r andere zake die mótte gebeure
’n wónder zal mien laeve mótte kleure.

Augustus 2018

Kritju

Kritju waat waas ’t werm
alde minse hadde ’t zwaor
ware det ouk neet gewind
genne dae det mieters vindt.

Kritju waat leje weej zwaor
op de vakantie waas ’t naat
weej vloge hoeëg en wied
wille ós herinneringe kwiet.

Kritju ze kinne mich waat
volgend jaor blief ik heej
slaop in mien eigeste bed
vrief mich in met zónnevet.

Juli 2018

Invölgedich

Ik loup te prakkedinke
euver alles waat nog kump
wie kin ik mich verwaere
taege dae lómperick van…

dae dink allein maar aan zien eiges
verdeent aan waopes ‘ne zwiek
haolt kinder van eur moder weg
dae is niks waerd, nog genne…

Ik zoel van de tores wille schrieëve:
Jaag weg dae vent zoë rap ’t kin.
Dao is niks goods mit te belaeve
van vuuel ielend is hae ’t….

Ós euverheid dans nao zien piepe
knik jao of nae as hae det wilt
ik kin ’t ech neet good begriepe
……  …… .. ……… ……  …….!

Juli 2018

Vreejheid

As ik zoe vreej waas wie ‘ne vogel
vloog ik euveral haer en weer truuk
aevel ik bin zoe vreej wie ‘ne vogel
gaef die vreejheid noeët mier truuk.

D’r ware tieje det ik neet vreej waas
ik neet kós vlege waohaer ik woel
vraemde bepaolde wao ik haer mog
die toch vloge ligge begrave in ’n koel.

Minse van noow mótte begriepe
wae eur die vreejheid haet gebrach
wie zeej die veur altied kinne beware
ozel kump dök in d’n dónker nach.

Mei 2018

De Majjem

Wandelend langs die schoeëne Majjem
kómme allemaol herinneringe in mich op
speulde heej aovende mit mien vrinde
zoot mien gedachte smeis op eure kop.

’t Water kloets taege de steine kaaj op
vrachbuuet zörge veur groeëte golve
bringe ’n bekind geluud veur mich truuk
waer ónder mien jeuggedachte bedolve.

’t Is mieters langs die schoeëne Majjem
’t waas tóf en kwant heej te meuge speule
waat zoel Venlo zien zónder moder Majjem
gaon nao hoes, krieg ’t kald begin aaf te keule.

Op d’n truukwaeg bedink ik mich opens
die Majjem is ’n deil van mich gewaore
haet mich ’n groeët stök op waeg geholpe
blie det ik beej moder Majjem bin gebaore.

Mei 2018

Lierzaam

Is ’t lierzaam um euver al daen ozel efkes nao te dinke.
Mier as 40.000 soldaote begrave allein al in ós Limburg.
Jónges, manne, vaders, opa’s.
Is ’t lierzaam en veur wae.
Waat deje de Vereinigde Naties die zich van alles veurnome wie:
det noëts mier nae ech noeëts mier.
Is ’t achteraaf gezeen toch  neet zoe lierzaam gewaes
en waorte weej smeis weer vergaetechtig.
Is ’t ós um ’t aeve wie weej laeve. Is wiedewegózel veur ós te wied.
En ik, ik blief mich dök aafvraoge: waat heb ik d’rvan gelierd?

4 mei 2018

Smeis

Mei en dan mót me zichzelf verwinne
det doon waat eigelik neet altied maag
smeis mit ’t zalt- of sókkerpötje foetele
aevel niks waat aan dien gewete knaag.

Kleine dagelikse zundjes mótte kinne
waal daonao van veur aaf aan beginne
dich weer vlietig aan dien regels halde
luuj deje waal eiges dae kwats verzinne.

Mei en dan aevel ouk mei en dan neet
smeis is laat juus zoeë link as te vruug
’t is baeter dich aan dien regels te halde
al det foetele wuurt me ouk rap meug.

April 2018

Twieë beejein

Door te zwiege as andere zwetse
stoppe zwetsers dök mit eur gezwets
zwiege zwiegers wies ’t letste
kriege zwetsers neet zó’n vaart.

Luustere blieve nao de zwetsers
vervaeld kieke bevelt eur neet
mit zwiege is dan zat te haole
is wie waat slaagroum op ’n taart.

Februari 2018

Broen

Wind en keld veurbeej
’t is waer haos zoeëwied
kin de wazel boete kwiet

waer veur terrasjeswaer
gaon noow opnie beginne
de zón kleurt mien snoet

pannebeer bringk plezeer
d’n E-fiets oet ’t scheurke
bringk mich euveral haer

idderein zaet gojen daag
kiek noow toch ens dao
mien snoet wuurt broen.

April 2017

Truuk nao aaf

Door te biete in einen appel
van daen boum in ’t paredies
zörgde Eva d’rveur det weej
vuuel elend en óngemaak
in ós laeve belaeve.

As weej mit ós kinnis
d’rveur kinne zörge
det weej alles kinne aete
neet mier krank waere
gen oorloge mier make
gashuzer neet bestaon
soldaote- en plieseminse
thoes kinne blieve
genne mins hoof te paeze
veur zien späön
de aerd stil blief staon
op ’t momint det de zón
ós land verleech en verwermp
daag en nach geliek is
dan… jao dan
kinne weej Eva intelik vergaeve
waat ’t ós haet aangedaon.

Maart 2017

Verkezinge

Me kin euveral in gluive
aevel neet alles is waor.
Waat euver gluive is gezag
haet gluif ik ouk neet altied
de waorheid ós gebrach.

Gluif me niks of gluif me alles
zónder is good te laeve.
De snaore van geluivig zien
waere mit ’t óngeluif verwaeve.

Februari 2017

Dreej faze

Beej ‘ne dreej-fazemotor
kinne de dreej wikkelinge
op twieë menere mit ein
verbónde waere.

Ster- of dreejhookschakeling
juus waat me wilt
juus wao me dae motor
veur wilt gebroeke.

De dreej fase van ’n minselaeve
kint me op dreej menere aansloete
de jóng en de broekbaar aansloeting en
vanaaf dien vieftigste de ónmeugelikke?

Februari 2017

Kersmis

Kersmis zoel ’n fees kinne zien
’n fees veur idderein
veur gezinne, bedrieve
zakeluuj en econome.

Kersmis zoel ’n fees mótte zien
aevel ’t is nog allein ’n fees veur econome
zakeluuj, bedrieve en smeis veur gezinne.

Kermis is pas ech ’n fees as ouk idderein
d’r gelökkig van wuurt.

December 2016

Roukberichte

As wäörd vergaon in klanke
hebbe zinne genne zin
as wäörd allein maar zien te hure
verlere zeej ’t nut van eur begin.

As minse neet mier kinne spraeke
waal praote taege eure mobiel
vraog ik mich dökker waal ens aaf
zien zeej of bin ik allein debiel.

As genne mier duit praote en
allein maar eppkes steure kin
is vruger d’n twieëde kier gebaore
kriege roukberichte ’n nie begin.

Februari 2017

Neet alles

As jónge knöl gluifde ik
waat pap en mam verduutsde
waat pestoeër mich gluive leet
en de broeders kwatsde.

Wie ik alder woort
woel ik nao de missie
woel euveral helpe wao ik kós
aevel neet mien stad verlaote.

Nog waat alder
had ik gaer ’t schoeënste maedje
had ik gaer mien eigeste hoes
aevel gen ummes van wie en waat.

Noow ik de meiste vimme heb gegaete
weit ik det waorheid in wie zek zit
weit ik det schoeënheid vergeit
en neet al waat blink gold is.

Februari 2017

Wäörd

Wäörd klinke
make zinne
wille smeis zegge
taege idder
dae eur huurt

mins vergaet neet
um te laeve
te werke
en leef te hebbe
wie zich det huurt.

Februari 2017

Rap

Lang deurde ’t veurdet kinderbeejslaag
zörgtoeslaag en heurtoeslaag binne ware
same ’n wiechtig deil van vuuël inkómmes
wao aljaors benied nao oetgekeke wuurt.

Ik zoog eur same de kinderbeejslaag
de zörgtoeslaag en de heurtoeslaag
op aldejaorsaovend in de lóch hange
rap vertrokke zeej mit kabaal en kleur.

Aevegood ’n gelökkig en gezónd 2017 gewins.

Januari 2017

Luuster

Wannier ik dich vraog um nao mich te luustere
en dich begins mich raod te gaeve
dan duis se neet waat ik dich vraog

wannier ik dich vraog nao mich te luustere
en dich begins mich te vertelle
waorum ik ’t neet zoeë mót veule wie ik ’t veul

wannier ik dich vraog um nao mich te luustere
en dich dinks des se waat mós doon um
mien perbleem op te losse
dan luuets se mich in de steek, wie vraemp ’t ouk liek

dus astebleef, luuster allein en perbeer mich te begriepe
wils se praote wach dan efkes
ik belaof dich dan mit de hand op mien hert
det ik waal nao dich zal luustere.

Vertaling van strofen uit gedicht van Leo Buscaglia (1924-1998).

2016

‘ne Venlonaer

‘ne Venlonaer wilt zien taal en gewuuentes wegdoon:
dae haet ’n schroef los!
‘ne Venlonaer wilt zien gewuuentes inrule:
dae mót rap nao d’n dokter!
Let op… dae Venlonaer houwt op ’t ind van ’t speul,
duchtig op ‘nen aos!

Naar een vers van Guido Gezelle

2016

Winne

Winne meuste ós atlete
Gold of zilver op zien mins
aan bróns woort neet gedach
winne, woort d’r gezag.

Atlete blieve minse, neet vergaete
’n pienke heej ’n pienke dao
minse van vleis en blood
neet aldaag geit alles good.

Winne rope de klotsplaatuigers
luuj die beej God neet weite
waat d’r aan veuraaf is gegaon
um nao Rio te meuge gaon..

2016

Kiepevel

Juus in slaop gevalle schrik ik wakker.
Rap oet bed d’r is bómalarm, rup pap.
Weej haoste ós en doon ós aan
verdouwe ós veur de kelderdeur.

De ierste bóm velt in de Majjem.
Efkes later ’t geluud van ’n vallende bóm.
Mam pak de roeëzekrans en sleit ’n kruuts
Jezus Maria spaar ós, de grónd schöd.

’t Hoes van de euverbure ram in puin.
Wae euverlaef ’t, weej baeje ’n roeëzehudje.
De Pruse verjage de Ingelse, de sirene geit
weej kroepe weer in bed, pap geit helpe.

’s Anderendaags dreej speulkammeräöj
door oorlog en bómme veur altied weg.
Ik krieg nog altied kiepevel as ik d’raan dink.

Nao 70 jaor kump det smeis weer truuk.
Oorlog en bómme bringe opnie elend.
Minse verlaote eur land in gammele buuetjes
op zeuk nao hölp en ’n baeter laeve.

Zeej loupe wied weg van ’t oorlogsgeweld.
Haope opgevange te waere aevel door wae ?
Haol köp schrieëve zich de kaele schraol
weg met die, neet beej ós.
Ik veul ’t weer, det kiepevel.

April 2016

t Laeve

’t Laeve mich, veur nop gegaeve,
of ik ’t woel woort neet gevraog
kwaam tergend lanksaam veuroet
WOII makde van mien laeve kerboet.

Langer as nege maond gelaege
verkammezäöld woort mienen tied.
Waat deurde det verrekde lang
och waas ik maar neet zoeë krank.

liere, werke verplich beej de piotte
de slaopzak völle op d’n huiberg.
Woort daovan weer anders krank
waat deurde det verrekkes lang.

‘t Kwaam zónder te beschummele
vruike, huuske, buimke, bieësje.
Bin gelökkig al lang neet mier krank
rös mei oet op ‘n bank beej ‘n bank.

Januari 2016

’t Hóngergeveul in ‘t lank

As ik alle reklames, die ik veur
de kersdaag te zeen en te hure
kreeg veur waor had gehalde
had ik zoevuuel te mouze kinne
kriege in allemaol die aet en
oetba(ui)ters zake det ik ‘ne gas
vluchtelinge ’n  ganse waek  aete
zoel kinne gaeve dach ik meinde
ik haopde ik aevel wie ik de proof
op de sóm noom bleef mich nao
aafloup allein nog maar ’n bezeuk
aan de frietkraom euver dae juus
wie vuuel supermerte op ierste
en twieëde Kersdaag aope ware
ik kós met de berapkaart dokke
anders had ik met die zelfde kaart
späön oet de moor mótte haole
um de bus te kinne besolme ik kin
noow det hóngergeveul van die
vluchtelinge waal baeter begriepe.

December 2015

Haop

Kinne gaon en staon
zónder schouw te zien
des se door óngehoebelde
met loeëd wuurs doorboord.

Gaon en staon kinne
waohaer se maar wils
zónder naogekeke te waere
neet achterum hoofs te kieke.

Staon en kinne gaon
wao genne dich verjuueg
dao wil ik veur gaon en
zeker neet veur blieve staon.

December 2015

Intelik

Europa bleef lang slaope
druimde waeke aan ein stök
weggekeke van daen ambras
bezaete van goodkoup gelök

of ’t oeëjt zoel wakker waere
det zoot nog lang in wiej zek
de zieë leet efkes ’n belke hure
beej minnigein verdween ’t hek

de druimers woorte wakker
aan ’t slaope kwaam ’n ind
waat wäörd neet kóste zegge
zag die foto van det verdrónke kind.

September 2015

Weg

Vare zwumme loupe rieje
weg van eige land en hoes
zwumme renne loupe reize
met gen inkel vimke op de voes

renne rieje loupe haope
nao ’n nie belaovend land
alle elend rap vergaete
zörge efkes aan de kant

waat eur leef waas gaer vertoese
weg van oorlog en geweld
keze veur ein baeter laeve
as ’n minselaeve neet mier telt

jaorelank gedoogde idiote
bringe zelde det gelök
wao de minse nao verlange
as zeej waere kaal geplök

rieje renne loupe haope
opgevange wiet van hoes
verlos van allen ambras
weg van ’t crimineel gespoes.

September 2015

Winse

As ’t allein maar
beej winse blief
hoof genne mich
waat te winse.

As ’t allein maar
winse gif
hoof genne mich
waat te gaeve.

Wuurt ’t laeve
allein maar gelaef
wil ik zó’n  laeve
miene zaege gaeve.

Blieve winse allein
maar oetgespraoke
haet genne good
aan ’t laeve geraoke.

Ik wins ’t óg.

December 2014

As

As ’n bord ’nen telder hit
’n vaatdukse schóttelslet
’t huuske d’n eimer
en ’n kónt ’n vot

me miezele zaet
taege zachjes raegene
maar majjeme
taege harde

as me meug is en
oetrös in ‘ne praos
en me zaet ouk nog ens
taege ’t letste oet de kan draos

let dan good op…
en zeker as me smeis
taege  ‘soms’ zaet
me geit fiete as me wegrent

zich ein fim smeert
as me hónger haet
‘nen treuzelaer met aete
‘n fiemelkónt neump en
eiges gekaokde soep
zelf gemak haet
‘t duit duuëje as de snieë smelt
‘t hudje van ’n ei
‘n döpke wuurt geneump

wao watte…?
neet altied watte zien
maar ‘n widvrouw
ouk neet altied wit

miere zeikdieëme heite
me ’n zevezölders gezich
haet as die neet weggaon
‘ne mins dae fioel speult
dermkiedelaer hit

dan mót me zich ech
aaf gaon vraoge
of me neet in Venlo zit

en waere óg beschute met sókkerkäörkes aangebaoje
dan….jao dan hoof geej neet lang mier te raoje!

Augustus 2014

Nae toch

Hojje pap  hojje  mam
kind geneet d’r  noow
maar  ens  good  van
de  hebs ’t  verdeend

vluch  MH-17 vertrek
deure  waere geslaote
motore gestart de reis
vingk aan op waeg nao…

eine gas óngehoebelde
bepaole ’t letste doel
vuuel verdreet en elend
hojje pap hojje  mam.

Juli 2014

As

As dien moderstaal
op dien hert en neet
op dien vel
getatoeërd is kan
geine die oetpoetse.

Oktober 2013

Winter

Wao blief se weike witte snieë
weej weite ech waal wao se bis
hoofs dich neet veur ós te drökke
hebbe dich met Kersmis al gemis

wils se dich aan ós neet tuuëne
bekiek ’t…en gank diene eige waeg
vuuel minse zien dich dankbaar
krege eur stuupke toch al neet gevaeg

Januari 2014

Smeis …

loup ik door de straote
zien die laeg en iezig kald
verlang ik nao wat herrie
herrie… wao ik smeis van hald

loup döks weg van alle ambras
weit mich aeve genne raod
wil wie eine maf gaon schrieëve
hald mich in… mein ’t neet kwaod

ik hald waal van ’t laeve
doon ouk euveral aan met
smeis zeen ik geinen ózel
heb tièd tekort…gaon laat nao bed

bin smeis bedreuf maar meistal blie
heb gelök maar ouk waal pech
bin blie det ik ’t allemaol mitmaak
gluif mich…wat ik óg zeg.

Oktober 2013

Veurbeej

Vekansie veurbeej
zomer neet
mien strandleefde
oet Spanje
kiedelt mien gemood

det lekker snuutje
dae leve mónd
weej vloge same
op det werm strand
de wereld rónd

bin weer thoes
in det kalde hoes
dink aan det snuutje
doon smeis juus
of ik met um smoes

heb genne zin in aete
as ik ’t snuutje oeits
nog zal zeen
dank ik um heejbaove
op mien bloeëte kneen.

September 2013

Druime

Lekker in mien eige
druimend euver vruger
as ik luuster nao
André en zien muziekante
ik laot die rockers
die haevie mettelaers
en al die beerblaozers
die dinke det zeej
meziek make
maar neet vaerder kómme
dan boem boem herrie
in eur waeze

ik geneet van André
ziene meziek
en veul mich daobeej
wie ein kind zoe riek.

Juli 2013

Winter

De wind weit
kloetsend water
is te hure
beej de Majjem

’t veld hagelwit
de straote zien gestruid
binne blieve is ’t beste
dao is ’t werm

sleiende kinder
kómme veurbeej
eine klaats
taege de roèt

twieë groepe
goeëje met snieëbel
nao-ein en hebbe
vuuël spas

me wilt de bel
oèt de waeg gaon
eine gas kriege d’r
eine op eur mörfke

de snieë is weik
wie wiewater
wiedes hae kump
van baove

vaerder gen elend
allein maar spas
twieë jóng kiepe
bringe  verandering

umdet die twieë schrieëuwe
wie ‘n mager vèrke
en rap wegkeitse
lök ’t invrieve neet

’t is aovend gewaore
en mam haet ‘t
mouse vaerdig
“De velle en wies morge.”

eine gas druime dae nach
“Ik waas  beej de winnaers.”
andere: ”Morge winne weej.”
as d’r nog snieë leet.

Maart 2013

Jaomer

Dan is ’t weer aswoensdaag
nae ik gaon neet de teks
van ein van die schoeëne vastelaovesleedjes
oet ’t Venlose Jocusriek euver schrieve
dao blièf ik vanaaf
aevel op aswoensdaag bedink ik mich
det ’t kwante fees veurbeej is
en det ik de meiste tièd weer
met twieë veut op de grond zal staon
ik weer ’n jaor mot wachte
det ik mien vrinde weer ens heb gezeen
ik veurluipig effe gen beer mièr drink
veur zoelang ik det volhald
det ik ‘ne zore hièring neet zal aafslaon
en det ik mich ’t volgend jaor
met vastelaovend weer juus zoe gelökkig zal veule
wie al die andere jaore!

Februari 2013

As

Noe de blajer verkleure
en houdoe zegge
taege eur tek
wuurt de grónd
met ’n gael
blajerdaeke bedek

November 2012

Doeën beejein

Erger besteit neet
doeën beejein
plezeer en verdreet

jónk en fris laeve
haopvol en blie
deurde maar aeve

pappa’s en mamma’s
veurgood in ’n waas
’n printje nog maar
wie eur kiendje waas

weej minse
zalle det noeëjt begriepe
en ik… jao ouk ik
mót d’rvan kriete.

Maart 2012

Vreej

Ederein is vreej
meine weej
me zuut ‘t
of me zuut ‘t neet

aevel

neet euveral
zien minse vreej
kinne döks
neet zegge
wat zeej dinke.

April 2012

Haop

’n Kat juuëg op ein proeëj
maar vrit ze döks neet
of  hielemaol neet op
en noow maar haope
det zal blieke
det die in ’t katshoes
op zó’n kat wille lieke

April 2012

Doeën beejein

Erger besteit neet
doeën beejein
plezeer en verdreet

jónk en fris laeve
haopvol en blie
deurde maar aeve

pappa’s en mamma’s
veurgood in ’n waas
’n printje nog maar
wie eur kiendje waas

weej minse
zalle det noeëjt begriepe
en ik… jao ouk ik
mót d’rvan kriete.

Maart 2012

Twelfdörpertoch

D’r is wat loos in ós kalde land
minse op ’t iès en naeve de kant
Eurocrisis in twieë rundjes veurbeej
laot maar schuve dinke weej

vrere mót ’t niks bespare
schaatse schaatse halve gare
wies se alle dörper hebs gehad
nao ’ne gas börgers lekker zat

laot ’t vrere lang en diek
’t iès mót krake det is pas sjiek
let op ’t is maar eine weet
vergaet óg twelfde stempelke neet.

Februari 2012

Waorum

kinne weej neet ’t ganse jaor
doon wie met de vastelaovend
’t prakkezaere aeve met rös laote
met wildvraemde minse praote

zinge springe en ’n glaeske drinke
aeve neet aan alle ózel dinke
lache zwetse vanónder oet ós liéf
gans gewoeën en neet zoeë stiéf

waorum waorum waorum
waorum is det zoeë slum?

Februari 2012

Käökende boere

As me in ’t laeve
good duit boere
haet me hiel döks
pienke zat
mót me aevel
duchtig käöke
haet me vuuel
van ’t nate vóch gehad

Chineze weite ouk
van wante
as ’t mouze haet gesmak
käöke ganse melodieje
wies det alles is gezak!

Februari 2012

Heb se ’t ouk gezeen

Heb se ’t ouk gezeen
d’n AEX is weer gezak
Wallstreet deej ’t ouk neet baeter
mien aandeile stege genne maeter

hebs se ’t ouk gelaeze
de belasting geit umhoeëg
weej kinne zelf gaon bakke
de  erme hebbe niks te makke

miene mins kin met werke stoppe
hae haet al twintig jaor gewerk
wat hae deej det weit ik neet
vins se det neet sterk!

Aevel toch:   Proos op ’t nieje jaor

Januari 2012

Kerswins

As se aeve kins
duis se ‘ne wins
veur ederein

rónd de kerstied
vlege de winse
nao miljoene minse

in de haop
det ein van die winse
gelök bringk beej
alle minse.

December 2011


Gruuëts

Weej kinne gruuëts zien
gruuëts maar wao-op
op ós wette en ós regels
die stónde weer veurop

de strop woort lanksaam
aangetrókke
’t rech kreeg ziene loup
weej vaegde alle minselikheid
beej ’t graove voel
op einen houp

eine jóng
door zien mam vergaeve
in ós land werm opgegreujd
gein derde  kans
woort um gegaeve

wie dökker in ós wettelendje
breide weej van alles aanein
veur ei bietje leefde aevel
zien weej vuuels te klein

dae kwante knöl
kint noow ver(t)rekke
zien (pleeg)elders
veur schut gezat

ein pertie gewónne
maar ouk verlaore
hadde weej maar mier
Mauro’s in ós land gehad.

November 2011

Klökske

Goje morge
goje morge

is mien klökske klaor
morge

ao morge
jao morge

wies morge dan

goje morge
morge

Augustus 2011


Kortaaf

Geit det
det geit

mót det
det mót

kin det
det kin

waas ’t det
Jao…

Augustus 2011


Dichte vind ik niks

Dichte vind ik niks
al det geriem en gezeuk
wäörd die neet wille
of neet bestaon
ouk neet te vinde
of in lóch zien opgegaon

laot mich maar schufele
ik schrief d’r mich daorhaer
tiep de  wäörd netjes  naevenein
neet ein … nae vuuel mier
laes dan wat ik geschreve heb
douw op delete veur de zoevuulste kier

Juli 2011


En dan…

Tsjernobyl…Harrisburg…Fukushima
staon in ós herses gekrats
foute…ónmeugelik, alles is riechtig.

Tsjernobyl…Harrisburg…Fukushima
‘t ging good, hadde alles in de hand,
krek wie bie ós in ós kikkerland.

Tsjernobyl…Harrisburg…Fukushima
alles wiste zeej d’rvan:
gaot maar pitte, weej lette op.

Tsjernobyl…Harrisburg…Fukushima
bestraold…kepot…wie kin det noow.
De hiere blieve rope: neet in ós land.

Veur zörge is gennen tied. Nog aeve
dan is ’t veilig. Maar wat ós leef is
zien weej waal dan allemaol kwiet.

Maart 2011


Eiges de ker …

Ze zegke det ’t waer verandert
aevel gaeve dao gen raeje veur
en det de Maas meandert
det  ’t  ’s winters kald is zónder veur

ze zegke det de waereld slech is
de minse niks mier doon
de jeug te voel is
aldere lanksaam gaon

ze zegke al … eur hiele laeve
nemes duit mier wat veur nop
kinne det neet snappe
kieke maf oet eure kop

aevel in bewaeging kómme
helpe dao wao ’t kin
de ker eiges vaerder trekke
zeen zeej neet zitte … geit d’r neet in

de waereld zoel sjieker waere
’t laeve mieters zien
alles kwant d’rop staon
verbleike dan dae vale schien.

Maart 2011