Veldgewas Moenik: Marleen Schmitz

Voor meer informatie over Marleen Schmitz, klik hier.

stil laeve

vreug-nao-bèd
pak verkieërdj oet
klaor wakker
vaem ich al waat mót
aan ’ne kitting
óm miene nak

boete is ’t stil
in miene kop roesjt
de daag veurbie
– ouge toe! –
lang genóg
nao de gerdiene gekeke

akelig stil is ‘t boete
altied is waal get
‘ne hónd, ‘ne uul,
‘ne late fietser
‘ne vreuge auto
mer noe is ‘t ram stil

de stiltje doertj wiejer…
en wiejer … en wiejer…
geuf mich pas rös
es ich snap
det de aovendjklok
‘t laeve haet mitgenómme

Januari 2021

Pontianak en Hammerfest

wone in Pontianak,
stèl dich det ‘ns veur
daag wie nach twellef oer
óm zès oer duuster
óm zès oer leech

wone in Hammerfest
stèl dich det ‘ns veur
swintjers branjt de lamp
twieë keer twellef oer
en somers gaaroets neet

wone bie de noordpool
stèl dich det ‘ns veur
dao vruus ’t zeve maondj
en mit vieftieën baove nul
höbbe ze ’n hittegolf

nae, laot mich mer
in Oeësjbik zitte
swintjers bie de stoof
en mit sint-jan
de ganse aovendj boete

Juli 2020

moder Maas

moder Maas
rögkestrank van water
haeltj noord en zuid bie-ein
lik lui en lansaam
in ’t zomerbèd
spoojtj zich in ’t naojaor
hals euver kop
nao de zieë
… moder Maas
soms breid, soms lank
… rögkestrank…

September 2019

Wen de greuj

wen de greuj
lansaam en greun
euver de waereld kruup
veurjaor wintj
van de wintjer
blief mie duuster dinke
achter
wie e vergange slangevel
wen ich dan
de lieëuwerik huuer
kin ich mit
toet aan de ieëste hemel

April 2016

Zonder titel

eindelik ging ich op waeg
nao streke sónger naam
wo miense mutse droge
en wäörd sproke
die ich neet kós verstaon
inne aovend koom ich aan
en ’t raegendje
mer zeuter dan heim

November 2012

Iesveugel

motte iesveugel
ummer mer loestere nao
wintjerkeuninkskes?

es de windj raegent
door de popelierebuim
drieve druime weg

geit de kievit truuk
nao zie vaderlandj
steultj d’r mich de zon

Juni 2012

Traone

op begrafenisse
mót ich hieel dök bäöke
mer pas geleje
biej ’n bao vergaete nich
heel ich mien ouge drueeg

weer heim
’t zwart inne kas
en ’t printje inne doeas
biej det van mam
bäökdje ich veur twiee

Maart 2012

Snieë

vraem aan snieë is
wie zach en dónzig
wie stilkes die vlokke
omlieëg kinne zakke

wo raege klatertj
en onwaer kraak
ligge witte vlökskes
zich langsaam neer
drejje zonger geluid
de waereld in daekes

snieë sjildertj weg
waat liëlik is
maak de waereld vaerdig
om obbernuuts
te waere ontdèk

Februari 2012

Eindelik

eindelik ging ich op waeg
nao streke sónger naam
wo miense mutse droge
en wäörd sproke
die ich neet kós verstaon
inne aovend koom ich aan
en ’t raegendje
mer zeuter dan heim

Februari 2011