{"id":6303,"date":"2017-12-29T16:52:38","date_gmt":"2017-12-29T15:52:38","guid":{"rendered":"https:\/\/www.veldeke.net\/?page_id=6303"},"modified":"2018-01-03T14:01:45","modified_gmt":"2018-01-03T13:01:45","slug":"interview-katja-henz","status":"publish","type":"page","link":"https:\/\/www.veldeke.net\/lb\/interview-katja-henz\/","title":{"rendered":"Interview m\u00e8t Katja Henz, bekind vaan LVK en mie."},"content":{"rendered":"

Dat waor ech e leedsje wat bij miech pasde: de Moeljaan.<\/h3>\n

Dao is inderdaod neet v\u00e4\u00f6l veur nudeg um Katja Henz aon de praot te kriege. Op ein vraog gief ze al gaw drei antwoorde. Dus is \u2019t wel touwpasselek tot zie h\u00e4\u00f6r carri\u00e8re in de vastelaovendsmeziek is begonne m\u00e8t \u201cDe Moeljaan\u201d. Dat waor in 2012 bij \u2019t MVK (Mestreechs Vastelaovendsleedsjes Konkoer). En sinds deen tied is zie regelmaoteg te hure gewees bij MVK en LVK. Meh Katja heet mie in h\u00e4\u00f6re mars es vastelaovendsmeziek. En ze vint \u2019t daan ouch wel ins jaomer tot ederein h\u00e4\u00f6r veural daovaan kint. Want ze zingk ouch ander leedsjes en sp\u00e4\u00f6lde nog neet zoe lang geleie zelfs m\u00e8t in \u2019n serieus soap-serie m\u00e8t es titel PLAT!. Dat optrejje en zinge zaot d\u2019r al vaan jongs aof aon in, liet ze wete.<\/p>\n

Ze is gebore op Annadal, Mestreechser geit bekans neet. Meh h\u00e4\u00f6re pap kaom oet de buurt vaan Monschau, \u2018ne Pruus<\/em>, zoe wie ze zeet. H\u00e4\u00f6r mam is daan weer gebore op de Brandweerkazerne en dat kaom umtot opa brandweermaan waor. Katja heet h\u00e4\u00f6r j\u00e4\u00f6g groetendeils in Amie doorgebrach en woent noe al \u2018ne gansen tied in Hier, umtot h\u00e4\u00f6re vrund daovaandan kump. Meh ze veult ziech \u2019n echte Mestreechse. Al gief ze touw tot h\u00e4\u00f6r dialek neet zuver op de graot is: dao zit get in vaan Mestreech meh ouch vaan Amie en Hier en zelfs get vaan Valkeberg, boe ze op de lieger sjaol heet gezete umtot h\u00e4\u00f6r mam dao oonderwijzeres waor. Ze is dus dreitaoleg opgeveujd m\u00e8t Duits, Mestreechs en Nederlands. Es ze bij h\u00e4\u00f6r femilie in Duitsland waor daan spraok me K\u00f6lsch of \u00d6cher plat al k\u00f3s Katja ziech dao ouch m\u00e8t Mestreechs wel verstaonbaar make. En vreuger woort netuurlek v\u00e4\u00f6l nao d\u2019n Duitse t\u00e8llevisie gekeke, wie dat bij mennege Mestreechter femilie gebrukelek waor.<\/p>\n

\"\"<\/a><\/h3>\n

Gebore lierares<\/h3>\n

Nao h\u00e4\u00f6r middelbaar sjaol is Katja commerci\u00eble economie goon studere. M\u00e8t dat diploma op tes is ze goon w\u00e8rke bij de Rabobank en daonao bij Albert Heijn en daonao kaom ze in de consultancywereld terech. Dat beteikende hel w\u00e8rke, v\u00e4\u00f6l vaan hoes, 3 tot 4 daog per week euvernachte in \u2019n hot\u00e8l en zoe mie. Dat veel h\u00e4\u00f6r wel tege. Ze misde h\u00e4\u00f6r femilie en vrun en kraog zelfs las vaan heimwee. En toen heet ze vaan \u2019t ei momint op \u2019t ander h\u00e4\u00f6r baon opgezag. H\u00e4\u00f6r collega\u2019s snapde niks devaan meh zie waor veerdeg m\u00e8t de consultancy. Lang heet ze neet werkeloes thoes gezete want binne e paar daog kraog ze \u2019n aonst\u00e8lling es docente economie. En zoe kaom ze esnog in \u2019t oonderwies terech oonderwijl ze oets gezag had: dat noets! \u201cMien mam waor basissjaoljuffrouw en iech voont dat aofsjouwelek. Dus iech wouw noets juffrouw weure.\u201c<\/em>\u00a0 Meh noe moot ze erkinne tot lierares zien h\u00e4\u00f6r eigelek op \u2019t lief gesjreve is. \u201cIech vin \u2019t heerlek. En oet wat iech tr\u00f6k krijg vaan lierlinge en awwers bliek wel: iech bin \u2019n gebore lierares.\u201d<\/em><\/p>\n

Vrouwlui, draank en v\u00e4\u00f6l plezeer<\/h3>\n

En \u2019t zinge en actere is ouch get wat h\u00e4\u00f6r is aongebore. Es keend z\u00f3ng ze al in \u2019t sjoalkuurke en doog ze m\u00e8t aon playbackshows. Meh wie ze g\u00f3ng pubere waor dat evekes gedoon. \u201cToen voont iech dat hiel stom allemaol. Dat waor neet \u201cstoer\u201d en iech waor b\u00e8s wel \u2019ne stoere puber. V\u00e4\u00f6l op stap en wieneg doen op sjaol.\u201d<\/em> Wie ze veur de klas kaom te stoon kaom de intresse veur de meziek weer tr\u00f6k en dao k\u00f3s ze veur terech bij \u2019t sjaolcabbar\u00e8t. Daoveur sjreef ze leedsjes en sc\u00e8nes in \u2019t dialek. In dat cabbar\u00e8t woorte eigelek alle taole doorein gebruuk, Nederlands, boetelands en v\u00e4\u00f6l dialek. Al wat zie zelf sjreef waor in \u2019t Mestreechs en dat woort ouch wel verwach op sjaol in G\u00f6lpe: zie waor m\u00e9t \u2019ne collega ein vaan de twie \u201cSjengskes\u201d<\/em> en die m\u00f3ste toch ech \u2019ne Zjenge-act h\u00f6bbe. Vaan \u2019t eint kaom \u2019t ander. Zoe beg\u00f3s ze in Hier m\u00e8t de prizzentatie vaan de Dameszitting. Dat deit ze noe euveregens al bekans 20 jaor dus ze is vaan plan um dao binnekort \u2019ne punt achter te z\u00e8tte: \u201c \u2019t Moot ouch \u2019ne kier good zien.\u201d<\/em> \u00a0Meh de schlager \u201cVrouwlui, draank en v\u00e4\u00f6l plezeer\u201d<\/em> is nog ummertouw \u2019nen hit in Hier.<\/p>\n

Kritisch op h\u00e4\u00f6r tekste<\/h3>\n

Of ze ouch in \u2018t Nederlands zouw kinne en w\u00e8lle zinge? Tot ze dat kint, dat dink Katja wel meh of ze dat w\u00e8lt? \u201cIech h\u00f6b bewus deveur gekoze um Limburgs rippertoire te doen. Iech veul miech dao lekker thoes bij. En dat gief ouch de sfeer vaan Limburg weer. Dao veul iech miech fijn bij. Gez\u00e8lleg!\u201d<\/em> En al heet zie \u2019nen Duitse pap, ze is toch neet vaan plan um nao \u2019t Duits euver te sjakele, wie v\u00e4\u00f6l vaan h\u00e4\u00f6r collega artieste oet Limburg wel doen. \u201cDaan z\u00e8gke ze bij de studio: dat is b\u00e8s raar: d\u2019n einege dee \u2019t in zie blood heet zitte, dee deit \u2019t neet. Meh iech haw miech lever bij \u2019t Mestreechs.\u201d<\/em> En miestal zien dat origineel n\u00f3mmers die ze bringk, m\u00e8t zoe noe en daan ins \u2019ne cover. Soms sjrijf ze zelf d\u2019n teks meh de mieste tekste weure door andere veur h\u00e4\u00f6r gesjreve. Dao is ze wel kritisch bij: \u201cIech moot wel \u2019ne klik h\u00f6bbe m\u00e8t \u2019nen teks. Iech moot \u2019t kinne euverbringe nao de lui, iech moot absoluut ein dem\u00e8t zien. Anders kinste \u2019t neet vaanoet diech zelf zinge.\u201d<\/em> Katja heet d\u2019n indr\u00f6k tot zinge in \u2019t dialek de l\u00e8sten tied e bitsje stabiliseert. V\u00e4\u00f6l artieste sjakele wie gezag euver op Duits umtot dee merret groeter is. Meh Katja heet get minder de behoofte um permanent op \u2019t podium te stoon: \u201cZe mote miech pakke veur wat iech daon. Dat is mien k\u00e4\u00f6s en \u2019t is ouch neet mien boterham netuurlek. Iech w\u00e8l \u2019t veural leuk hawwe.\u201d<\/em><\/p>\n

\"\"<\/a>\"\"<\/a><\/p>\n

Iech spreek mien eige dialek<\/h3>\n

Die k\u00e4\u00f6s heet h\u00e4\u00f6r in eder geval tot noe touw veer kier \u2019n plaots in de finale vaan \u2019t LVK opgelieverd. En koumend jaor hoop zie veur de vijfde kier debij te zien m\u00e8t \u2019t n\u00f3mmer \u201cD\u2019n tied vaan eus leve\u201d<\/em> m\u00e8t meziek vaan Eric Reck en teks vaan Eric Reck en Charel Jeuken. \u2019t Is e welske en dat huurt ouch zoe volgens Katja. E vastelaovendsleedsje is e traditioneel leedsje, \u2019ne marsj of \u2019ne wals. Zie heet daan ouch neet zoe v\u00e4\u00f6l op m\u00e8t vastelaovendsleedsjes m\u00e8t wat zie neump \u201cBoem Boem Boem meziek\u201d<\/em>. \u201cDe huurs eders kier tot de j\u00e4\u00f6g dat zouw w\u00e8lle. Meh de kinder bij miech op sjaol z\u00e8gke: dee meziek hure veer \u2019t gans jaor al, geef us mer carnavalsmeziek.”<\/em> \u00a0Katja is nao eige z\u00e8gke neet hiel erg kritisch drop of de tekste vaan h\u00e4\u00f6r leedsjes wel good Mestreechs zien en of ze hielemaol volgens de regels vaan Veldeke gespeld zien. \u201cIech spreek mien eige dialek en dat is \u2019n combi vaan versj\u00e8llende taole. Dat spreek iech en \u2018t moot mien taol zien. En Limburgs is noe eimaol lekker gevarieerd en dat is ouch \u2019t leuke draon.\u201d<\/em> Meh es \u2019t drop aonkump sjik ze h\u00e4\u00f6r tekste toch nog evekes gaw nao Iwan Bruynzeels (de sikkertaris vaan Veldeke Krink Mestreech) um ze te controlere. Zoe is ze daan ouch wel weer.<\/p>\n

Rol in de soapserie PLAT!<\/h3>\n

Via Veldeke is Katja ouch betrokke geraak bij \u2019n soapserie in \u2019t dialek m\u00e8t es titel PLAT! Ze kraog \u2019n oetnudeging vaan Dwayne Horbach, dee ein vaan de hoofrolle sp\u00e4\u00f6lt, um ins te koume praote. Ze k\u00f3s Dwayne nog vaan \u2019t sjaolcabbar\u00e8t dus dat klikde medein. Heer vroog h\u00e4\u00f6r veur de rol vaan \u2019n docente op \u2018n middelbaar sjaol. In feite m\u00f3s ze dus speule wat ze ederen daag veur h\u00e4\u00f6r beroop deit. Meh PLAT! waor veur h\u00e4\u00f6r wel \u2019n hiel bezunder ervaring. In die serie speult sjaolj\u00e4\u00f6g oet de ganse provincie m\u00e8t en ederein praot in zien eige taol. De mieste hadde wel einege ervaring door optrejjes in musicals of sjaoltoneel, meh \u2019t waore toch allemaol amateurs. En daobij w\u00e8rkde de rezjisseur zoonder vasten teks. De acteurs kraoge \u2019n situatie oetgelag en m\u00f3ste daan zelf hun tekste inv\u00f6lle. Mesjiens is daodoor \u2019t rizzeltaot wel zoe authentiek gewore. En dat lievert d\u00e8ks heftege sc\u00e8nes op boe-in drugs en seks neet weg te dinke zien. Al beweerde Katja nao de premi\u00e8re tot de werkelijkheid op sjaol soms nog hefteger is es wat me in de serie te zien kraog. Wie daan ouch, \u2019t is jaomer tot de serie neet mie bekindheid\u00a0 heet gekrege. De versj\u00e8llende aoflieveringe zien daan wel te bekieke op de Facebookpagina vaan Veldeke Kids meh L1 t\u00e8llevisie zouw ze volgens Katja b\u00e8s kinne oetsjikke. Wee w\u00e8t kump dat d\u2019r oets nog vaan. Es me e beeld w\u00e8lt kriege vaan wat de sjaolj\u00e4\u00f6g in Limburg allemaol m\u00e8t krijg, kint me good terech bij PLAT! En hiel mesjiens kump dao zelfs nog \u2019n vervolgserie aon; meh dat is ouch \u2019n kwestie vaan cent.<\/p>\n

De Medammecour<\/h3>\n

\u2019t Nuiste projek boe Katja bij betrokke is betr\u00f6f de Medammecour. Same m\u00e8t entertainers oet de ganse provincie weurt gew\u00e8rk aon \u2019n veurstelling die begin 2018 in bekans alle groete theaters in de provincie geit speule, vaan \u2019t Theater aon \u2019t Vriethof in Mestreech, tot aon de Oranjerie in Remund, en de sjouwburge vaan Weert en Sittard, Heerle en Kerkraoj. Nog neet zoe lang geleie traoj de Medammecour nog op in de Bonbonni\u00e8re en in alderhand gemeinsjapsz\u00e4\u00f6lkes meh dat is verleien tied. Marc (Hermans) en Joost (Meijs) vaan Ummer d\u2019r Naever zien nog altied de kaartr\u00e8kkers. Vaan Katja weurt verwach tot ze \u201cech Mestreechs\u201d<\/em> praot. Dat is soms wel en bitsje echter Mestreechs es ze ziech zouw winse meh t\u00f6sse al die ander dialekte moot \u2019ne Mestreechteneer netuurlek wel droet springe. Aonvaankelek zouw ze \u2019n sc\u00e8ne doen m\u00e8t Thei Dols meh \u201cTheike\u201d<\/em>, wie Katja h\u00e4\u00f6m neump, heet mote aofz\u00e8gke. Dat spit h\u00e4\u00f6r wel want ze had ziech drop gespits um same te speule m\u00e8t ein vaan h\u00e4\u00f6r j\u00e4\u00f6ghelde. Ze k\u00f3s vreuger alle tekste vaan Rommedoe compleet vaan boete. Noe h\u00f6bbe ze de sc\u00e8ne zoe umgebouwd tot ze toch m\u00e8t Thei samesp\u00e4\u00f6lt, ouch al is heer fysiek neet aonwezeg. Dat geit get weure!<\/p>\n

De Limburgse taol maag neet verlore goon<\/h3>\n

\u2019t Zal wel dudelek zien tot de Limburgse taol Katja aon \u2019t hart geit. Ze moot daan ouch neet draon dinke tot die zouw goon verdwijne. En ze zal alles perbere um draon bij te drage tot dat neet geb\u00e4\u00f6rt. \u201cDat zouw toch zun zien. Die taol huurt bij eus cultuur. Dat zien veer en dat huurt bij Limburg en dat huurt bij us.\u201d<\/em> Ze kint ziech daan ouch gifteg make euver \u2019t feit tot de Friese taol wel \u2019ne besjermde staotus heet en \u2019t Limburgs neet of minder. Meh ze h\u00e8lt gooje mood want ze m\u00e8rk tot ummertouw mie lui \u2019t belaankriek vinde tot hun kinder in \u2019t dialek weure groet gebrach. Vaan oet h\u00e4\u00f6r ervaring es lierares kint ze zegke: \u201cIech m\u00e8rk gei versj\u00e8l t\u00f6sse kinder die in \u2019t Nederlands zien opgegreujd en die met dialek zien opgegreujd. De oontwikkeling vaan d\u2019n herses heet naomelek neet te make m\u00e8t watste spriks meh totste spriks. En totste kinnes tot diech numps en diech oontwikkels. Daan kump de res vaan zelf, ofste noe in \u2019t Mestreechs of in \u2019t Nederlands bis opgeveujd.Dat verandert wijer niks aon dien intelligentie.\u201d<\/em><\/p>\n