\u201cWo kumps te vandan?\u201d Waem dees vraog te heure krieg, weurt gezeen en besjtempeld es \u2018angers\u2019 of aafwiekend van \u2019n bepaolde norm. Mien etnografisch \u00f3ngerzeuk in de Limburgse sjtad Remunj geuf aan baeter neet meer te vraoge \u201cw\u00f3 kumps te vandan?\u201d en neet te kalle van \u2018autochtoon\u2019 en \u2018allochtoon\u2019.<\/p>\n
Meertaligheid in Limburg<\/strong><\/p>\n De provincie Limburg weurt d\u00f6ks geassocieerd mit vastelaovend, kattelieke en \u2019t gebroek van dialek en de zaachte g. Mien sjtudie nao \u2019t dageliks taalgebroek van miense in Remunj leut aevel zeen det de provincie, net wie de Randjsjtad, \u2019n gebeed is wo meertaligheid en culturele diversiteit besjteit. In Remunj zeen d\u2019r interessante ontmoetinge en combinaties\u00a0 t\u00f6sse sjpraekers van waat veer zeen es dialek, \u2019t Nederlands, \u2019n mondiale taal wie Ingels en migratie- en mobiliteitstale wie Arabisch en Turks. Daonaeve is d\u2019r een groot versjil t\u00f6sse waat miense z\u00e8gke det ze doon en waat ze werkelik doon; de mit-eigeneer van \u2019n supermert v\u00f3nj det \u2019t veur hem, es Turk, bl\u00f6d is om plat te kalle, maar \u00f3nger mien veldjwerk h\u00f6b ich hem ederen daag dialek heure kalle mit klantje naeve allerlei anger tale.<\/p>\n Autochtoon of allochtoon?<\/strong><\/p>\n Mien \u00f3ngerzeuk gif zo inzich in de menere wo-op miense in Limburg aldaag talig mit ein \u00f3mgaon. Welke talige middele gebroeke ze \u00f3m zich aan te sjpraeke en \u2019t geveul te h\u00f6bbe d\u2019r waal of neet bie te heure op \u2019n bepaolde plek? Dees kwesties zeen wichtig in \u2019n meertalige en cultureel diverse waereld wo-in veer \u00f3s ederen daag bevraoge op basis van taal en cultuur euver waem d\u00e9 Nederlander of d\u00e9 Limburger is en waem neet. Miense zeen in aldaagse en, op \u2019t eerste gezich, \u00f3nsj\u00f6ldige ontmoetinge aan ei sjt\u00f6k grenze aan \u2019t tr\u00e8kke t\u00f6sse \u2018veer\u2019 en \u2018zie\u2019 door talige gebroeke. De besjrievinge van dit zich dageliks treffe lere \u00f3s det ederein zich boetenlands of out of place kan veule, ouch al kump emes (al generaties lang) oet Remunj, Den Haag of Marokko. Zo z\u00f3lle twee mansluuj in mien \u00f3ngerzeuk, \u00a0gebaore in \u2018Holland\u2019, autochtoon zeen, maar ze blieke zich allochtoon te veule in h\u00e4\u00f6r eige landj, in Limburg. Miense zeen ederskeer bezig mit talking in and out of place van zichzelf en angere, z\u00f3nger te kieke nao h\u00e4\u00f6r gebaorteplek of achtergr\u00f3ndj en waat of wie ze kalle.<\/p>\n Wo kumps te vandan?<\/strong><\/p>\n De vraog \u201cwo kumps te vandan?\u201d zaet daor\u00f3m neet v\u00e4\u00f6l en zit emes weg es boetesjt\u00e4\u00f6nder dae d\u2019r neet bie heurt, ouch al veult deze persoon juus \u2019t taegegesjt\u00e8lde. De veldjwerkbevinjinge oet Remunj laote zeen det geveules van d\u2019r waal of neet bie heure sterk aafhange van de plek wo veer op det ougeblik zeen. Dit maak terme wie autochtoon en allochtoon willekeurige containerbegrippe die miense beperke en gein inzich gaeve in de werkelike ervaringe en praktijke van luuj.<\/p>\n \u2019t Feit det emes d\u2019r \u2018angers\u2019 oetzuut of boete Limburg gebaore is, wilt neet z\u00e8gke det deze persoon gein dialek sjprik. De vraog \u201cwo kumps te vandan?\u201d of \u2019t label \u2018allochtoon\u2019 kan dan ouch \u2019n pienlike ervaring oplevere. Ich pleit d\u2019r daor\u00f3m veur det veer bie kinnesmaking mit noew miense aope zeen door eers te vraoge waatver taal wae k\u00f3nne kalle in plaats van medein Nederlands, Ingels, dialek of w\u00e8lke taal dan ouch te keze.<\/p>\n