Aester Aovondj

Wie väörgaonde jaore zeen w’r es leje van Veldeke Krink Ech weer oetgenuuedigdj väör de speciale seniore-aovendj van de vastelaovesvereniging “De Aester”. W’r kènne det tót ein van de tradities bönne oos vereniging raekene. Dao zeen ’n aantal raeje väör. Op de ieëste plaats waardere weer es Veldeke es anger vereniginge get róndj dialek organisere en prestere. Dao zeen w’r den gaer bie. Daonaeve wete de troew bezeukers van deze aovendj waat ze kènne verwachte: ‘ne geweldige aovendj mit ’n sjoan programma mit väöl artieste.

Zoa zoewe weer noats ‘ne eige carnavalsaovendj kónne organisere en zeker neet väör die minimale biedrage van € 6,50 (introducees 7,50 euro). Dit jaor mit artieste wie buuteredners Peter Vaassen en Berrie Knapen. En verder Domm en Dööl, Ivo van der Bijl en Ronald en Carien.

Óm same van dae sjoane aovendj te kènne genete, hoof g’r uch allein mer oppertied (uterlik op 12 januai) aangemeldj te höbbe mit ’t breefke oet ’t Veldeke Bekèt. Väöraaf betale op ’t bekèndje banknummer is nuuedig. Introducees zeen ouch welkom es geer ze opgaeftj. De toegangskaarte krig g’r de betreffendje aovendj bie d’n ingank van Royal.

Mer lètj op! D’r waere gein plaatse gereserveerdj. Väör ’n gooj zitplaats zótj g’r dus op tied dao mótte zeen. De zaal is aope vanaaf 18.15 oer. Haopelik zeen w’r ós op 25 januari 2017 väör 19.00 oer in de hal van Royal oppe Pejjerstraot.