Kajee: Muuskes

Bön ich get begós: muuskes zien sjpruutjes, zag ich vurge waek. Nae – liert  me mich: maedjes. Wiezoe? Sms-taal van sjtröbbante? In Twente en hiej en dao in Brabantj zólle musjes, klein mösse dus, meuskes heite; van mus = meus? Prima, mae dit is wie ich al zag gein echte taalrubriek. Ich höb ’t euver wäörd die Oos Taal rieker kónne make.

Euver daoveur nao ’t waord van dees waek: muuskes. Klein muus (die zólle waal evoluere in moeze, helaas), mae lever neet op de bóttram. Good kieke sjreef ich vurge waek: lieke die dinger op muuskes? Nae, en daoveur heite die biej ós: moezekeutelkes. Bietje langer waord, mae wied baeter.

Genóg ziewaeg gehad: de insigste en waore muuskes, die me vreuger veural op jóngessjole zoog, zien: sjpierballe. In ’t Nederlandjs oetgesjtórve det waord, wiewaal de moes van de handj, die verdieking ónder d’n doem, dao danig op liek. Laot die muuskes weer klinke en laeze. Ich verzin: zien muuskes sjoew in de bloes, den nag enneuzeler es ’t ei van ein beginnende pöl. Allei: get groter es ei pruumke.

Februari 2011