Kinderversjes om voor te lezen in het Limburgs

Het gebruik van het Limburgs onder kinderen staat steeds meer in de belangstelling omdat duidelijk is dat het behoud van onze taal bij de kinderen begint. Zo verschijnen er links en rechts tal van voorleesboeken in het dialect. Piet Aben uit Echt had nog wat oude kinderversjes liggen die geschikt zijn om voor te lezen en te zingen (als je de melodie nog kent). Hij zette ze voor ons op een rij en wij bedanken hem daarvoor.

Höbs se doos?

Weer kome bönne, nao ’t ravotte
Sven, Daphne, ich en Lotte.
“Weer wille get drènke,” zag ich zach
Wètj geer waat de mam toen zag?

Höbs se doos?
Gank nao de Hoos
Dao höbbe ze ’n hundje
Det pisj dich in dien mundje.

t Woor heit
Äöver ’t gezich dreef ’t zweit
En noe get fris! Hads se gedach
Wètj geer waat de mam toen zag?

Höbs se doos?……

Ich haw ’n baan
Kós ’t werk good aan.
Sóms tót deep in de nach en dach
Aan waat de mam den altied zag:

Höbs se doos?…..

Ich haw de haof ’n bäört gegaeve
Det gebäörtj waal èns in mien laeve.
Koom mit ‘ne roaje kop bönne en dach
Aan waat mam den altied zag:

Höbs se doos?…….

De kleine woor gebaore
Bekans mien verstandj verlaore.
Gein beer in hoes, die nach
Wètj geer waat de dokter toen zag?

Höbs se doos?…..

Ich wachdje in ’n café mit miene makker
De kastelein woor nog neet wakker.
M’n woor meug van ’t wachte
Wètj geer waat de klantje toen zagte?

Höbs se doos?….

Ich loog oppe bank en wól get drènke
Begós op mien vrouw te wènke.
Dao koom oet de käöke ‘ne sjaterlach
Wètj geer waat die toen zag?

Höbs se doos?…..

En noe allemaol same:
Höbs se doos?
Gank nao de Hoos
Dao höbbe ze ’n hundje
Det pisj dich in dien mundje.

Höpse paerdje!

Hae zitj bie opa oppe knieje
Op en neer gaon zien bein
Hae geit mit h’m paerdje rieje
Tót plezeer van det klein.

Ieës gans kalm
Mer den: ’t paerdje in galop brènge.
En in zien stöm ‘ne flinke galm
Begintj hae te zènge:

Höpse paerdje mäöle
De köster reej op ’t väöle.
Pestaor reej op die böntje koe
Rieje ze nao de kirmes toe.

Óm ’n zekske haver
Kèntj det paerdje drave.
Óm ’n zekske wikke
Kèntj det paerdje slikke.

Höpse paerdje inne draf
Mörge is ’t zóndag!

Den kómme de here
Mit hun mooie klere.
Den kómme de jufferkes
Mit hun bóntje kufferkes.

Den kömptj Jan de Akkerman
Mit zien paerdje achteran!

En bie “achteran” gaon zien bein
Gans wuud oeterein.
Opa maaktj ’t ech te bóntj
Want dae kleine vèltj haos oppe gróndj.

Den trèktj d’r h’m weer op
Tót baove ziene kop.
Hae zitj h’m weer op zien knieje
En geit nog èns mit h’m paerdje rieje:

Höpse paerdje mäöle
De köster reej op ’t väöle
Pestoar reej op die bóntje koe
Rieje ze nao de kirmes toe.

Óm ’n zekske haver
Kèntj det paerdje drave
Óm ’n zekske wikke
Kèntj det paerdje slikke

Höpse paerdje inne draf
Mörge is ’t zóndag!

Den kómme de here
Mit hun mooie klere
Den kómme de jufferkes
Mit hun böntje kufferkes.

Den kömptj Jan de Akkerman
Mit zien paerdje achteran!

Kiele kiele kiele wens!

’t Kleintje zoot bie opa oppe sjoat
Eindelik woor ’t dao.
Hae woor gelökkig
Vertederendj keek hae d’r nao.

’n Paar maondje geleje gebaore
Zien ieëste kleinkèndj
En hae zoe waal zörge
Det ’t lekker weurtj verwèndj.

Hae aopentj ’n knuusjke
En tiktj op zien hendje
En den zungtj d’r
Väör det kleine ventje:

Hie höbs se geldj
Gank nao de mert
Koup ’n koe
Stök vanne laever
Stök vanne pens
Kiele kiele kiele wens!.

En den sjatertj ’t kiendje
Bie opa oppe erm.
En opa?  Dae veultj zich
Van bönne gans werm

Hae kustj ’t döpke
Op zien köpke
Den paktj d’r weer zien hendje
En zungtj väör ’t ventje:

Hie höbs se geldj
Gank nao de mert
Koup ’n koe
Stök vanne laever
Stök vanne pens
Kiele kiele kiele wens!

Pieër, haot d’n hóndj vas.

De hóndj van oos bure
Dae haet kure.
” ’t Weurtj tied,” zaet buurman Pieër,
“Det ich dem menere lieër!”

Pieër, haot d’n hóndj vas
Det d’r mich neet bitj.
Bitj d’r mich
Ich zèk ’t dich
Hónderd gölje kosj ’t dich.
Pieër , haot d’n hóndj vas
Det d’r mich neet bitj.

Es d’r kömptj aangerendj mit zien groat lief
Staon de luuj stokstief.
Es d’r den ouch nog zien tenj lieëtj zeen
Bibbers se van kop tót teen.

Pieër, haot d’n hóndj vas…….

Blief oet de buurt, waat ich uch zèk
Kóm neet te kort bie ’t hèk.
Probeer gein handj oet te staeke
Den liks se in ’t ziekehoes, väör waeke!

Pieër, haot d’n hóndj vas……

Aaf en toe is d’r gans leef
Es d’r same is mit ’n teef.
En…es d’r get krigtj te aete
Den is d’r zien valsigheid gans vergaete.

Pieër, haot d’n hóndj vas……

En noe gaon w’r same zènge:
Pieër haot d’n hóndj vas
Det d’r mich neet bitj.
Bitj d’r mich
Ich zèk ’t dich
Hónderd gölje kosj ’t dich.
Pieër, haot d’n hóndj vas
Det d’r mich neet bitj!!!

Piet Aben

← Ga terug