21 Fibberwarie: Daag vaan de Moojertaol op L1 Radio en TV

Op zaoterdagmiddag 17 fibberwarie 2024 vierde Veldeke same mèt L1 Radio de jaorlekse Daag vaan de Moojertaol. Henk Hoover besteide oetgebreid aondach aon de Limburgse taol in zie program Plat-Eweg.

En dao-aon veuraofgaond plaotsde Henk vaanaof 14 fibberwarie al fèlmkes op ziene Facebookpagina boe-in kinder vaan basissjaole oet gans Limburg Limburgstaolege gediechte veurdrage.

En de veurzitters vaan versjèllende lokaol Veldeke Kring vertèlle wie belaankriek ’t is tot kinder vaan jongs aof aon kinnes make mèt de Limburgse taol. ‘t Ierste fèlmke, vaan de veurzitter vaan Veldeke Limburg, Reg van Loo, kint geer hei bekieke.

En hei heet L1 nog ‘na kier alle fèlmpkes achterein gezat: klik daoveur hei (eve door de reklaam eweg biete).

Op d’n eigeleke Daag vaan de Moojertaol zelf, goonsdag 21 fibberwarie, heet L1 ouch op d’n tèllevisie aondach besteid aon de Limburgse taol in ‘t program Avondgasten. Geer kint dat program trökkieke door hei te klikke.