Veldeke Missie

(Mestreechs)

‘t Belaank vaan ‘t Limburgs

Dialekvereineging Veldeke beharteg al 90 jaor ’t belaank vaan de Limburgse taol. Veldeke is opgeriech in 1926 in Mestreech, oet zörg um ’t veurtbestoon vaan die taol. De vreis waor toen al tot ’t Limbörgs zouw verdwijne oonder drök vaan ’t Nederlands, wat dominant aonwezeg waor in ’t oonderwies en in de officieel ambte. Noe, 90 jaor later, besteit ’t Limburgs nog, meh ’t gevaor vaan opgeslók te weurde door ander taole (Nederlands, Ingels) besteit ouch nog ummer. Um de Limburgse taol te bewaore, moot ouch noe nog meujte weurde gedoon. Veldeke zèt ziech dao mèt alle moyen veur in. Dat is eus Veldeke missie: ‘t behaajd en bevordere vaan de Limburgse taol. En umtot eus taol oonlosmakelek verboonde is mèt de cultuur boe-in ze gedijt, rekene veer ouch de Limburgse volkscultuur tot eus aondachsgebeed.

Taol verbint

Boeveur vinde veer ’t belaankriek tot ’t Limburgs behawwe weurt? Op de ierste plaots umtot ‘t ’n sjoen taol is, ’n taol mèt ‘ne groete riekdom aon eige klaanke en oetdrökkinge. Op de twiede plaots umtot ’t Limburgs ’n rieke historie heet, mèt prachtege tekste vaan gediechte, proza en leedsjes, boevaan ’t zun zouw zien es die verlore góng. En neet in de minste plaots umtot de Limburgse taol e belaankriek elemint is vaan de identiteit vaan de lui die in Limburg woene en leve. In ‘ne wereld dee ummertouw globaoler weurt is ’t höbbe vaan ’n eige taol en cultuur ’n meneer boe-op me ziech kin oondersjeie vaan de res vaan de wereld. Neet um daomèt ‘ne moer te bouwe um us achter trök te trèkke, meh zjus um die eigeheid te gebruke es verbinding, um us te prizzentere, zoewel binne es boete de provincie. Ouch dat is oonderdeil vaan eus missie: taol moot verbinde en neet oetslete.