Dialekliteratuur

(Venloos)

Dialekliteratuur

’t Schrieve in ‘t dialek levert al ‘ne lange tied tekste op die de literaire beoordeiling good kinne verdrage. Det is al lang véúr d’n tied det Veldeke in 1926 woort opgerich. De Middelieëwse dichter Henric van Veldeke goof ‘t ieërste veurbeeld; zien Sint Servaas legende en ‘t gedich Eneit (Dido en Aeneas) is geschreve in de taal die toentertied in dees umgaeving woort gespraoke. De adellike troubadour en dichter Rudolf von Ems , ±1220 -1254, zei euver van Veldeke: “Von Veldich der wîse man, der rehter rîme alrêrst begann.” Maar ouk in de taegeswaordige tied haet de Limburgse taal genóg literaire hoeëgstendjes opgeleverd. Bekind, maar neet idderein is ’t dao met ins door zien strebant taalgebroek, is beejveurbeeld de Percessie vaan Sjerpenheuvel oet 1931 van Théodore Weustenraad. Veur ein breier euverzich van poëzie en proza in de Limburgse taal kint geej terech bij de Geschiedenis van de literatuur in Limburg.

Schrieverspodium

Veldeke Limburg wilt ‘t schrieve van literaire tekste in het dialek veur oet bringe. Dao zien verscheie ierste traeje veur genaome. Zoeë steit op dees website ’t Sjrieverspodium. Wae poëzie of proza in de Limburgse taal schrief wuurt genuuejd zien tekste op te steure nao de redaksie. Die bekiek ‘t ingezónde materiaal op zien literaire gehalte en beslis det, al dan neet, op dees website te plaatse. Geej hoof ech neet Shakespeare of Goethe te heite um veur plaatsing in aanmerking te kómme maar weej  kieke waal nao ‘t good umgaon mit de Limburgse taal. Ouk as óggen teks neet beloeënt wuurt mit ‘n publicatie krieg geej in idder geval te hure waorum mit ‘ne goje raod veur verbaetering.

Veldgewas

Veldgewas is ‘ne werkgroep met leefde veur de Limburgse poëzie. Weej schrieve op deze website regelmaotig ‘n gedich in ‘t dialek of gaeve teks en oetleg beej ‘n opvallend dialekwaord.  Wae zelf ‘n stökske wilt schrieve kin det steure aan de redactie: Wim Kuipers en Har Sniekers. ‘t Adres is: veldgewas@home.nl Veur ‘n euverzich van alle gedichte  kin geej in ós archief  kieke.

Platbook

Same mit ‘t Huis voor de Kunsten, de Raad voor ‘t Limburgs en de Stichting Lilili guuef Veldeke Limburg regelmaotig ein Platbook oet. Dao in wuurt per ónderwerp verzamelde tekste, gedichte en columns van dialekschrievers oet de ganse provincie gepubliceerd. Ónderwerpe in ’t jaor 2016 zien beejveurbeeld: Grenze, Moeëde en Liere.

Veur ein euverzich van alle 24 wies nao oetgegaeve nummers van ’t Platbook klik geej heej. Ein editie van ’t Platbook kos € 9,90 (excl. Verzend- en administratiekoste) Geej kint ’t Platbook – veur zoeë veer nog neet oetverkoch – bestelle in de baetere bookhandel in Limburg en in ózze Webwinkel. Of ouk via de webshop van de Oetgaeverie TIC.

Webwinkel.

Veldeke Literatuurpries

De Veldeke Literatuurpries is van 1992 tot en met 2013 jaorliks verlieënd aan ‘ne dialektschriever dae oetblink met poëzie of proza in zien streektaal. Kiek veur de winners. Nao 2013 is gekaoze veur ‘ne andere meneer. Vanaaf  2015 wuurt ‘t Veldeke Verhalen Concour georganiseerd. Oet de inzenders waere inkele schrievers veurgedrage, Eur verhaol wuurt opgenaome in ein  beejlage van ‘t jaorbook van Veldeke Limburg.

Sjiek Literatuurpries

In 2018 is veur d’n ierste kier de Sjiek Literatuurpries oetgereik. De pries wuurt oetgereik tiedens ’t jaorlikse Festival Sjiek, det ouk door Veldeke georganiseerd wuurt en noow veur d’n twieëde kier haet plaatsgevónde. De jury beoordeilt um ’t jaor ein Nederlandstalig en ein Limburgstalig werk (proza of poëzie). ’t Nederlandstalig werk deent waal op de ein of andere meneer ( door ‘t schrieve of onderwerp) met Limburg te make te hebbe.

De prieswinnaers ware:

  • 2018: Frans Budé oet Mestreech veur zien Nederlandstalige roman “De dagen”.
  • 2019: Wim Heijmans oet Kerkraoj veur zien Kerkraojstalige bundel “D’r jank van de tsiet”.