Limburgse name

(Venloos)

Limburgse plaatsname

Limburgse staej en dörpe hebbe dök name die aafwieke van de officiële name in ’t Nederlands. Det Maastricht Mestreech wuurt geneump door zien inwoeëners det weite de meiste minse waal. Maar vroog ens nao de Limburgse name van Baarlo (Baolder), Panningen (Kepel) of Heythuizen (Heitse) dan zulle ouk hiel vuuel  Limburgers good nao mótte dinke. Veur idderein dae waal ens twiefelt heejbeej ’n lies van alle Limburgse gemeenten en gehuchte mit zoeëwaal de Nederlandse as de Limburgse benaming. De lies is ingedeilt van ‘t Noorde nao ’t Zuuje.

Limburgse veurname

D’r waas ’nen tied det kinder in Limburg houfzakelik Limburgse veurname hadde en ’t leefs ein stök of dreej waovan Maria d’r döks eine waas, zoeëwaal beej maedjes as beej jónges. Daen tied leet wied achter ós. Alde Limburgse name zoeëas Sjraar, Sjang, Baer, Huub, Sjaak, Wiel, Mie, Gón, Lies, Truuj, Koeëba en Grit, huurs se steeds minder. D’r zien d’r nog waal, maar d’r kómme gen nieje mier beej.

Maar de letsten tied krieg Veldeke weer regelmaotig de vraog of weej genne lies hebbe met ald-Limburgse veurname, umdet aanstaonde elders d’r euver dinke eur kind zó’ne naam te gaeve. Weej hadde nog zó’ne lies ligge oet 2002 en deze zette weej noow maar weer ens op de website. Alfabetisch nao de name van de heilige, wao dees name van aafkómme. Geej kint de lies heej bekieke.