Declamatiewèdstried
(Mofers)
Veldeke Limburg organiseertj aljaors ’ne declamatiewèdstried veur kinjer vanne basissjoeal. In versjillendje laeftiedscategorieë kómme lieërlinge van diverse sjoeale op ’t podium óm ein dialekteks (proza of poëzie) veur te drage. Ein deskóndige jury keus oet de deilnummers ’ne winnieër.
De Finale vanne Declamatiewedstried 2019 vónj dit jaor veure veerdje kieër op rie in DOK6 in Kepel (Panningen). Basissjoealkinjer van groep 3 t/m 8, allemaol winnieërs vanne veurrunj in de kring, zote op zóndig 25 mei mit häör ajers, opa’s, oma’s, breurkes, zöskes, en waem d’r wiejer nag bie huuerdje netjes oppertied inne zaal.
De jury besteit oet: Hortense Brounts, Katja Henz, Anke Peters, Herm Pollux en streektaalfunctionaris Ton van de Wijngaard. De dames en hieëre höbbe ein behuuerlike klös draan óm oet 30 kanjers de alderbäövelstebèste te keze. Winnieërs zeen ’t eigelik allemaol: dees kinjer höbbe de veurrunj in häör eige krink of biebeletieëk gewónne. En det haet ’t moesstil loesterendj pebliek, det ein groeate variatie aan dialekter te huuere krieg, ouch door.
“Dore meneer wo-op kinjer häör gedich laote huuere en zeen, begrieps se-n ’t hieëlemaol”, zaet jurylid Herm. En Katja nuuedig häör oet óm allemaol nao ’t zuje te verhoeze, zoeadet zie ieësdaags bie häör inne brökklas kinne zitte. Ton vintj det de kwaliteit mit ’t jaor enorm stijg en Anke kan zich es aad-winnieërse weer gans inlaeve.
De Winnieërs
Waat ein verrassendje veurdrachte zitte d’rbie. De toekómstige Jocusprins stèltj zich veur, veer huuere wie se es dokter gemaekelik € 50,- kins verdene, wie ’t klink es se rammels vannen hónger, wie geweldjig se dich kins veule es nemes kiek, det ein windje toch ‘puur natuur’ is of wie se dich veuls es d’r nemes plat taenge dich kaltj.
Tiedes ’t juryberaod zingk Jelke Schijlen oet Mestreech veer leedjes, wobie ouch ’t winnendje songfestivalleedje ‘Arcade’ van Duncan.
Aansloetendj maak juryveurzitte Hortense de oetslaag bekindj. “Alle kinjer höbbe ’t supergood gedaon, mer sómmige hawwe juus nag get extra’s, wodoor zie ei paar puntjes mieër höbbe gekrege.”
Groep 3/4:
1. Freek Swiatalski oet Zöstere mit ‘Is mich det sjrikke’
2. Emmeline Verweij oet Tegele mit ‘Wat ich later waere wil’
3. Yentl Moonen oet Ni-jwieërt mit ‘As nemes kiêktj’
Groep 5/6
1. Mirte Pustjens oet Roastere mit ‘Eine wendj’
2. Jip Haagen oet Kirchroa mit ‘Went jinne kiekt’
3. Julia Silkens oet Remunj mit ‘Rammele van de hónger’
Groep 7/8
1. Bente Selder oet Heële mit ‘D’r hobby’
2. Evena Kraanen oet Zöstere mit ‘Nemes kalt plat taege mich’
3. Thijmen Höppner oet Ni-jwieërt mit ‘Rommel’.
Veur dees nege kinjer guuef ’t eine prachtige Veldeke-trofee. En alle deilnummers gaon heives mit ein sjoean oearkónde en ’n bidon mit ’t Veldeke-logo. Volgendj jaor zeen veer häör gaer trök.
Veur ein foto-impressie vanne finale 2019, klik hie. De foto’s zeen gemaak door Hans Simons en Lia Jans-Linssen.