Declamatiewèdstried

(Mofers)

Veldeke Limburg organiseertj aljaors ’ne declamatiewèdstried veur kinjer vanne basissjoeal. In versjillendje laeftiedscategorieë kómme lieërlinge van diverse sjoeale op ’t podium óm ein dialekteks (proza of poëzie) veur te drage. Ein deskóndige jury keus oet de deilnummers ’ne winnieër.

Naodet 3 jaor lank genne finale gehalde kós waere door corona, kós det op 3 juni gelökkig weer waal. Eine bizondere finale umdet Omroep Peel en Maas dees rechstreeks haet oetgezönde. Al snel nao 12 oor leep de zaal beej DOK6 in Panninge vol, wao de 20 deilnemers, de winnaars oet de veurrondes beej de Kringe van Veldeke, same met eur femilies nao ware aafgereis vanoet hiel Limburg.

Klokslaag 13.00 oor äöpende Pieter Ebus de beejeinkóms waobeej hae stil stond beej de aafwezigheid van Henk Buskes, de veurzitter van de werkgroep Declamatie, dae nao 3 zwaore hersenoperaties momenteel revalideert in Heythuysen en Henk vuuel sterkte en baeterschap winste. Met ein wel gemeind aplaus woorte die winse door alle aanwezigen bekrachtigt. Nao ein korte samevatting van ’t programma van de middaag, goof Pieter Ebus de microfoon euver aan de veurzitter van Veldeke Limburg, Reg van Loo,  dae ’t belang van ’t gebroek van de dialekte beej de jeug ónder wäörd brach.

Neet gemekkelik veur de jury

Vervólges waas ’t de beurt aan prissentator Hans Jacobs dae iers de jurieleeje veurstelde um vervólges op zien eige zier ludieke meneer de finaliste eur veurdrach leet oetveure. Tiejes ’t jurieberaod waas d’r nóg ein optreeje van Britt Eberson waat ein 6 tal liedjes ten gehure brach. Alle deilnemers woorte vervólges gevraog te gaon zitte op de bühne wao de veurzitter van de jurie, Hortense Brounts, aangoof det de jurie ’t neet gemekkelik hadde um de oetintelikke prieswinnaars te kinne bepaole umdet de kwaliteit van alle veurdrachte erg hoeëg waas.

Alle deilnemers krege as aandinke aan deze finale nóg ein leuk book, Teikene in Tegele, geschreve door Truus Verbong, ein “activity watch” en same met de al ierder oetgereikte oorkonde kós begónne waere met ’t make van de foto’s door Jos Verbong. Pieter Ebus sloot de beejeinkóms aaf met ein dankwaord aan allen en de meideiling det alle deilnemers euver ein paar waeke nóg eine USB-stick zulle kriege wao alle veurdrachte en alle gemakte foto’s op vas gelag zulle waere. Truuk kiekend eine zier geslaagde middaag.

De Prieswinnaars

Groep 3/4

1 Noud Laumen van de Krink Echt/Susteren
2 Saar Janssen van de Krink Remund
3 Ize Willems van de Krink Venlo/Tegelen

Groep 5/6

1 Thomas Laumen van de Krink Echt/Susteren
2 Inez Ermans van de Krink Echt/Susteren
3 Bente Daniels van de Krink Venlo/Tegelen

Groep 7/8
1 Luuk Kuijpers van de Krink Weert
2 Suze Golsteijn van de Krink Echt/Susteren
3 Lynn Helmes van de Krink Venlo/Tegelen

De aanmoedigingspries waas veur: Lot Geerlings van de Krink Weert

Veur ‘t bekieke van de rechstreekse oetzending van Omroep Peel en Maas: hie klikke.