Veldeke Verhaole Konkoer

(Mestreechs)

Zès auteurs geselecteerd in Veldeke Verhaole Konkoer 2015

‘t Hoofbestuur vaan Veldeke Limburg is zier te spreke euver de deilnaome aon ‘t Veldeke Verhaole Konkoer 2015. In totaal 23 auteurs sjikde e verhaol in wat aon de veuraof gestèlde eise voldeeg. Dat beteikende tot de jury ziech m,ós buige euver ‘n diversiteit aon verhaole.

Dee jury bestoont oet Sylvia Weusten es veurzitter en de hiere Pierre Bakkes en Colla Bemelmans es leie. Alle deilnummers höbbe oondertösse beriech oontvaange

Bij de beoordeling heet de jury ziech laote leie door ‘n aontal criteria die bij literair analyse gebrukelek zien. Um deen aonpak te toetse weurde ze hei summier weergegeve. Alleriers is gelèt op de originaliteit vaan de inzending. Daoneve golt tot de oetwèrking vaan de verhaollijn volgens ‘n door ‘t verhaol zelf opgerope spanningsbaog deende te verloupe. ‘n Dèrde criterium betröf ‘t gebruuk vaan motieve die ‘t thema vaan ‘t verhaol oondersteune. Wijer heet de jury laote mètwaoge ‘t gebruuk vaan beeldspraok en de woordkäös. Es lèste heet ze gelèt op de euvertuigingskrach die ‘t verhaol es literair werk opreup.

‘t Oordeil vaan de jury rizzelteerde in ‘n selectie vaan zès inzendinge boevaan de auteurs in aonmèrking koume veur ‘ne workshop mèt de sjrijver Bennie Lindelauf en publicatie vaan ‘t kort verhaol. De geselecteerde zien:

• Els Diederen, Houthem-St.Gerlach mèt Druimtuin
• John Hertogh, Zitterd mèt Alles is muigelik
• Wim Kuipers, Mestreech mèt Film ’t waeges
• Koos Neijnens, Wiert mèt Vör ’t gevâl det
• Marleen Schmitz, Oirsbeek met Anne F.
• Har Sniekers, Thoer mèt Absoute