47e  Congres VLDN

De Vereineging veur Limburgse Dialek- en Naomkunde organiseert op zaoterdag 15 aprèl häör 47e congres. ’t Congres vint plaots in MFA De Schans, Burg. Van Soets-Jansbekenplein 3 in Arce. ’t Thema vaan ’t congres is: “Taol en gesjiedenis roond Arce en Velde”.

Vaanaof 9.30 oor is inloup mèt koffie of thee. Um 10.00 oor perceis opent VLDN veurzitter Dany Jaspers ‘t congres. Sprekers zien oonder mie Piet Cup vaan de Stiechting Heemkunde Arce, Frens Bakker vaan de Radboud Universiteit in Nimwege euver de Noordgrens vaan ‘t Limburgs, Joske Piepers vaan de Universiteit vaan Tilburg euver ‘t gebruuk vaan manneleke, vrouweleke en oonzijdege veurnaomwäörd veur vrouwe, Roeland van Hout en Joris Philippen vaan de Radboud Universiteit euver ‘t effek vaan Limburgs op de beoordeiling vaan radiocommercials en Michiel de Vaan vaan de Universiteit vaan Lausanne euver aw plaotsnaome oet de Rekening vaan Gelre 1294.

Wijer weurt ´n documentaire vertoend vaan amateur cineas Huub Duijf, Na edere veudrach is ruimte veur discussie. Aon de deilnaome aon ´t congres zelf zien gein koste verboonde. Veur € 20,- kint geer deilnumme aon de lunch en veur nog ins € 50,- zit geer ouch aon bij ’t fiesdiner nao aofloup. Tijdens de middagpoos steit ’n wandeling gepland. Insjrieve kint geer via deze link.