Veldgewas: de stum bij ‘t gediech (naojaor 2025)
Sommege diechters sjikke neet allein d’n teks vaan hun gediech nao Veldgewas meh spreke dee ouch in, zoetot dee ouch te beluustere is. En dat lievert dèks bezunder en intiem luustermominte op. In deze nómmer vaan Veldgewas leus Godelieve van Gemen häör gediech “Muzejumbezeuk” veur. Mèt zaank vaan Passion (9 jaor). Passionate (7) en Patience (5) oet Bulawayo Zimbabwe. Es geer d’n audioknóp hei-oonder duit kint geer dat beluustere en d’n teks dee droonder steit mètleze.
Muzejumbezeuk
het waar van pepeer
en het waar collage kuns
van neêt bekind persoën
zeej waar Maag gewaes
diej angere gaer vollegde
auch de röstende keplaon
het waar van sjtein
en het waar beeldhouw kuns
Shona kuns oêt Tengenenge
hae emeritus
van ’t ein of ’t anger
hae waar ens unne keplaon
zeej zach det eur Oma
auch plaetjes plekde sjattig
en leêp wir wieër
hae mómpelde get
Afrika en primitief
en leêp wir wieër
in ’t restaurank
zote geluifsgenote
idder op ziene sjtoôl
versjrikkelik verbónge
baumtikkertje te praote
in de garderaob
blinge koe en kiekeboe
tösse beige broêne Kemmel-jes
hóngerd daag laupe
van dao nao Bulawayo
gaon Passion en Patience
Okra’s plökke
en Mango’s aete
Gedich in ’t Baolders van Godelieve van Gemen
mit zang van Passion, Passionate en Patience
Zomer 2025
