Hónderd jaor Veldeke – de aanleiding tot de oprichting
Haos hónderd jaor geleje
Dialectvereniging Veldeke kint ein historie die noow haos 100 jaor geleje, in 1926, is begós. Toen kwame in Mestreech eine gas notabale beejein die zich zörg makde euver ’t truukloupend gebroek van ’t Limburgs dialek. Die zörg waas neet niej: al in d’n 18e en de 19e ieëw vinde we publikaties wao in de vrees wuurt oetgespraoke det ’t dialek teloor zoel gaon ónder invlood van oeërsprónkelik ’t Frans en later ’t Nederlands as officiele taal.
In 1926 woort de beoefening en ’t in stand halde van de Limburgse dialekte veur ’t iers in vereinigingsverband gepropageerd. De naam Veldeke verwies nao d’n dichter Henric van Veldeke, dae ach ieëwe ierder zien verze schreef in de daomalige gebezigde streektaal. Maar aanvankelik schreef me de naam nog met puntjes tösse de letters waomei Veldeke ein aafkorting woort veur ’t motto: Voor Elk Limburgs Dialect Een Krachtige Eenvormigheid. Daomei woort aan d’n eine kant verweze nao de vuuelvormigheid van de dialekte die Limburg riek waas (en is) terwiel aan d’n andere kant ’t streve nao uniformisering van spelling en weergave daovan woort oetgedrök.
(Dialek: Venloos/BV)
