Sjeng, Sjer en de Sjele werme Mestreech op veur spektakelmusical Bokkenrijders
Sjeng, Sjer en de Sjele werme Mestreech op veur spektakelmusical Bokkenrijders
Bezeukers vaan de spektakelmusical Bokkenrijders in Stadion De Geusselt weure deze zomer verwelkomd mèt ‘n officieel pre-show vaan Sjeng, Sjer en de Sjele. Nog veur d’n ierste drone opstijg en de acteurs en peerd ‘t veld betrejje, doompelt de band ‘t publiek oonder in Limburgse sferen. Mèt väöl energie, ‘n set sjoen Limburgse nummers, boe-in hun nummer euver Bokkerijers centraal steit.
Ze zien gein veurprogram in klassieke aard, mer es sfeermaker en aonjaoger vaan de aovond. Vaan 20:00 tot 20:30 oor verzörge ze ‘n levendige entree boe-in ‘t publiek lankzaam oonderdeil weurt vaan de legende.
De band besteit oet Xavier Emmen (cóntrabas), Sjer Damen (gitaar en zaank) en Sjeng Damen (trèkzak). Beij de pre-show zal Thimo Gijezen (multi-instrumentaal) de band versterke.
“Es pre-show ploog se es ‘t woere de culturele groond veur de veurstèlling,” vertèlt Xavier. “Veer wèlle dat luij hunne dag achter ziech laote en ziech ope stèlle veur ‘t verhaol dat geit kaome.”
Ouch Sjeng, Sjer en de Sjele zien geïnspireerd door ‘t verhaol vaan de Bokkerijers en sjreve ‘n nummer euver dees legende. ‘t catchy refrein geit zoe: “Wat wille ver? Zèllever!” ‘n zin die eve mysterieus kleenk es ’t verhaol zelf. “De Bokkerijers is zoe ein verhaol boe noch altied vraoge umheen haange,” zègk Sjer. “Besteit t echt? Wat is woer? Dee spanning en dat duuster rendsje wèlde veer vaange in oos nummer. Dat ‘t noe maag bijdrage aon deze musical, veult es ‘n enorme ier.”
“Veer hope dat luij ziech veule es ’n keend dat naor de cinema geit,” zègk Sjeng. “Un bitsje spanning, väöl zeen, ‘t geveul dat get biezoonders geit gebäöre. Dat moment effe veur t begint, dao stoon veer. Veer wèlle dat luij al hinnevel kriege veur de ierste scène begint. Dat ze deenke: Menneke, dit weurt get biezoonders.”
De spektakelmusical Bokkenrijders is ‘n groetsjaolige ope loch productie mèt 600 drones, 100 acteurs, peerd en ‘n bok, gerezjiseerd door Servé Hermans en Peter Noten. ‘t verhaol bringk de mysterieuze en duuster legende vaan de Bokkerijers tot leve veur doezende bezeukers per aovond.
De musical is vaan 3 t/m 27 juni te zien in Stadion De Geusselt in Mestreech. De pre-show mèt Sjeng, Sjer en de Sjele start veur eder veurstèlling, veurtot ‘t publiek de tribunes betrejd.
