De Herfshane Band en Chantal Janzen werke same veur Leedjes Veur De Ieëwigheid II
De Herfshane Band en Chantal Janzen werke same veur Leedjes Veur De Ieëwigheid II
De Herfshane Band, d’n äöpener van ‘t Pinkpop-festival van dit jaor, en Chantal Janzen slaon de hand inein veur Leedjes Veur De Iëuwigheid II. Same bringe zeej op vriedaag 3 juli ein nieje versie oet van Hallo in de Yellow. Det nummer verscheen oeërsprónkelik in 1999 as duet van Frans Pollux en Chantal Janzen. De single vormp d’n twieëde release van ‘t jubileumprojek van de Nach van ‘t Limburgse Leed. De originele versie van Hallo in de Yellow verscheen ruum eine kwart ieëw geleje op d’n album Alles In Ein Buuetje.
Veur Leedjes Veur De Iëuwigheid II, wao in ‘t oeuvre van Frans Pollux centraal steit, haet De Herfshane Band ein nieje interpretatie
van ‘t leed gemaakt. Ofschoeën Chantal Janzen slechs sporadisch in ‘t Limburgs te hure is, werk het veur dees gelaegenheid mei aan ein nieje versie van ‘t nummer.
25e editie
Met Leedjes Veur De Iëuwigheid II viert de Nach van ‘t Limburgse Leed eur 25e editie. Net wie beej de ierste editie van Leedjes Veur De Ieëwigheid róndum ‘t oeuvre van Frans Boermans steit d’r met Frans Pollux opniej eeinen invloodrieke Venlose leedjesschriever centraal. Twelf Limburgse acts make veur dit album ein eige interpretatie van ein nummer van Pollux. Ierder verscheen al d’n ierste single Alles kump good van Lex Uiting. Met Hallo in de Yellow krieg ‘t publiek ein twiede inkiekske van ‘t album.
De officiële presentatie van Leedjes Veur De Ieëwigheid II, det op cd as ouk op vinyl verschient, vindt plaats op dónderdag 17 september 2026 in ein uitverkoch Grenswerk, twieë daag veur de jubileumeditie van de Nach van ‘t Limburgse Leed.
Mier informatie euver de Nach van ‘t Limburgse Leed is te vinde op www.limburgsleed.nl.
