Veldgewas: de stum bij ‘t gediech (September 2026)

Sommege diechters sjikke neet allein de tekste vaan hun gediech nao Veldgewas meh spreke die ouch in, zoetot die ouch te beluustere zien. En dat lievert dèks bezunder en intiem luustermominte  op. In deze nómmer vaan Veldgewas leus Godelieve van Gemen häör gediech “Geluif, haop en leefde” veur.  Es geer op d’n audioknóp hei-oonder duit kint geer dat beluustere en d’n teks dee droonder steit mètleze.

Triptiek Geluif, haop en leefde

Geluif

water vur einen doeëje
ut is wiej water drage
nao ein euversjtruimbde Maas

einen doêjen haan drief sónger wil
in den oêtlaup van ein baek
diej klamp nag laeve beejt

witte vaere wölkskes
van miniscule iêskristalle
haoje efkes sjtil baove den haan
umermen um mit leêch
in zilverwit en bevraore blaw

ich bliêf in um gluive
in zien vaere diej glómme
in zien vigilant gekrei
in de wóngere van den Hemel

Haop

sestig jaor al hingk
naeve de keuketaofel
mit ein penaeske aan de moor
ein anzichkaart mit Poolhaas
en in siersjrif gesjreve wäörd:
Groeten van Tinus en Hond.
Pax Christi. Blijf blij en gezond

Tinus zal kómme
dinkelik sónger hóngk
Sjaak zellef is ummer nag
eine paezigge mageren haan
en einen echte Samaritaan

Sjaak, man, kóm de gaw
mien kat zit wiêd te hoeëg
in diejen baum dao!
rup den naober um
ziede wel?

de klum nao baove toe
traej vur traej op ein leier
van sjterk aleminium
besjtaond oêt twieë deil
vutje vur vutje

kóm mer miemke, miem miem miem
hoeëger klump de kat nag
ónger oêt de deepte
huurt Sjaak zienen naober

“Da’s ’t naodeil van die dinge van die van die klauwe,
die staon feitelik fout um umlaag te klimme …
kiekde uut…!”

Einen echo van flewiel sjmiespelt
eine Poema sjpint in zien oeër
dao lek ein nate tóng zien gezich
bleik aomp hae zaoch nag

van wieêdeweg rup Tinus get

Leefde

“Wiej sjmaak eine Walleves?”
sjreef ze nao eure zoon
dae dao van hei ge-aete

Dao kwaam noeëts ein antwaord
hae woende noow in eine Walleves
dao waar plaats genóg vur um

Zeej zóng vur um
euver alles wao hae van heel
auch euver Jonas in de Wallevis

Godelieve van Gemen
Baolder, zomer 2026