BieB Ech mit “Limburgse Hook” 

BieB Ech mit “Limburgse Hook” 

Op dónderdigmiddig 19 november óm 14.30 oer weurtj in de BieB aan de Bovenstestraat 9 ‘ne zoageneumdje “Limburgse Hook” in gebroek genómme. Net op dae daag is de BieB op die lokasie in Ech ein jaor in gebroek. Vanaaf ’t begin en ouch in de veurige lokasie haet Veldeke Krink Ech meujte gedaon óm ’t Limburgs es taal dao ’n plaats te gaeve; in gespraoke én in gesjreve vórm.

 

Zoa weurtj dao edere dördje maondig van de maondj door vriewilligers van VKE väörgelaeze aan kènjer van zoaget 3 tót 7 jaor: Gemiddeldj is dao den ’n gruupke van 5 tót 9 kènjer aanwezig. Die kómme den mit aojers of groataojers of oppas ’n half uurke loestere nao ein in oos Limburgs väörgelaeze verhaol.

Bie de äöpening van de nuje BieB in november 2025 haet VKE ’n bedraag besjikbaar gestèldj óm ’t Limburgs in de BieB ’n plek te gaeve. Det bedraag woor aafkómstig van börgemeister J. Hessels, dae det haw gekrege bie zien aafsjeid van ’n organisatie wo hae in ’t bestuur zoot. Hae goof aan det Veldeke daoväör ’n gooj bestömming kós keze. Det is gebäördj: al bie de äöpening is ’n taofel geplaatsj en ‘ne plattegróndj op de moer mit ’n sjoan gedich. Ouch elders in de BieB zeen Limburgse tekste versjene, gesjreve door de sjriefster Laura Theunissen van de Slek, det de BieB ouch regelmaotig benutj väör bookprissentaties.

Mer de planne óm ’t Limburgs in de BieB ’n plaats te gaeve, ginge verder. En dit haef gelèdj tót de noe te äöpene “Limburgse Hook”, wo-in ouch ‘ne bokekas ’n plaats haef gekrege wo de bezeukers Limburgstalige beuk en beuk äöver Limburg zólle aantreffe die door VKE dao geplaatsj zeen oet ’t eige bookbezit, awd en recent. De meiste beuk kènne ingekeke, mer ouch gelieëndj waere. Op die meneer perbere VKE en de BieB ’t laeze van ’t Limburgs te bevordere. Det vènje de meiste minse neet gemekkelik, mer ’t bliektj det get oefene kan helpe. Die kans is d’r noe! De Limburgse Hook is ’n aanvölling op de versjillendje functies die ‘ne BieB vandaag de daag haetj. In de kómmendje tied zölle ouch de kursusse “Leef Limburgs” en “Laeze en sjrieve” in de BieB gegaeve waere.