Âldvenrodsen Ieërepries uutgereijkt án Henk Deters

22 oktober 2017

D’n Âldvenrodsen Ieërepries is ien 1976 dur Veldeke Venroj iengesteld um persoeëne of ienstellinge te ieëre die eur aege ònbaotzuchteg hebbe iengezet um de geschiejenis van Venroj ien stând te hâlde of vur ‘t behâld van de Venrodse volkskultuūr, waoroonder òs dialekt. Dit is genne jaorleks terugkieërende pries már enne pries den allenneg wert uutgerejkt as Veldeke Venroj enne waerdege kandidaat viendt den beantwoordt án de doelstelling van de pries! De laesten Âldvenrodsen Ieërepries wier uutgerejkt ien 2011.

Veldeke Venroj zal d’n Âldvenrodsen Ieërepries ien 2017 toekenne án HENK DETERS uut Ysselsteyn vanwege zien enorme verdienste vur ‘t uutdrage van de Venrodse taal.

De pries zal òp zòndág 22 oktoeëber werre uutgerejkt ien Schouwburg Venray, waor um 16.00 uūr ‘t offisjele gedieëlte begint ien de klaene theaterzaal. Ánsluutend zal van 18.00 – 19.00 uūr ‘n spontane resepsie gehâlde werre ien de klaene fwajee vur iederieën den Henk Deters ‘n waerm hárt toedraagt!