Kumste boetespeule?

21 juni 2017

Op goonsdag 21 juni organiseert de kindercommissie vaan ‘Veldeke Krink Mestreech’ ‘nen echte ‘Mestreechse Späölselkesmiddag’. Tösse 17.00 en 19.00 oor kinne alle kinder vaan de basissjaole oet Mestreech op ’t pleinsje veur d’n Hiemel (St. Bernardusstraot in Mestreech) deilnumme aon alderhand boetespäölselkes vaan huive tot kókkerelle en nog väöl mie. Um alle späölselkes te doen biste oongevier ‘n oor tot anderhaaf oor bezeg. Awwers, bompa’s en bomma’s kinne ziech opgeve um same mèt de kinder deil te numme aon deze middag.

Daoneve verzörg de Stiechting Mestreech Vestingstad ’n klein roondleiing in de naobij gelege Hèlpoort. In klein grupkes mage de kinder in d’n torie gaon kieken nao wie Mestreech vreuger zien stad besjermde. Mesjiens weurt ’n origineel kenon nao boete gerije en aofgesjote.

Bij slech weer weure de boetespäölselkes nao binne verplaots en zal ’t program einegszins aongepas weure.

Um deil te numme kint geer uuch aonmelle via:
info@veldekemestreech.nl. o.v.v. ’t aontal kinder.

Koste: Gratis, alle kinder kriege ‘n consumptie en e leuk aondinke (deze middag weurt gesponsord door Veldeke Limburg en Veldeke Krink Mestreech).

De doelstèlling vaan Veldeke Mestreech is ’t behaajd en de bevordering vaan ’t Mestreechs. Heibij wèlt ze ziech ouch riechte op de jäög, die allesbepaolend zal zien um de taol en cultuur vaan Mestreech in iere te hawwe!