Limburgdaag um de sjeiing van Belsj en Nederlands Limburg te gedinke

Op 19 aprèl 1839 woorte de twie Limburgen oeterein gerete en gónge ze behure tot twie versjèllende len. De inwoeners woorte hei-euver natuurlek neet geconsulteerd: ’t Verdraag vaan Londe spraok dit oet euver de köp vaan de betrokkene.

Um die sjeiing te gedinke en um de verboondeheid tösse Oos en Wes Limburg te versterke organiseert dialekorganisatie Veldeke Bels(j) Limburg same mèt ’n achtal partners op zaoterdag 19 aprèl aonstaond ‘nen actiedaag boebij ’t veer tösse Stokkem (B) en Berg aon de Maos (NL) es centraol forum deens deit. Zoe krijg dat veer ouch ’n figuurleke verbindingsfunctie.

’t Program vaan deen daag zal oet twie deile bestoon. In de veurmiddag weurt d’n Elisabethzaol vaan Stokkem (Senator G. Ruttestraot 21) ’t centrum vaan alderhand podiumactiviteite en touwspraoke. In de naomiddag weurt dit fiestelek doorgezat in ’t Multifunctioneel Centrum vaan Berg (Bergerweg 1). Tössedoor is de Maosover vaan Meeswijk, vlakbij ’t veer, ’t toneel vaan symbolische handelinge.

Program

Um 10.00 oor goon de deure vaan de Sint Elisabethzaol ope en weurt ’n drenkske aongebooje. Nao e welkomswoord vaan de börgemeister volge historische oeteinzèttinge door Jean Pierre Segers   (Loonse stad Stokkem, de Maos en ‘t veer) en Jean Kenzeler (de jaore 1830-1839). Tössedoor bringk Peter Willems dialekleedsjes oonder begeleiing vaan e 15-maan sterk interlimburgs bloosensemble.

Mèt de fiesbös rije veer nao ‘t veer. Dao, op Meeswijkse groond, bringk Gerard Mostert ‘t gediech ‘Haol euver’ vaan Arnold Sauwen. Ouch Ton Theelen en Stan Mardaga zörge veur e striepke poëzie. En daan oontploeje veer get symbolisch. Nao d’n euvertoch slete veer aon bij ‘ne cortèsj vaan lui oet de wereld vaan vastelaovond en sjötterije, same mèt bellemaan Ed Gravee, dee ‘nen teks declameert.

In ‘t MFC in Berg kint me e gevarieerd program vaan podiumartieste mètmake, te beginne mèt ‘n performance vaan de bellemaan. Guus Peeters en Paul van Loo bringe meziek, Jonas Konings poëzie, Robin Peeters ‘n touwliechting bij zien Limburgstaolige fèlms en documentaires. Twie lierlinge van het Groenewaldcollege trejje op, acteur Huub Stapel gief ‘n speech en Felix Bergers bringk e gediech. Um 16.00 oor is ‘t tied veur de receptie. Um 17.30 oor steit de bös gereid aon de Belzje kant vaan het veer.

Insjrieve

Alles is gratis, meh de bezeukers mote veuraof e seinsje geve. Maondag 12 aprèl weurt de insjrijving aofgeslote. Veer zouwe gere vaan ederen deilnummer de naom, woenplaots en mailadres of tèllefoonnómmer höbbe, mèt de vermelling wat veur deil vaan ’t program tot me wèlt bijwoene (veurmiddag/naomiddag/Gansen daag). Bij veurkäör insjrieve via e mailke nao: jean.menten@gmail.com, eventueel kint dit ouch via d’n tèllefoon (0032/484/496 99:6).

Organisatie

Dit is de derde editie vaan het dialekevent op de Limburgdaag. De ierste editie voont in 2023 plaots in Maaseik en Roosteren, de twiede editie in Kanne. Veur dees editie sloge ’n ganse rij partners de han inein: Kunstkring Arnold Sauwen, harmonie Sint-Elisabeth, Ecrevissecomité Obbicht, Raod veur ‘t Limburgs, Promo Stokkem, de besturen van de vier aangrenzende gemeenten, Veldeke Maasland, Veldeke Limburg NL en Veldeke Bels(j) Limburg.