Limburgdaag Veldekekring Ech en Belsj Limburg

19 april 2023

De Veldekekringe aan weerszie van de Maas organisere op 19 april a.s. ‘ne Limburgdaag. Dit mit óngersteuning van de gemèndjebesture van Maaseik en Ech-Zöstere. ’t Gemeinsjappelik verleje – wie de beide Limburgen nog ein provincie wore – is de aanleiding. Dao-aan koom ’n ènj in 1839 door ’t verdraag van Londen: De provincie Limburg waerdje opgedeildj. Belsj Limburg  mit es hoofdstad Hasselt en Nederlands Limburg mit Mestreech es hoofdstad. Mer óndanks die sjeiding bleef contact tösse äöverheid en burgers oet de beide provincies. Ouch de Veldekekringe Belsj Limburg en Veldeke Krink Ech wete zich regelmaotig te vènje. Daobie zeen ‘t gezamenlik Limburgs dialect en culturele activiteite ‘ne bènjendje factor.

 

Door de Pater Sangersbrök in Maaseik weurtj det in dees regio ouch mekkelik gemaaktj. Die brök verbuntj Maaseik mit Roostere, in de gemèndje Ech-Zöstere. Det weurtj oetgedröktj in ’t logo van ‘ne knoup midde op de brök mit 2 henj die door ’n touw aanein zeen geknuiptj. Dit klein monument is ónthuldj bie de naamgaeving van de brök in 1999. Pater Wullem Sangers, gebaore in Staeveswaert, woor ‘ne bekèndje Maaskèntjer,  Kruutshieër in Maaseik. Zien laeve lank haet hae zich ingezatj väör ’t bie-ein haoje van de streek aan beids kantje van de brök.

Prissentatie aan de brök

Op zichzelf is 2023 gein bezunjer jaor in de context van de sjeiding van de beide Limburge. Mer de Veldekekringe Belsj en Ech zeen de aanleiding in ’t feit det d’r planne zeen om de brök in de kómmendje jaore te vervange. Nao aanleiding van det gegaeve is de Limburgdaag 2023 georganiseerdj. Mit ‘ne blik nao ’t verleje mer zeker ouch nao de toekomst. D’r is ’n programma opgezatj mit Limburgse proza en poëzie aangevöldj mit meziek, det aan beids kantje van de brök in invölling zal kriege. Väör de äöpening in de Sint Catharinakirk in Maaseik en de aafsloeting in ’t Gemeinsjapshoes in Roosteren höbbe leje van de kringe zich kènne opgaeve. Zie waere vanaaf 13.00 oer verwachtj oppe parkeerplaats taegenäöver de Roosterhoeve, Hoekstraat Roosteren. Van dao vertèktj ’n huifker nao Maaseik. Opgave hieväör kan noe neet mieë, want ’t maximum aantal is bereiktj. De prissentatie aan de brök zelf is vrie toegankelik väör ederein en vuntj plaats vanaaf zoaget 15.45 tót 16.45 oer op de klein parkeerplaats aan de Roosterense kantj van de brök. Mit o.a. meziek, toespraok, väördrach en ónthulling.