Nog ‘ne Limburgdaag um de sjeiing vaan Belsj en Nederlands Limburg te gedinke
Neve Veldeke Bels(j) Limburg heet ouch ’t ANV, vereineging veur Nederlands-Vlaomse samewèrking, ‘ne Limburgdaag georganiseerd. Op ’n ander plaots (Kestiel Limbrich) en op ‘nen anderen daotum (25 aprèl) meh mèt dezelfde intentie. En Veldeke Limburg is zoe good um aon allebei die Limburgdaog mèt te wèrke. Meh veer hope wel tot in de koumende jaore die twie daog gecombineerd kinne weure tot éinen einege Limburgdaag. Este euver verbinding praots is dat toch wel e nobel streve.
Program
Wie daan ouch, ’t program vaan de Limburgdaag vaan ’t ANV begint um 13.30 oor mèt ‘ne openingswoord vaan daagveurzitter Raymond Vlecken. Daonao gief heer ’t woord aon Remco Vrinzen vaan de Radboud Universiteit in Nimwege, dee e referaat hèlt euver e juridisch oonderzeuk nao de Limburgse autonomie. Nao e muzikaol intermezzo door René Haustermans weurt in ‘ne paneldiscussie ingegaange op ’t referaat mèt es deilnummers Theo Bovens, ierstekamerlid en besjermhier vaan Veldeke Limburg, Frans Weekers, secretaris-generaol Benelux Unie, en Maarten Vidal, coördinator grensoverschrijdende samenwerking België-Nederland Kanselarij en Buitenlandse Zaken Vlaamse Overheid.
Jacques van Rensch gief inziech in de stand van zake vaan ’t Treckpoel Projek. Daonao hèlt Reg van Loo, veurzitter vaan Veldeke Limburg (NL) ’n veurdrach euver 100 jaor Veldeke. En nao nog e muzikaol intermezzo vaan René Haustermans dreug Theo Bovens ’t gediech ’n Blom in dien haor vaan Wim Kallen veur in ’t Mestreechs.
Insjrieve
Deilnaome aon de Limburgdaag is gratis. Geer kint uuch insjrieve tot 19 aprèl via dit e-mailadres: limburgdag25@gmail.com.