Prizzentatie Kinderbook Vastelaovendskinger

20 fibberwarie 2019

De vastelaovend is al op alle meugeleke menere veur ’t vootleech gebrach meh tot in 2017 ’t printebook ‘Vastelaovendsvrundsjes’ vaan Vivianne Rijnders in ’t Mestreechs versjeen, waor dao nog gei kinderbook wat op ‘n einvoudege meneer de tradities en eveneminte roontelum Limburgs volksfies nómmer ein oetlag. De Mestreechse oonderwijzeres Vivianne Rijnders had daomèt ‘ne primeur, boebij häöre collega Jeanine Brouns-Damen prachtege kleurplate maakde.

De gemeinte Kèrkraoj waor zoe gecharmeerd vaan dat beukske tot ze Loek van de Weijer vroog um dao ’n Kèrkraojse versie vaan te make, mèt alle Kèrkraojse tradities roontelum dat döl fies. Dat is ’t veurleesbook ‘Vastelaovendskinger’ gewore, boemèt awwers of oonderwijzers de kinder vaan 4 tot en mèt 6 jaor weegwies kinne make. De teikeninge zien zoe gemaak tot de kinder zelf de plate kinne inkleure, zoetot zelfs vaan publieksparticipatie op ’t jongste nivo kint weure gesproke.

’t Book is nao ’t Kèrkraojs vertaold door Loek van de Weijer, dee zelf jaorelaank es hofnar vaan de prins fungeerde. De aongepasde teikeninge zien vaan de hand vaan Jean Paffen, dee ’t Mooswief vakkundeg in d’r Joep veranderde en zoe mie teikeninge maakde.

Neve de Stiechting LiLili deit ouch de commissie Dialek vaan de gemeinte Kèrkraoj zien bès um ’t Limburgs op alle meugeleke menere te bevordere. Zoe gief ze in dees periood op versjèllende basissjaole  ‘ne cursus Kèrkraojs veur kinder. Daobij kump dit book netuurlek oetstekend vaan pas. Wethawwer Schlangen vaan cultuur oondersteunde ’t projek daan ouch vaan harte. De Kèrkraojse jäög zal devaan genete.

De prizzentatie vaan ’t book zal plaotsvinde op goonsdag 20 fibberwarie aonstaonde um 12.10 oor in basissjaol Diabolo, Meester Absilsstraat 6 in Kèrkraoj. Jäögprins Staf en zie gevolg zalle daobij aonwezeg zien en ’t ierste exemplaar in oontvaangs numme. Nao de prizzentatie is ’t book in de bookwinkels in Kèrkraoj te koup veur € 14,90.